ନୂଆଦିଲ୍ଲୀ, ୧୪।୯ : କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ଉପରେ ଏକ ବଡ ଅଭିଯୋଗ ଆଣିଛନ୍ତି। ଏକ ଇଂଲିଶ୍ ଖବର କାଗଜର ସମ୍ପାଦକୀୟ ପୃଷ୍ଠାରେ ପ୍ରକାଶିତ ହୋଇଥିବା ପ୍ରବନ୍ଧରେ ସେ ଅଭିଯୋଗ କରିଛନ୍ତି ଯେ ନିର୍ବାଚନ ଫାଇଦା ପାଇଁ ମୋଦି ସରକାର ଭୋଟରଙ୍କୁ ଧ୍ରୁବୀକରଣ କରୁଛନ୍ତି ଏବଂ ସାମାଜିକ ସ୍ଥିତିକୁ ଭଙ୍ଗ କରୁଛନ୍ତି।
ଦେଶର କ୍ଷମତା ଗତ ଆଠ ବର୍ଷ ମଧ୍ୟରେ ହାତଗଣତି ରାଜନେତା ଏବଂ ବ୍ୟବସାୟୀଙ୍କ ହାତରେ କେନ୍ଦ୍ରୀଭୂତ ହୋଇ ରହିଛି। ଏହା ଭାରତର ଗଣତନ୍ତ୍ରକୁ ଦୁର୍ବଳ କରୁଛି। ସାମ୍ବିଧାନିକ ମୂଲ୍ୟବୋଧ ଏବଂ ନୀତି ଉପରେ ଭାଜପା ସରକାରଙ୍କ ପକ୍ଷରୁ ଆକ୍ରମଣ କରାଯାଉଥିବା ସେ ଅଭିଯୋଗ କରିଛନ୍ତି।
ଦେଶର ସ୍ବାଧୀନ କର୍ତ୍ତୃପକ୍ଷଙ୍କୁ କାର୍ଯ୍ୟପାଳିକା ଉପକରଣ କରାଯାଇଛି। ପକ୍ଷପାତପୂର୍ଣ୍ଣ ନୀତି ଗ୍ରହଣ ଦ୍ୱାରା ଦେଶରେ ଘୃଣ୍ୟ ରାଜନୀତିକୁ ପ୍ରଶୟ ଦିଆଯାଉଛି। ନିର୍ବାଚନ ବଣ୍ଡ ଏବଂ କ୍ରୋନିଜିମ ଦ୍ୱାରା ସୃଷ୍ଟି ହୋଇଥିବା ଅର୍ଥ ଶକ୍ତି ଦ୍ୱାରା ନିର୍ବାଚନ ଫଳାଫଳକୁ ବିକୃତ କରାଯାଉଛି। ସରକାରୀ ଏଜେନ୍ସିଗୁଡିକ ବର୍ତ୍ତମାନର ସରକାରଙ୍କୁ ବିରୋଧ କରୁଥିବା ଦଳ ଉପରେ ଚଢ଼ାଉ କରୁଛନ୍ତି ବୋଲି ସୋନିଆ କହିଛନ୍ତି।
