ମୁମ୍ବାଇ,୨୬।୫: ଶିବସେନା (ୟୁବିଟି) ନେତା ସଞ୍ଜୟ ରାଉତ ରବିବାର ଦାବି କରିଛନ୍ତି ଯେ ଲୋକ ସଭା ନିର୍ବାଚନରେ ନିତିନ ଗଡକରୀଙ୍କ ପରାଜୟ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ କାର୍ଯ୍ୟ କରିଛନ୍ତି। ରାଉତ କହିଛନ୍ତି ଯେ ଫଡନାଭିସ ଇଚ୍ଛା ନକରି ଗଡକରୀଙ୍କ ପାଇଁ ପ୍ରଚାର କରିଥିଲେ। ସୂଚନାଯୋଗ୍ୟ, ନୀତିନ ଗଡକରୀ ନାଗପୁରରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି ଏବଂ ଏହା ହେଉଛି ଉଭୟ ଭାଜପା ନେତା (ଫଡନାଭିସ, ଗଡକରୀ) ଙ୍କ ସହର।
ଶିବସେନା (ୟୁବିଟି) ମୁଖପାତ୍ର ସାମାନାର ଏକ ଆର୍ଟିକିଲରେ ସଞ୍ଜୟ ରାଉତ ଲେଖିଛନ୍ତି, ପ୍ରଧାନମନ୍ତ୍ରୀ ମୋଦି, ଶାହ ଏବଂ ଫଡନାଭିସ ନାଗପୁରରେ ନୀତିନ ଗଡକରୀଙ୍କ ପରାଜୟ ପାଇଁ କାମ କରିଥିଲେ।
ଶିବସେନା (ୟୁବିଟି) ନେତା ଏହା ମଧ୍ୟ କହିଛନ୍ତି ଯେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ପ୍ରତ୍ୟେକ ନିର୍ବାଚନମଣ୍ଡଳୀରେ ୨୫-୩୦ଲକ୍ଷ ଟଙ୍କା ବଣ୍ଟନ କରିଛନ୍ତି। ତାଙ୍କ ଯନ୍ତ୍ରପାତି ଅଜିତ ପାୱାରଙ୍କ ନେତୃତ୍ୱାଧୀନ ଏନସିପି ପ୍ରାର୍ଥୀଙ୍କୁ ପରାସ୍ତ କରିବାକୁ କାର୍ଯ୍ୟ କରିଥିଲା। ଯୋଗୀ ଆଦିତ୍ୟନାଥଙ୍କୁ ଲକ୍ଷ୍ୟ କରି ସେ କହିଛନ୍ତି ଯେ ଯଦି ଲୋକ ସଭା ନିର୍ବାଚନ ପରେ ମୋଦି-ଶାହା କ୍ଷମତାକୁ ଫେରିବେ ତେବେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ବଦଳିବେ।