ନୂଆଦିଲ୍ଲୀ,୨୨।୭: ଚାଇନା ସେନା ଆକ୍ରମଣରେ ଭାରତର ୨୦ ଯବାନ ଶହୀଦ ହେବା ପରେ ଭାରତରେ ଚାଇନା ସାମଗ୍ରୀ ବର୍ଜନ ଅଭିଯାନ ଜୋର୍ଦାର ହୋଇଛି। ଚଳିତ ବର୍ଷ ଚାଇନା ରାଖୀକୁ ଟକ୍କରଦେବା ଲାଗି ବଜାରକୁ ମୋଦି ରାଖୀ ଆସିଛି। ଏହାବାଦ ବଜାରରେ ମୋଦି ରାଖୀ ବ୍ୟତୀତ ମଧୁବନୀ, ମାଟି, ବୃକ୍ଷ ଏବଂ ଶସ୍ୟର ପେଣ୍ଟିଂ ଯୁକ୍ତ ରାଖୀ ଉପଲବ୍ଧ ହେବ। ଏହି ରାଖୀକୁ ଲୋକଙ୍କ ପକ୍ଷରୁ ଜୋର୍ଦାର ରେସ୍ପନ୍ସ ମିଳୁଛି ବୋଲି ଭାରତୀୟ ବ୍ୟବସାୟୀ ମହାସଂଘ ପକ୍ଷରୁ ସୂଚନା ରହିଛି। ଚାଇନା ସାମଗ୍ରୀ ବର୍ଜନକୁ ଲୋକମାନେ ସମର୍ଥନ ଦେବା ସହ ଘରୋଇ ସାମଗ୍ରୀ କ୍ରୟ ଉପରେ ଏବେ ଗୁରୁତ୍ୱ ଦେଉଛନ୍ତି। ଫଳରେ ଭାରତ ବଜାରରେ ପ୍ରସ୍ତୁତ ହେଉଥିବା କିମ୍ବା ଭାରତୀୟ ଥିମ ରାଖୀଗୁଡ଼ିକର ଚାହିଦା ରହୁଛି। ରାଖୀଗୁଡିକରେ ଭାରତୀୟ ସାମଗ୍ରୀର ବ୍ୟବହାର ମଧ୍ୟ ବଢୁଛି। ଚାଇନା ରାଖୀ ସାଧାରଣତଃ ଫ୍ୟାନ୍ସି ହୋଇଥାଏ। ହେଲେ ଭାରତରେ ପ୍ରସ୍ତୁତ ହେଉଥିବା ରାଖୀ ଏହାଠାରୁ ଭିନ୍ନ ହେବ ବୋଲି କୁହାଯାଇଛି। ସଂଘ ପକ୍ଷରୁ ମିଳିଥିବା ସୂଚନା ମୁତାବକ ଦେଶରେ ୫୦ କୋଟିରୁ ଅଧିକ ସଂଖ୍ୟକ ରାଖୀ କ୍ରୟ କରାଯାଇଥାଏ। ଚାଇନା ଗତ କିଛି ବର୍ଷ ମଧ୍ୟରେ ଭାରତକୁ ପ୍ରାୟ ୪ ହଜାର କୋଟି ଟଙ୍କାର ରାଖୀ କିମ୍ବା ରାଖୀ ସମ୍ବନ୍ଧୀୟ ସାମଗ୍ରୀ ପଠାଉଛି। ଭାରତୀୟ ସାମଗ୍ରୀରେ ପ୍ରସ୍ତୁତ ରାଖୀ କ୍ରୟକରି ଗ୍ରାହକ ଚାଇନାକୁ ୪ ହଜାର କୋଟି ଟଙ୍କାର ଝଟକା ଦିଅନ୍ତୁ ବୋଲି ଭାରତୀୟ ବ୍ୟବସାୟୀ ମହାସଂଘର ମହାସଚିବ ପ୍ରବୀଣ ଖଣ୍ଡେଲଓ୍ବାଲ ସୂଚନା ଦେଇଛନ୍ତି।