ନୂଆଦିଲ୍ଲୀ,୧୮ ।୧୨: କେନ୍ଦ୍ର ସରକାରଙ୍କ କୃଷି ଆଇନକୁ ନେଇ ଲଗାତାର ୨୩ ଦିନ ହେବ କୃଷକଙ୍କ ଆନ୍ଦୋଳନ ଜାରି ରହିଛି । ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନସିଂ ଜରିଆରେ ଶୁକ୍ରବାର ମଧ୍ୟପ୍ରଦେଶର କୃଷକମାନଙ୍କ ସହ କଥା ହୋଇଛନ୍ତି । ବିରୋଧୀକୁ ଟାର୍ଗେଟ କରି ମୋଦି କହିଛନ୍ତି ଯେଉଁ କାମ ୨୫ ବର୍ଷ ପୂର୍ବରୁ ହେବାର ଥିଲା ତାହା ଏବେ କରାଯାଇଛି । କୃଷକଙ୍କ ସେହି ଦାବିକୁ ପୂରଣ କରାଯାଇଛି ଯାହା ବର୍ଷ ବର୍ଷ ହେଲା ପଡି ରହିଥିଲା । ପ୍ରଧାନମନ୍ତ୍ରୀ କହିଛନ୍ତି ଯେଉଁମାନଙ୍କର ରାଜନୈତିକ ପୃଷ୍ଠଭୂମି ଭୂଷୁଡି ପଡିଛି ସେମାନେ ଆଜି କୃଷକଙ୍କୁ ଭୟଭୀତ କରାଉଛନ୍ତି । ସେ କହିଛନ୍ତି ଆମେ କୃଷକଙ୍କୁ ଦେଢଗୁଣା ଏମ୍ଏସ୍ପି ଦେଇଛୁ ହେଲେ କଂଗ୍ରେସ ଦ୍ୱାରା କରାଯାଇଥିବା ଋଣଛାଡ ଏକ ପ୍ରହସନ ଥିଲା । ଏହାର ଫାଇଦା କେବଳ କଂଗ୍ରେସର ଭାଇବନ୍ଧୁ ଓ ପାଖଲୋକଙ୍କୁ ମିଳିଥିଲା । ମୋଦି ଆହୁରି ମଧ୍ୟ କହିଛନ୍ତି ବିରୋଧୀଙ୍କୁ ଏଥିପାଇଁ କଷ୍ଟ ହେଉଛି ଯେ ମୋଦି କେମିତି କୃଷି ଆଇନରେ ସୁଧାର ଆଣିପାରିଲେ । ଆପଣ ମୋତେ କ୍ରେଡିଟ ନ ଦିଅନ୍ତୁ, ହେଲେ ମୁଁ କେବଳ କୃଷକଙ୍କ ଭଲ ଚାହୁଁଛି । କିନ୍ତୁ କୃଷକଙ୍କ କାନ୍ଧରେ ବନ୍ଧୁକ ରଖି ଶିକାର କରାଯାଉଛି । ଯଦି ଏବେବି କୃଷକ ଭାଇଙ୍କ ମନରେ କିଛି ଆଶଙ୍କା ରହିଛି, ତେବେ ସରକାର ମୁଣ୍ଡ ନୁଆଇଁ, ହାଇଯୋଡି ସବୁ ବିଷୟକୁ ନେଇ କଥା ହେବାକୁ ପ୍ରସ୍ତୁତ ରହିଛି ।