ନୂଆଦିଲ୍ଲୀ,୫ ।୭: କରୋନା ମହାମାରୀ ସହ ଲଢିବାକୁ ଏବେ ଟିକାକରଣକୁ ବେଶ୍ ଗୁରୁତ୍ୱ ଦିଆଯାଉଛି । ବିଶ୍ୱର ପ୍ରାୟ ସମସ୍ତ ଦେଶରେ ଟିକାକରଣ ଅଭିଯାନକୁ ଦ୍ରୁତ ଗତିରେ ଆଗକୁ ନିଆଯାଉଛି । ଏହି କ୍ରମରେ ଆମେରିକା କମ୍ପାନୀ ମର୍ଡନା ଦ୍ୱାରା ପ୍ରସ୍ତୁତ କରୋନା ଟିକା ଚଳିତ ସପ୍ତାହରେ ଭାରତରେ ପହଞ୍ଚିବ ବୋଲି କୁହାଯାଉଛି । କୋଭିସିଲ୍ଡ, କୋଭାକ୍ସିନ ଓ ସ୍ପୁଟନିକ ପରେ ମର୍ଡନା ଦେଶରେ ଉପଲବ୍ଧ ହେବାକୁ ଯାଉଥିବା ଚତୁର୍ଥ ଭ୍ୟାକ୍ସିନ ହେବାକୁ ଯାଉଛି । ମିଳିଥିବା ସୂଚନାରୁ ଜଣାପଡିଛି କି ଡିସିଜିଆଇ ଡ୍ରଗ୍ସ ଆଣ୍ଡ କସମେଟିକ୍ସଆକ୍ଟ ୧୯୪୦ ଆଧାରରେ ନୂଆ ଔଷଧ ଏବଂ କ୍ଲିନିକାଲ ପରୀକ୍ଷଣ ନିୟମ, ୨୦୧୯ ଅନୁଯାୟୀ, ସିପ୍ଲାକୁ ଦେଶରେ ସୀମିତ ଜରୁରୀକାଳିନ ଉପଯୋଗ ପାଇଁ ମର୍ଡନାର କୋଭିଡ-୧୯ ଟିକାକୁ ଆମଦାନି କରିବାକୁ ଅନୁମତି ପ୍ରଦାନ କରିଛି । ଏବେ ସାରା ବିଶ୍ୱରେ କରୋନାର ଡେଲ୍ଟା ପ୍ଲସ ଭାରିଏଣ୍ଟ ତାଣ୍ଡବ ରଚିବାକୁ ଯାଉଥିବା ବେଳେ ମର୍ଡନାର ଏହି ଟିକା ଭଲ କାମ କରିବ ବୋଲି କୁହାଯାଉଛି । କାରଣ ଏହା ଆମେରିକାରେ କ୍ଲିନିକାଲ ଟ୍ରାଏଲ ସମୟରେ ୯୪ ପ୍ରତିଶତ କାମ କରିବ ବୋଲି ସ୍ପଷ୍ଟ ହୋଇଛି ।