ନୂଆଦିଲ୍ଲୀ: ଫେଶନ ଦୁନିଆରୁ ଭାରତୀୟ ପ୍ରଶାସନିକ ଅଧିକାରୀ ହେବା ଛୋଟ କଥା ନୁହେଁ। ନିଜ ସମୟାନୁବର୍ତ୍ତିତା ଓ କର୍ତ୍ତବ୍ୟନିଷ୍ଠା ଯୋଗୁ ଚଳିତ ଥର ୟୁପିଏସ୍ସି ପରୀକ୍ଷାରେ ସଫଳତା ହାସଲ କରିଛନ୍ତି ଐଶ୍ୱର୍ଯ୍ୟା ସୋରେନ୍। ୟୁପିଏସ୍ସି ପରୀକ୍ଷାରେ ମୋଟ ୮୨୯ ଜଣଙ୍କୁ ସଫଳତା ମିଳିଥିବାବେଳେ ଐଶ୍ୱର୍ଯ୍ୟାଙ୍କୁ ୯୩ ର଼୍ୟାଙ୍କ ମିଳିଛି। ପୂର୍ବତନ ମିସ୍ ଇଣ୍ଡିଆ ଫାଇନାଲିଷ୍ଟ ଐଶ୍ୱର୍ଯ୍ୟାଙ୍କ ହବି ହେଉଛି ମଡେଲିଂ କରିବା। କିନ୍ତୁ ତାଙ୍କ ସ୍ବପ୍ନ ଥିଲା ଆଇଏଏସ୍ ହେବା। ଶେଷରେ ତାଙ୍କ ଆଶା ପୂରଣ ହେବାକୁ ଯାଉଛି।
ଫେମିନା ମିସ୍ ଇଣ୍ଡିଆ ୨୦୧୬ ଫାଇନାଲିଷ୍ଟ ଐଶ୍ୱର୍ଯ୍ୟା ୨୦୧୬ରେ କ୍ୟାମ୍ପସ୍ ପ୍ରିନ୍ସେସ୍ ଦିଲ୍ଲୀ ଓ ଫ୍ରେଶ୍ଫେସ୍ ଦିଲ୍ଲୀ ୨୦୧୫ର ବିଜେତା ହୋଇଥିଲେ। ମଡେଲିଂ କରିବା, ର଼୍ୟାମ୍ପ ଶୋ’ରେ ଭାଗନେବା ତାଙ୍କର ଏକ ହବି ଥିଲା। ସ୍କୁଲ ଓ କଲେଜରେ ସେ ନିଜକୁ ଜଣେ ଆକ୍ଟିଭ୍ ସଦସ୍ୟ ଭାବେ ପ୍ରତିପାଦନ କରିଥିଲେ। ତାଙ୍କ ବାପା ଭାରତୀୟ ସେନାର ଜଣେ କଲୋନେଲ। ଦିଲ୍ଲୀର ଶ୍ରୀରାମ କଲେଜ ଅଫ୍ କମର୍ସରେ ଐଶ୍ୱର୍ଯ୍ୟା ଗ୍ରାଜୁଏଟ ପାସ୍ କରିଥିଲେ। ମଡେଲିଂ ସହ ନିଜର କ୍ୟାରିୟର ପ୍ରତି ସେ ବିଶେଷ ଧ୍ୟାନ ଦେଉଥିଲେ। ବ୍ୟାପକ ପ୍ରସ୍ତୁତି ପରେ ସେ ନିଜର ପ୍ରଥମ ପ୍ରେମକୁ ହାସଲ କରିବା ଦିଗରେ ଆଗେଇ ଚାଲିଲେ। ୨୦୧୯ ଅଗଷ୍ଟ ୪ରେ ସେ ଦେଇଥିବା ୟୁପିଏସ୍ସି ପରୀକ୍ଷାର ଫଳ ପ୍ରକାଶ ପାଇଲା। ଏଥିରେ ପ୍ରଦୀପ ସିଂ ଟପ୍ପର ହୋଇଥିବାବେଳେ ମହିଳାଙ୍କ ମଧ୍ୟରେ ପ୍ରତିଭା ବର୍ମା ଶ୍ରେଷ୍ଠ ବିବେଚିତ ହୋଇଥିଲେ। ପୂର୍ବତନ ବିୟୁଟି କୁଇନ୍ ଐଶ୍ୱର୍ଯ୍ୟାଙ୍କୁ ମିଶାଇ ମୋଟ ୧୯୭ ମହିଳା ୟୁପିଏସ୍ସି ପରୀକ୍ଷାରେ ସଫଳ ହୋଇଛନ୍ତି। କୌଣସି ଟ୍ୟୁଶନ ନ ହୋଇ ଦୃଢ଼ ଆତ୍ମ ବିଶ୍ୱାସ ଓ କଠିନ ପରିଶ୍ରମ ଦ୍ୱାରା ସେ ପ୍ରଥମ ଥର ଏହି ସର୍ବଭାରତୀୟ ପରୀକ୍ଷାରେ ସଫଳତା ହାସଲ କରିଛନ୍ତି। ୯୩ ର଼୍ୟାଙ୍କକୁ ନେଇ ସେ ନିଜର ଖୁସି ଜାହିର ମଧ୍ୟ କରିଛନ୍ତି। ରାଜସ୍ଥାନର ଏହି ଝିଅ ମହିଳା ସଶକ୍ତିକରଣର ବିଶେଷ ଆବଶ୍ୟକତା ରହିଥିବା କହିଛନ୍ତି।