ଭୁବନେଶ୍ୱର,୨୮।୧୨(ବ୍ୟୁରୋ): ନିକଟରେ ରାଜ୍ୟ ସରକାର ଭୁବନେଶ୍ୱରର ବରମୁଣ୍ଡା ବସ୍ଷ୍ଟାଣ୍ଡକୁ ଅତ୍ୟାଧୁନିକ ରୂପ ଦେବା ପାଇଁ ନିଷ୍ପତ୍ତି ନେଇଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏଭଳି ଘୋଷଣା ପରେ ବରମୁଣ୍ଡା ବସ୍ଷ୍ଟାଣ୍ଡର ରୂପରେଖ କିଭଳି ହେବ ସେନେଇ ଏକ କାଳ୍ପନିକ ନକ୍ସା ପ୍ରକାଶ କରାଯାଇଛି। ଏହି କାର୍ଯ୍ୟ ଲାଗି ୧୮୦ କୋଟି ଟଙ୍କା ଖର୍ଚ୍ଚ ହେବାକୁ ଥିବାବେଳେ ୧୮ ମାସ ଭିତରେ କାମ ସାରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ହେଲେ କଟକ ଜିଲା ଗୋପାଳପୁରଠାରେ ହେବାକୁ ଥିବା ମଡର୍ନ ବସ୍ପୋର୍ଟ ଏବେ ମଧ୍ୟ ଅନିଶ୍ଚିତତା ମଧ୍ୟରେ ରହିଛି। ରାଜ୍ୟ ସରକାର ଏବଂ ପୂର୍ବତଟ ରେଳପଥ ମଧ୍ୟରେ ରହିଥିବା ଜମି ସମସ୍ୟା ଯୋଗୁ ଏ ପର୍ଯ୍ୟନ୍ତ କାମ ଅଟକି ରହିଛି। ଏନେଇ ପରିବହନ ବିଭାଗ ପକ୍ଷରୁ ବାରମ୍ବାର ସମୀକ୍ଷା ସତ୍ତ୍ୱେ କୌଣସି ଲାଭ ମିଳିପାରିନାହିଁ। ତେଣୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏହା ଉପରେ ଧ୍ୟାନ ଦେଲେ ବସ୍ପୋର୍ଟ କାମ ତୁରନ୍ତ ଆରମ୍ଭ ହୋଇପାରିବ ବୋଲି କେତେଜଣ ଅଧିକାରୀ ବ୍ୟକ୍ତିଗତ ସ୍ତରରେ ମତ ପ୍ରକାଶ କରିଛନ୍ତି। କଟକ ଜିଲାପାଳ ଭବାନୀ ଶଙ୍କର ଚୟନୀଙ୍କୁ ଏନେଇ ପଚାରିବାରୁ ସେ କହିଛନ୍ତି, ଗୋପାଳପୁର ସ୍ଥିତ ଉକ୍ତ ଜାଗା ରେଲଓ୍ବେ ପାଖରେ ଥିବାରୁ ଏନେଇ ୬ ମାସ ତଳୁ ଏକ ରିଭିଜନ ମାମଲା ରୁଜୁ ହୋଇଛି। ଜମି ସରକାରଙ୍କ ପାଖକୁ ଆସିଲେ କାମ ଆରମ୍ଭ ହୋଇଯିବ ବୋଲି ସେ କହିଛନ୍ତି। ଏ ସମ୍ପର୍କରେ ପୂର୍ବତଟ ରେଳପଥର ପିଆରଓ ନିରାକାର ଦାସଙ୍କୁ ପଚରାଯିବାରୁ ତଥ୍ୟ ସଂଗ୍ରହ କରି କହିବି ବୋଲି କହିଥିଲେ।
