ଆଲିଗଡ଼,୧୪।୯: ଡବଲ ଇଞ୍ଜିନ ସରକାରଙ୍କ ଡବଲ ଫାଇଦା ପାଇବାରେ ଉତ୍ତରପ୍ରଦେଶ ଏକ ଜ୍ୱଳନ୍ତ ଉଦାହରଣ। ଦିନେ ଦେଶର ଉନ୍ନତିରେ ବାଧା ଦେଉଥିଲା ଉତ୍ତରପ୍ରଦେଶ। ଆଉ ଏବେ ଦେଶର ଉନ୍ନତିରେ ଏହି ରାଜ୍ୟ ନେତୃତ୍ୱ ନେଉଛି। ଆଲିଗଡ଼ରେ ରାଜା ମହେନ୍ଦ୍ର ପ୍ରତାପ ସିଂହ ରାଜ୍ୟ ବିଶ୍ୱବିଦ୍ୟାଳୟର ଉଦ୍ଘାଟନୀ ଅବସରରେ ପ୍ରଧାନମନ୍ତ୍ରୀ ମୋଦି ଏଭଳି କହି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ପ୍ରଶଂସା କରିଛନ୍ତି।
ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କୁ ମନେ ପକାଇ ମୋଦି କହିଛନ୍ତି, ଆଲିଗଡ଼ ପାଇଁ ଏହା ଏକ ବଡ଼ ଦିନ। ଅପରପକ୍ଷରେ ଜଣେ ସ୍ବାଧୀନତା ସଂଗ୍ରାମୀ, ଶିକ୍ଷାବିତ୍ ତଥା ସମାଜ ସଂସ୍କାରକ ଭାବେ ରାଜା ମହେନ୍ଦ୍ର ପ୍ରତାପ ସିଂହଙ୍କ ସ୍ମୃତି ତଥା ସମ୍ମାନାର୍ଥେ ଉତ୍ତରପ୍ରଦେଶ ସରକାର ଏହି ବିଶ୍ୱବିଦ୍ୟାଳୟ ପ୍ରତିଷ୍ଠା କରିଛନ୍ତି।
ଦେଶ ବିଦେଶର ଛୋଟ ବଡ଼ ନିବେଶକଙ୍କ ପାଇଁ ଉତ୍ତରପ୍ରଦେଶ ଅନୂକୁଳ ପରିବେଶ ସୃଷ୍ଟି କରିଛି। ଏହାହିଁ ବିକାଶର ପରିଚୟ। ଅଲିଗଡ଼ କାରଣରୁ ପ୍ରତିରକ୍ଷା କ୍ଷେତ୍ରରେ ଭାରତର ଚିତ୍ର ବଦଳିବ। ୨୦୧୮ରେ ଏ ନେଇ ଘୋଷଣା କରାଯାଇଥିଲା। ଆଲିଗଡ଼, ଆଗ୍ରା, କାନପୁର, ଚିତ୍ରକୁଟ, ଝାନ୍ସି ଓ ଲକ୍ଷ୍ନୋ ଠାରେ ଡିଫେନ୍ସ କରିଡର ନିର୍ମାଣ କରାଯିବ। ଆଲିଗଡ଼ରେ ୧୨ଟି ପ୍ରତିରକ୍ଷା ଏକକ ପ୍ରତିଷ୍ଠା କାର୍ଯ୍ୟ ଚାଲିଥିବା ମୋଦି କହିଛନ୍ତି। ଏହା ଦେଶର ପ୍ରତିରକ୍ଷା କ୍ଷେତ୍ରରେ ସାହାଯ୍ୟ କରିବ।