ନୂଆଦିଲ୍ଲୀ,୪।୩: ଯୁଦ୍ଧ ପ୍ରଭାବିତ ୟୁକ୍ରେନରେ ଫସିଥିବା ଛାତ୍ରୀଛାତ୍ରଙ୍କୁ ଉଦ୍ଧାର କାର୍ଯ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଯୋଗଦାନ ଉପରେ ଭାରତୀୟ ବାୟୁ ସେନା (ଆଇଏଏଫ୍) ବିମାନ ମଧ୍ୟରେ ଏକ ଛୋଟ ଭାଷଣ ଦେଇଥିଲେ ଜୁନିୟର କେନ୍ଦ୍ର ମନ୍ତ୍ରୀ। ଘଟଣାର ଭିଡିଓ ଭାଇରାଲ ହେବା ପରେ କେନ୍ଦ୍ର ମନ୍ତ୍ରୀଙ୍କ କାର୍ଯ୍ୟକୁ ପ୍ରବଳ ସମାଲୋଚନା କରାଯାଉଛି।
ୟୁକ୍ରେନର ପଡ଼ୋଶୀ ଦେଶରୁ ଛାତ୍ରୀଛାତ୍ରଙ୍କୁ ଉଦ୍ଧାର କରି ଦିଲ୍ଲୀ ନିକଟସ୍ଥ ହିଣ୍ଡନ ଏୟାର ଫୋର୍ସ ଷ୍ଟେଶନରେ ପହଞ୍ଚିଥିଲା ଆଇଏଏଫ୍ର ହେଭି-ଲିଫ୍ଟ କାର୍ଗୋ ବିମାନ। ଲାଣ୍ଡିଂ ପରେ ବିମାନ ମଧ୍ୟକୁ ପଶି ଆସିଥିଲେ ଜୁନିୟର ପ୍ରତିରକ୍ଷା ମନ୍ତ୍ରୀ ଅଜୟ ଭଟ୍ଟ। ବ୍ଲୁ ଜ୍ୟାକେଟ ଓ ଆଇଏଏଫ୍ ଅଧିକାରୀଙ୍କ ଭଳି କ୍ୟାପ ପିନ୍ଧି କେନ୍ଦ୍ର ମନ୍ତ୍ରୀ ଛାତ୍ରୀଛାତ୍ରଙ୍କୁ କହିଥିଲେ, “ଚିନ୍ତା କରିବାର କିଛି ନାହିଁ। ମୋଦିଜୀଙ୍କ ଯୋଗୁ ତୁମର ଜୀବନ ରକ୍ଷା ପାରିଛି। ସବୁ କିଛି ଠିକ୍ ହୋଇଯିବ। ଭାରତ ମାତା କି ଜୟ। ମାନନୀୟ ମୋଦି ଜୀ ଜିନ୍ଦାବାଦ”।
କେନ୍ଦ୍ରମନ୍ତ୍ରୀଙ୍କ ସହ ଛାତ୍ରୀଛାତ୍ରମାନେ ମଧ୍ୟ ‘ଭାରତ ମାତା କି ଜୟ’ କହିଥିଲେ। କିନ୍ତୁ ସେ ଯେତେବେଳେ ‘ମାନନୀୟ ମୋଦି ଜୀ ଜିନ୍ଦାବାଦ’ କହିଥିଲେ, ଛାତ୍ରୀଛାତ୍ର କୌଣସି ପ୍ରତିକ୍ରିୟା ଦେଇ ନ ଥିଲେ। ଏହି ଘଟଣାର ଭିଡିଓ ଭାଇରାଲ ହୋଇଯାଇଛି। ରାଜନୈତିକ ବାର୍ତ୍ତା ପାଇଁ ସାମରିକ ଫ୍ଲାଟଫର୍ମର ବ୍ୟବହାରକୁ ସୋସିଆଲ ମିଡିଆରେ ଖୁବ୍ ସମାଲୋଚନା କରାଯାଇଛି।