ପାଟନା,୩ ।୧୧: ବିହାର ବିଧାନସଭା ନିର୍ବାଚନ ଉପରେ ସାରା ଦେଶର ନଜର । ଗୋଟିଏ ପଟେ ମଙ୍ଗଳବାର ଏଠାରେ ଦ୍ୱିତୀୟ ପର୍ଯ୍ୟାୟ ମତଦାନ ଆରମ୍ଭ ହୋଇଥିବା ବେଳେ ଅନ୍ୟପଟେ ଭାରତୀୟ ଜନତା ପାର୍ଟି(ଭାଜପା)ର ଷ୍ଟାର ପ୍ରଚାରକ ନରେନ୍ଦ୍ର ମୋଦି ଓ କଂଗ୍ରେସର ଷ୍ଟାର ପ୍ରଚାରକ ରାହୁଲ ଗାନ୍ଧୀ ମଙ୍ଗଳବାର ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ରାଲିର ଆୟୋଜନ କରିଛନ୍ତି । ଏଥିରେ ସେମାନେ ନିଜ ନିଜ ସମର୍ଥକଙ୍କ ପାଇଁ ଭୋଟରଙ୍କ ନିକଟତର ହେବେ । ମୋଦି ଅରରିୟା ଓ ସହରସାରେ ଅନୁଷ୍ଠିତ ରାଲିରେ ଯୋଗ ଦେବାର କାର୍ଯ୍ୟକ୍ରମ ଥିବା ବେଳେ ରାହୁଲ କଟିହାର ଓ କିଶନଗଞ୍ଜରେ ଆୟୋଜିତ ରାଲିରେ ଯୋଗ ଦେବେ । ଏସବୁ ଜିଲାରେ ତୃତୀୟ ପର୍ଯ୍ୟାୟରେ ଅର୍ଥାତ୍ ନଭେମ୍ବର ୭ରେ ଭୋଟ ଗ୍ରହଣ କରାଯିବ । ମୋଦିଙ୍କର ଏହା ଶେଷ ରାଲି ବୋଲି କୁହାଯାଉଥିବା ବେଳେ ରାହୁଲ କିନ୍ତୁ ୪ ତାରିଖରେ ପୁଣି ଏକ ରାଲିରେ ଯୋଗ ଦେବେ ବୋଲି ଜଣାପଡିଛି ।
