ନୂଆଦିଲ୍ଲୀ,୬।୧୧ : ରାଜସ୍ଥାନର ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟ ରବିବାର ହିମାଚଳ ପ୍ରଦେଶର ନିର୍ବାଚନ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ମୋଦି ସରକାର ବ୍ୟାଙ୍କ, ବିମାନବନ୍ଦର ଏବଂ ବୀମା କମ୍ପାନୀ ସମେତ ଦେଶର ସବୁକିଛି ବିକ୍ରି କରିଛନ୍ତି। ଭାଜପା ବିରୋଧୀ ଦଳ ଭାବେ ପୂର୍ବରୁ ଏନେଇ ଚିତ୍କାର କରୁଥିଲା।
ସ୍ବଦେଶୀ ଜାଗରଣ ମଞ୍ଚ କହୁଥିଲା ଯେ ଆମେ ଦେଶକୁ ବିକ୍ରୟ କରିବାକୁ ଦେବୁ ନାହିଁ। ମାତ୍ର ମୋଦି ସରକାର ବର୍ତ୍ତମାନ କିଛି ବିକ୍ରି କରିଛନ୍ତି। ହୋଟେଲ ଏବଂ ରାସ୍ତାକୁ ଅଳ୍ପ କିଛି ଲୋକଙ୍କୁ ହାତରେ ବିକ୍ରି ହୋଇଛି। ପାଲାମପୁରରେ କଂଗ୍ରେସ ପ୍ରାର୍ଥୀଙ୍କ ସପକ୍ଷରେ ଆୟୋଜିତ ଏକ ସାଧାରଣ ସଭାରେ ଯୋଗଦେଇ ପାଇଲଟ ଭାଜପାକୁ କଡ଼ା ସମାଲୋଚନା କରିଛନ୍ତି।
ସଚିନ ପାଇଲଟ କହିଛନ୍ତି ଯେ ଯେତେବେଳେ ନିର୍ବାଚନ ଆସୁଛି, ଭାଜପା ହିନ୍ଦୁ-ମୁସଲମାନ ଏବଂ ମନ୍ଦିର-ମସଜିଦ ବିଷୟରେ କହି ଲୋକଙ୍କୁ ବିଭ୍ରାନ୍ତ କରୁଛି। ସୂଚନା ଅଧିକାର ଏବଂ ଶିକ୍ଷା ଅଧିକାର ହେଉଛି କଂଗ୍ରେସ ନେତୃତ୍ୱାଧୀନ ୟୁପିଏ ଶାସନର ଉପହାର।
ଲୋକଙ୍କୁ ସୁରକ୍ଷା ଦେବା ପାଇଁ ଖାଦ୍ୟ ନିରାପତ୍ତା ଅଧିକାର ସୃଷ୍ଟି କରାଯାଇଥିଲା। ଜନସାଧାରଣଙ୍କ ପକେଟକୁ କିପରି ଟଙ୍କା ଆସିବ ସେନେଇ କଂଗ୍ରେସ ଏକ ଆଇନ ପ୍ରସ୍ତୁତ କରିଥିଲା। ପାଇଲଟ କହିଛନ୍ତି ଯେ ଯେତେବେଳେ ଭାଜପା ବିରୋଧୀ ଦଳ ଥିଲା ସେତେବେଳେ ଜିଏସଟିକୁ ବିରୋଧ କରୁଥିଲା, ଆଧାର କାର୍ଡକୁ ବିରୋଧ କରୁଥିଲା। ଯେତେବେଳେ ବିରୋଧୀ ଥିଲା, ଭାଜପା ଏଫଡିଆଇକୁ ବିରୋଧ କରୁଥିଲା। ମେକ ଇଣ୍ଡିଆ, ଫିଟ ଇଣ୍ଡିଆ ଏବଂ ଭାଗୋ ଇଣ୍ଡିଆ, ଡିଜିଟାଲ ଇଣ୍ଡିଆ ସ୍ବଚ୍ଛ ଭାରତ ଭଳି ଭାଜପା ୧୭ ଟି ସ୍ଲୋଗାନ ଦେଇଛି। ସେଥିମଧ୍ୟରୁ କେତେ ସଫଳ ହୋଇଛି ତାହାର ହିସାବ ଭାଜପା ଦେଉ ବୋଲି ସେ କହିଛନ୍ତି।
