ନୂଆଦିଲ୍ଲୀ,୧।୫: ଭାରତରେ କରୋନା ମହାମାରୀ ଯୋଗୁ ପ୍ରତିଦିନ ମୃତ୍ୟୁ ସଂଖ୍ୟା ସହିତ ସମତାଳରେ ନୂଆ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଛି। ଫଳରେ ଦେଶର ବିଭିନ୍ନ ଶ୍ମଶାନରେ ଚିତା ଲିଭିବାର ନାଁ ଧରୁନି। ଦେଶରେ ଏଭଳି ସ୍ଥିତି ସୃଷ୍ଟି ହେବ ବୋଲି ମାର୍ଚ୍ଚ ଆରମ୍ଭରେ ବୈଜ୍ଞାନିକମାନଙ୍କ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। ତେବେ ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଅଣଦେଖା କରିଥିବା ଗଣମାଧ୍ୟମ ସଂସ୍ଥା ରଏଟରରେ ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। ଏଭଳି ରିପୋର୍ଟ ୟୁଏସ୍ ନ୍ୟୁଜ୍ ସହିତ ଅନ୍ୟ ଖ୍ୟାତି ସମ୍ପନ୍ନ ଗଣମାଧ୍ୟମ ସଂସ୍ଥା ପକ୍ଷରୁ ମଧ୍ୟ ପ୍ରକାଶ ପାଇଛି। ଇଣ୍ଡିଆନ୍ ସାର୍ସ-କୋଭ୍-୨ ଜେନେଟିକ୍ସ୍ କନସୋର୍ଟିୟମ (ଇନସାକୋଗ୍) ପକ୍ଷରୁ ଦେଶରେ ଦ୍ୱିତୀୟ ଲହରର ଭୟଙ୍କର ରୂପ ସମ୍ପର୍କରେ ରିପୋର୍ଟ ପ୍ରକାଶ କରାଯାଇଥିଲା। ତେବେ ଏହାକୁ ଅଣଦେଖା କରି ସରକାର କୁମ୍ଭମେଳା ସମେତ ଅନ୍ୟ ଧାର୍ମିକ ଉତ୍ସବ ପାଳନ କରିବାକୁ ଅନୁମତି ଦେବା ସହିତ ନିର୍ବାଚନ ରାଲିମାନ କରିଥିଲେ। ସେହିପରି କୃଷି ଆଇନ ବିରୋଧରେ ପ୍ରଦର୍ଶନ ମଧ୍ୟ ଜାରି ରହିଥିଲା। ଅପରପକ୍ଷରେ ଲୋକେ କରୋନାର ଭୟାବହତା ଭୁଲି ମାସ୍କ୍ ପିନ୍ଧିବା ଏବଂ ସାମାଜିକ ଦୂରତା ବଜାୟ ରଖିବା ପ୍ରତି ସଚେତନ ହୋଇ ନ ଥିଲେ। ଏନେଇ କେନ୍ଦ୍ର ତଥା ବିଭିନ୍ନ ରାଜ୍ୟ ସରକାରଙ୍କ ପକ୍ଷରୁ କୌଣସି କଡ଼ା ପଦକ୍ଷେପ ମଧ୍ୟ ଗ୍ରହଣ କରାଯାଇ ନ ଥିଲା। ଏହାର ଫଳ ସ୍ବରୂପ କରୋନା ମହାମାରୀ ଭାରତରେ ତାଣ୍ଡବ ରଚିଥିବା ରଏଟର କହିଛି।