କେନ୍ଦ୍ର ପରିବହନ ମନ୍ତ୍ରଣାଳୟ ପକ୍ଷରୁ ୨୦୧୮ ଡିସେମ୍ବର ୨ରେ ସବୁ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳକୁ ମଡର୍ନ (ଅତ୍ୟାଧୁନିକ) ବସ୍ପୋର୍ଟ ନିର୍ମାଣ ଲାଗି ନିର୍ଦ୍ଦେଶ ଦିଆଯାଇଥିଲା। ଅତ୍ୟଧିକ ଯାନବାହନ ଚଳାଚଳଜନିତ ପ୍ରଦୂଷଣ ରୋକିବା ଏବଂ ସାଧାରଣ ପରିବହନକୁ ପ୍ରୋତ୍ସାହନ ଦେବା ସକାଶେ କେନ୍ଦ୍ର ସରକାର ଏହି ଯୋଜନା କରିଛନ୍ତି। ଏହି ବସ୍ ପୋର୍ଟ ନିର୍ମାଣ ଲାଗି ୪୨ ଏକର ପଡ଼ିଆ କିମ୍ବା ଆଗରୁ କୌଣସି କାର୍ଯ୍ୟରେ ବ୍ୟବହୃତ ଜମି ନେବା ଲାଗି କୁହାଯାଇଥିଲା। ସେହି ଅନୁଯାୟୀ କଟକ ଜିଲା ଗୋପାଳପୁରଠାରେ ମଡର୍ନ ବସ୍ପୋର୍ଟ ନିର୍ମାଣ ଲାଗି ସ୍ଥିର ହେଲା। ଏହି ଯୋଜନା ପୂର୍ବରୁ ରାଜ୍ୟ ସରକାର କଟକ ବାଦାମବାଡ଼ି ବସ୍ଷ୍ଟାଣ୍ଡକୁ ଗୋପାଳପୁରକୁ ସ୍ଥାନାନ୍ତର ପାଇଁ ନିଷ୍ପତ୍ତି ନେଇଥିଲେ। ଏଥିପାଇଁ ଗୋପାଳପୁର ମୌଜା ପ୍ଲଟ ନମ୍ବର ୮୪୩, ଖାତା ନଂ. ୧୦୪୬ର ଜମିକୁ ସରକାର ୨୦୧୩ରେ ଚିହ୍ନଟ କଲେ। ଉକ୍ତ ଜମି ରାଜ୍ୟ ପରିବହନ ବିଭାଗକୁ ୨୦୧୫ରେ ହସ୍ତାନ୍ତର ହେଲା। ଏହାପରେ ରାଜସ୍ବ ବିଭାଗ ପକ୍ଷରୁ ଉକ୍ତ ଜମିକୁ ଗୋପାଳପୁର ବସ୍ଷ୍ଟାଣ୍ଡ ଲାଗି ଫିଜିକାଲ ପୋଜେଶନ ମିଳିଥିଲା। ଏହାପରେ ଯେତେବେଳେ ମଡର୍ନ ବସ୍ପୋର୍ଟ ପ୍ରସ୍ତାବ କେନ୍ଦ୍ରରୁ ଆସିଲା ସରକାର ଏହି ଜମିରେ ତାହା କରିବାକୁ ନିଷ୍ପତ୍ତି ନେଲେ। ଏହାପରେ ତୁରନ୍ତ ବସ୍ପୋର୍ଟ ସମ୍ପର୍କିତ କାଗଜପତ୍ର ପ୍ରସ୍ତୁତ କରି ୪୨ ଏକର ଜମିର ଫାଇଲ କେନ୍ଦ୍ରକୁ ପଠାଇ ଦିଆଗଲା। ମାତ୍ର କେନ୍ଦ୍ରୀୟ ଟିମ୍ ଦେଖିବା ପରେ ସେଠାରେ ମୋଟ ୨୩ ଏକର ଜମି ଥିବାବେଳେ ୪୨ ଏକର ଜମିର ଦସ୍ତାବିଜ ଭୁଲ୍ ପ୍ରମାଣିତ ହେଲା। ଏହାପରେ କେନ୍ଦ୍ର ସରକାର ଏହି ଫାଇଲ ରାଜ୍ୟକୁ ଫେରାଇଦେଇ ଠିକ୍ କାଗଜପତ୍ର ଦେବାକୁ କହିଲେ। ପରବର୍ତ୍ତୀ ସମୟରେ ରାଜ୍ୟ ସରକାର ଏହାକୁ ଭଲରେ ଅନୁଧ୍ୟାନ କରିବା ପରେ ଏଥିରୁ ୧୯.୩୨ ଏକର ଜମି ପୂର୍ବତଟ ରେଲଓ୍ବେ ହାତକୁ ପୂର୍ବରୁ ଟେକି ଦିଆଯାଇଥିବା ଜଣାପଡ଼ିଲା। ହେଲେ ରେଲଓ୍ବେ ଏପର୍ଯ୍ୟନ୍ତ ସେହି ଜମି ବ୍ୟବହାର କରି ନ ଥିବାରୁ ତାହାକୁ ପୁଣି ସରକାରଙ୍କୁ ଫେରାଇଦେବା ଲାଗି ପରିବହନ ସଚିବ ଗତ ସେପ୍ଟେମ୍ବର ୧୭ରେ ରେଲଓ୍ବେ ଏମ୍ଡିଙ୍କୁ ଚିଠି ଲେଖିଥିଲେ। କାମରେ ଲାଗି ନ ଥିବା ୧୯.୩୨ ଏକର ଜମି ଫେରାଇ ସରକାରଙ୍କ ନାମରେ ଏନ୍ଓସି(ନୋ ଅବଜେକ୍ସନ ସାର୍ଟିଫିକେଟ) ଦେବା ଲାଗି କହିଥିଲେ।
ବର୍ତ୍ତମାନ ପରିବହନ ସଚିବ ମଧୁସୂଦନ ପାଢ଼ୀ ଚିଠି ଲେଖିବାର ଅବଧି ୩ ମାସରୁ ଅଧିକ ଦିନ ହୋଇସାରିଥିବା ବେଳେ ଏହାର କୌଣସି କାମ ଆଗେଇପାରି ନାହିଁ। ଏ ପର୍ଯ୍ୟନ୍ତ ରେଲଓ୍ବେ ପକ୍ଷରୁ ଚିଠିର କୌଣସି ଉତ୍ତର ଆସି ନ ଥିବା ଖୋଦ୍ ପରିବହନ ସଚିବ କହିଛନ୍ତି। ଅନ୍ୟପଟେ ପୋଲିସ ହାଉସିଂ କର୍ପୋରେଶନ ଏଠାରେ ସରକାରଙ୍କ ନାମରେ ରହିଥିବା ଜମିରେ ଅଧା ପାଚେରି ନିର୍ମାଣ କରି ବସି ରହିଛି। ଏଭଳିସ୍ଥିତିରେ କେନ୍ଦ୍ର ସରକାରଙ୍କ ପ୍ରସ୍ତାବିତ ମଡର୍ନ ବସ୍ପୋର୍ଟ କେବେ ହେବ ତାହା ଅନିଶ୍ଚିତତାରେ ରହିଛି। ଅନ୍ୟପକ୍ଷରେ ଆଉ କେତେକ ରାଜ୍ୟରେ ବସ୍ପୋର୍ଟ କାମ ଶେଷ ହେବାକୁ ବସିଲାଣି। ବାଦାମବାଡି ବସ୍ଷ୍ଟାଣ୍ଡ ଅତ୍ୟନ୍ତ ଜନଗହଳିପୂର୍ଣ୍ଣ ହେଉଥିବା କାରଣରୁ ଗୋପାଳପୁର ବସ୍ପୋର୍ଟ ଲୋକଙ୍କ ଲାଗି ବହୁତ ସହାୟକ ହେବା ସହିତ ସହର ଭିତର ଗହଳି ମଧ୍ୟ କମିଯିବ ବୋଲି କୁହାଯାଉଛି।