ଅମରାବତୀ,୧୭ା୧୧: ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ଭଳି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ସ୍ମୃତିଶକ୍ତି ହରାଇବସିଲେଣି ବୋଲି କଂଗ୍ରେସ ନେତା ରାହୁଲ ଗାନ୍ଧୀ ଶନିବାର ମହାରାଷ୍ଟ୍ରରେ ଏକ ନିର୍ବାଚନୀ ସଭାକୁ ଉଦ୍ବୋଧନ ଦେଲାବେଳେ କହିଛନ୍ତି। କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରା ଯେଉଁ ପ୍ରସଙ୍ଗ ଉଠାଉଛନ୍ତି, ପ୍ରଧାନମନ୍ତ୍ରୀ ଆଜିକାଲି ସେହି ପ୍ରସଙ୍ଗ ଉପରେ କହୁଛନ୍ତି। ଜାତି ଜନଗଣନା ହେବା ଆବଶ୍ୟକ ଏବଂ ସଂରକ୍ଷଣରେ ୫୦ ପ୍ରତିଶତ ସୀମା ଉଠିଯିବା ଦରକାର ବୋଲି ରାହୁଲ ଲୋକ ସଭାରେ ପ୍ରଧାନମନ୍ତ୍ରୀଙ୍କୁ କହିଥିଲେ। ଅଥଚ ମୁଁ ସଂରକ୍ଷଣର ବିରୋଧୀ ବୋଲି ମୋଦି ଏବେ ନିର୍ବାଚନ ରାଲିଗୁଡ଼ିକରେ କହୁଛନ୍ତି। ତେଣୁ ସେ ସ୍ମୃତିଶକ୍ତି ହରାଇବା ସମସ୍ୟାର ସମ୍ମୁଖୀନ ବୋଲି ରାହୁଲ ଅଭିଯୋଗ କରିଛନ୍ତି।
ସମ୍ବିଧାନକୁ କଂଗ୍ରେସ ଦେଶର ଡିଏନ୍ଏ ବିବେଚନା କରୁଥିବାବେଳେ ଶାସକ ଭାଜପା ଏବଂ ଆର୍ଏସ୍ଏସ୍ ଏହାକୁ ଫାଙ୍କା ପୁସ୍ତକ କହୁଛନ୍ତି। ମହାରାଷ୍ଟ୍ର ଘଟଣା ଭଳି ବିଧାୟକଙ୍କୁ କିଣାଯାଇ ରାଜ୍ୟ ସରକାରଙ୍କୁ ଭାଙ୍ଗିଦିଆଯାଇପାରେ ବୋଲି ସମ୍ବିଧାନର କେଉଁଠି ଲେଖା ନ ଥିବା କଂଗ୍ରେସ ନେତା କହିଛନ୍ତି। ରାହୁଲ ପ୍ରଚାର ରାଲିରେ ସମ୍ବିଧାନ ନାମରେ ଏକ ଫାଙ୍କା ପୁସ୍ତକ ଦେଖାଉଛନ୍ତି ବୋଲି ମୋଦି ଏବଂ ଭାଜପା ଅଭିଯୋଗ କରିଥିବାରୁ ଲୋକ ସଭାର ବିରୋଧୀ ଦଳ ନେତା ତାହାର ଜବାବ ଦେଇଛନ୍ତି।
