ନୂଆଦିଲ୍ଲୀ,୨୪।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ‘ସମବାୟ କ୍ଷେତ୍ରରେ ବିଶ୍ୱର ସର୍ବବୃହତ ଶସ୍ୟ ସଂରକ୍ଷଣ’ ପାଇଲଟ ପ୍ରକଳ୍ପର ଉଦଘାଟନ କରିଛନ୍ତି। ସୂଚନାଯୋଗ୍ୟ, ଏହା ୧୧ଟି ରାଜ୍ୟର ୧୧ ଟି ପ୍ରାଥମିକ କୃଷି କ୍ରେଡିଟ ସୋସାଇଟି (ପିଏସିଏସ) ରେ ପରିଚାଳିତ ହେଉଛି। ଇତିମଧ୍ୟରେ ପ୍ରଧାନମନ୍ତ୍ରୀ ମୋଦି ସମବାୟ କ୍ଷେତ୍ରର ଅନ୍ୟାନ୍ୟ ଯୋଜନାର ଭିତ୍ତି ପ୍ରସ୍ତର ସ୍ଥାପନ କରିଥିଲେ। ସୂଚନାଯୋଗ୍ୟ, ବିଶ୍ୱର ସର୍ବ ବୃହତ ଧାନ ସଂରକ୍ଷଣ ଯୋଜନା ଅଧୀନରେ ୧୧ ଟି ରାଜ୍ୟର ୧୧ଟି ପ୍ୟାକ୍ସରେ ବିଶ୍ୱର ସବୁଠାରୁ ବଡ ଗୋଦାମ ଗୃହ ଉଦଘାଟନ କରାଯାଇଛି ଏବଂ ଗୋଦାମର ମୂଳଦୁଆ ୫୦୦ ପ୍ୟାକରେ ରଖାଯାଇଛି।
ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ କହିଛନ୍ତି ଯେ ‘ବିକଶିତ ଭାରତ’ର ଅମୃତଯାତ୍ରାରେ ଆଜି ଭାରତ ମଣ୍ଡପମ ଆଉ ଏକ ପ୍ରମୁଖ ସଫଳତାର ସାକ୍ଷୀ ରହିଛି। ସହଯୋଗ ମାଧ୍ୟମରେ ଦେଶ ସମୃଦ୍ଧତା ପାଇଁ ନେଇଥିବା ସଂକଳ୍ପକୁ ହୃଦୟଙ୍ଗମ କରିବା ଦିଗରେ ଆଜି ଆମେ ଆଗକୁ ବଢୁଛୁ। ସେଆହୁରି ମଧ୍ୟ କହିଛନ୍ତି, କୃଷି ଏବଂ ଚାଷର ମୂଳଦୁଆକୁ ଦୃଢ କରିବାରେ ସହଯୋଗର ଶକ୍ତି ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ଏହି ଭାବନା ସହ ଆମେ ଏକ ପୃଥକ ସହଯୋଗ ମନ୍ତ୍ରଣାଳୟ ଗଠନ କରିଛୁ। ଆଜି ଆମେ ଆମର କୃଷକମାନଙ୍କ ପାଇଁ ବିଶ୍ୱର ସର୍ବ ବୃହତ ସଂରକ୍ଷଣ ଯୋଜନା ଆରମ୍ଭ କରିଛୁ।