ନୂଆଦିଲ୍ଲୀ,୧୦।୬: ମୋଦି ସରକାର ୩.୦ର ଶପଥ ଗ୍ରହଣ ସମାରୋହର ଗୋଟିଏ ଦିନ ପରେ ସୋମବାର ମନ୍ତ୍ରୀଙ୍କୁ ବିଭାଗ ବଣ୍ଟାଯାଇଛି। ମୋଦି ୨.୦ ପରି ୩.୦ରେ ମଧ୍ୟ ଭାଜପା ନିଜ ସହ ବଡ଼ ମନ୍ତ୍ରଣାଳୟ ରଖିଥିବାବେଳେ ଏନ୍ଡିଏ ସହଯୋଗୀଙ୍କୁ ଏମଏସଏମଇ, ବିମାନ ଚଳାଚଳ ମନ୍ତ୍ରଣାଳୟ, ହେଭି ଇଣ୍ଡଷ୍ଟ୍ରିଜ ଭଳି ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟ ଦିଆଯାଇଛି। କେଉଁ ଏନଡିଏ ସହଯୋଗୀ ଦଳଙ୍କୁ କେଉଁ ମନ୍ତ୍ରଣାଳୟକୁ ଦିଆଗଲା ଆସନ୍ତୁ ଜାଣିବା…
ଜିତନ ରାମ ମାନ୍ଝୀ: ବିହାର କୋଟାରୁ ମୋଦି ସରକାରରେ ଅନ୍ତର୍ଭୁକ୍ତ ହିନ୍ଦୁସ୍ତାନ ଆବାମ ମୋର୍ଚ୍ଚାର ମୁଖ୍ୟ ଜିତନ ରାମ ମାନ୍ଝୀଙ୍କୁ ଏମଏସଏମଇ ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି। ସେ ଦଳିତ ସମ୍ପ୍ରଦାୟରୁ ଆସି ବିହାରର ମୁଖ୍ୟମନ୍ତ୍ରୀ ମଧ୍ୟ ରହିଛନ୍ତି। ସେ ଗୟା ଲୋକ ସଭା ଆସନରୁ ବିଜୟୀ ହୋଇଛନ୍ତି।
ଲଲନ ସିଂ: ଜେଡିୟୁ ନେତା ତଥା ମୁଙ୍ଗେର ଏମ୍ପି ରାଜୀବ ରଞ୍ଜନ ସିଂ ଛଦ୍ମନାମ ଲଲନ ସିଂ ପଞ୍ଚାୟତ ରାଜ ମନ୍ତ୍ରୀ ତଥା ମତ୍ସ୍ୟ, ପଶୁପାଳନ ଏବଂ ଦୁଗ୍ଧ ମନ୍ତ୍ରଣାଳୟର ଦାୟିତ୍ୱ ପାଇଛନ୍ତି।
ଚିରାଗ ପାଶୱାନ: ଲୋକ ଜନଶକ୍ତି ପାର୍ଟି(ରାମ ବିଲାସ) ମୁଖ୍ୟ ଚିରାଗ ପାଶୱାନ ହାଜିପୁର ଆସନରୁ ଜିତିଛନ୍ତି। ଚିରାଗଙ୍କୁ ଦୁଇଟି ମନ୍ତ୍ରଣାଳୟ ଦିଆଯାଇଛି। ତାଙ୍କୁ କ୍ରୀଡ଼ା ମନ୍ତ୍ରଣାଳୟ ଏବଂ ଖାଦ୍ୟ ପ୍ରକ୍ରିୟାକରଣ ମନ୍ତ୍ରଣାଳୟ ଦାୟିତ୍ୱ ଦିଆଯାଇଛି।
ଏଚ୍ଡି କୁମାରସ୍ବାମୀ: କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏବଂ ଜେଡିଏସ ନେତା ଏଚ୍ଡି କୁମାରସ୍ବାମୀଙ୍କୁ ହେଭି ଇଣ୍ଡଷ୍ଟ୍ରିଜ ଏବଂ ଇସ୍ପାତ ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି। ସେ କର୍ନାଟକର ମାଣ୍ଡ୍ୟା ଲୋକ ସଭା ଆସନରୁ ଜିତିଛନ୍ତି।
ରାମ ମୋହନ ନାଇଡୁ: ଟିଡିପି ଏମ୍ପି ରାମ ମୋହନ ନାଇଡୁଙ୍କୁ ବିମାନ ଚଳାଚଳ ମନ୍ତ୍ରଣାଳୟ ଦିଆଯାଇଛି। ସେ ମୋଦି କ୍ୟାବିନେଟର ସବୁଠାରୁ କନିଷ୍ଠ ଏମ୍ପି।
ଜୟନ୍ତ ଚୌଧୁରୀ: ଆରଏଲଡି ମୁଖ୍ୟ ଜୟନ୍ତ ଚୌଧୁରୀ ଦକ୍ଷତା ବିକାଶ ତଥା ଉଦ୍ୟୋଗ ମନ୍ତ୍ରଣାଳୟର ରାଜ୍ୟ ମନ୍ତ୍ରୀ ଏବଂ ଶିକ୍ଷା ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଦାୟିତ୍ୱ ଦିଆଯାଇଛି।
ଯାଧବ ପ୍ରତାପରାଓ ଗଣପତରାଓ: ଶିବସେନା ଏମ୍ପି ଯାଧବଙ୍କୁ ଆୟୁଷ ମନ୍ତ୍ରଣାଳୟର ରାଜ୍ୟ ମନ୍ତ୍ରୀ ତଥା ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟର ରାଜ୍ୟ ମନ୍ତ୍ରୀ ଦାୟିତ୍ୱ ଦିଆଯାଇଛି।
ରାମଦାସ ଅଠାୱାଲେ: ରାମଦାସଙ୍କୁ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଭାବେ ଦାୟିତ୍ୱ ମିଳିଛି।
ଅନୁପ୍ରିୟା ପଟେଲ: ଆପନା ଦଳ (ଏସ)ର ଏମ୍ପି ଅନୁପ୍ରିୟା ପଟେଲଙ୍କୁ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ତଥା ରାସାୟନିକ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଦାୟିତ୍ୱ ଦିଆଯାଇଛି।
ରାମନାଥ ଠାକୁର: ଜେଡିୟୁ ନେତା ରାମନାଥ ଠାକୁରଙ୍କୁ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଦାୟିତ୍ୱ ଦିଆଯାଇଛି।
ଚନ୍ଦ୍ରଶେଖର ପେମାସାନି: ଆନ୍ଧ୍ରପ୍ରଦେଶର ଗୁଣ୍ଟୁର ଲୋକ ସଭା ଆସନରୁ ଏମ୍ପି ଚନ୍ଦ୍ରଶେଖରଙ୍କୁ ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ତଥା ଯୋଗାଯୋଗ ମନ୍ତ୍ରଣାଳୟର ରାଜ୍ୟ ମନ୍ତ୍ରୀ ଦାୟିତ୍ୱ ଦିଆଯାଇଛି।