ଟୋକିଓ, ୨୫।୫: ଟୋକିଓରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇଛି। ଆମେରିକା-ଭାରତ ସହଭାଗିତାକୁ ମଜଭୁତ କରିବାକୁ ଓ୍ବାଶିଂଟନ୍ ପ୍ରତିଶ୍ରୁତିବଦ୍ଧ ବୋଲି ବାଇଡେନ୍ କହିଥିଲେ। ଆମେ ଏକାଠି ଅନେକ କିଛି କରିପାରିବା ବୋଲି କହିଥିଲେ। ଭାରତର ସହ ୟୁଏସ୍ ଡେଭେଲପମେଣ୍ଟ ଫାଇନାନ୍ସ କୋଅପେରଶନ ଚୁକ୍ତି, ଟିକା ଉତ୍ପାଦନ, ସ୍ବଚ୍ଛ ଶକ୍ତି ପଦକ୍ଷେପ ପାଇଁ ସେ ଖୁସି ବ୍ୟକ୍ତ କରିଥିଲେ। ରୁଷିଆ-ୟୁକ୍ରେନ୍ ଯୁଦ୍ଧ ଯୋଗୁ ବିଶ୍ୱ ବ୍ୟବସ୍ଥା ଉପରେ ପଡ଼ିଥିବା ନକାରାତ୍ମକ ପ୍ରଭାବକୁ ପ୍ରତିହତ କରିବା ନିମନ୍ତେ ଭାରତ ଓ ଆମେରିକା ବିଚାରବିମର୍ଶ ଜାରି ରଖିବେ ବୋଲି ବାଇଡେନ୍ କହିଥିଲେ। ସେହିପରି ଭାରତ-ଆମେରିକା ମଧ୍ୟରେ ବିଶ୍ୱାସର ସହଭାଗିତା ଥିବା ପ୍ରଧାନମନ୍ତ୍ରୀ ମୋଦି କହିଥିଲେ। ଜନ ସମ୍ପର୍କ, ଦୃଢ଼ ଅର୍ଥନୈତିକ ସହଯୋଗ ଦୁଇ ଦେଶ ମଧ୍ୟରେ ଥିବା ସହଭାଗିତାକୁ ଦୃଢ଼ କରିଛି ବୋଲି ମୋଦି ପ୍ରକାଶ କରିଥିଲେ। ଏହି ଅବସରରେ ଭାରତ-ଆମେରିକା ମଧ୍ୟରେ ରଣନୈତିକ ସହଭାଗିତା ସୁଦୃଢ଼ କରିବା ନିମନ୍ତେ ଦୁଇ ଦେଶର ଜାତୀୟ ସୁରକ୍ଷା ପରିଷଦ ନେତୃତ୍ୱରେ ଗୁରୁତ୍ୱପୂର୍ଣ୍ଣ ଏବଂ ଅତ୍ୟାଧୁନିକ ପ୍ରଯୁକ୍ତିବିଦ୍ୟା କ୍ଷେତ୍ରରେ ମିଳିତ ଭାବେ ପଦକ୍ଷେପ ଆରମ୍ଭ ହୋଇଛି। ଏଥିସହ ଦ୍ୱିପାକ୍ଷିକ ସମ୍ପର୍କ ମଜଭୁତ ପାଇଁ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲ୍ବାନିଜ୍ଙ୍କ ସହ ମୋଦି ଆଲୋଚନା କରିଛନ୍ତି।
