ନୂଆଦିଲ୍ଲୀ,୨୮।୧୧: ସଂସଦର ଶୀତ ଅଧିବେଶନ ସୋମବାର ଠାରୁ ଆରମ୍ଭ ହେବାକୁ ଯାଉଛି। ଗୃହରେ ସରକାରଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରିବାକୁ ସୋମବାର କଂଗ୍ରେସ ବିରୋଧୀ ଦଳର ଏକ ବୈଠକ ଡାକିଛି। କିନ୍ତୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମସି) ଏହି ବୈଠକରେ ଯୋଗଦେବେ ନାହିଁ।
ରବିବାର ଟିଏମସିର ବରିଷ୍ଠ ନେତା ସୁଦୀପ ବନ୍ଦୋପାଧ୍ୟାୟ ସ୍ପଷ୍ଟ କରିଛନ୍ତି ଯେ ମଲ୍ଲିକାର୍ଜୁନ ଖଡଗେଙ୍କ ଦ୍ୱାରା ଡକାଯାଇଥିବା ବିରୋଧୀ ଦଳର ବୈଠକରେ ତାଙ୍କ ଦଳ ଯୋଗଦେବ ନାହିଁ। ଏଭଳି ପଦକ୍ଷେପ ଗ୍ରହଣ କରି ତୃଣମୂଳ ୨୦୨୪ରେ ‘ମୋଦି ବନାମ ଦିଦି’ ଶଙ୍ଖନାଦ କରିଥିବା ରାଜନୈତିକ ମହଲରେ ଚର୍ଚ୍ଚା ହେଉଛି। ଏହା ପୂର୍ବରୁ ‘ସୋନିଆ ଗାନ୍ଧୀ ବନାମ ଦିଦି’ ଜରୁରୀ ହୋଇ ପଡ଼ିଥିବା ରାଜନୈତିକ ସମୀକ୍ଷକଙ୍କ ପକ୍ଷରୁ କୁହାଯାଉଛି।
କଂଗ୍ରେସରୁ କେତେକ ସଦସ୍ୟ ତୃଣମୂଳରେ ଯୋଗଦେଇଥିବାରୁ ଏହାକୁ ନେଇ କଂଗ୍ରେସ କେତେକ ନେତାଙ୍କ ମଧ୍ୟରେ ଟିଏମସି ବିରୋଧରେ ତୀବ୍ର ଅସନ୍ତୋଷ ରହିଛି। ପଶ୍ଚିମବଙ୍ଗର କଂଗ୍ରେସର ଅଧିର ରଞ୍ଜନ ଚୌଧୁରୀ ମେଘାଳୟରେ କଂଗ୍ରେସ ସଦସ୍ୟଙ୍କ ଦଳବଦଳ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ସୋନିଆ ଗାନ୍ଧୀଙ୍କ ଦ୍ୱାରା ଡକାଯାଇଥିବା କଂଗ୍ରେସ ନେତାଙ୍କ ବୈଠକରେ ମଧ୍ୟ ଏହି ପ୍ରସଙ୍ଗ ଉଠିଛି।
କୁହାଯାଉଛି ଯେ ଏହି ବୈଠକରେ ଅଧିର ରଞ୍ଜନଙ୍କ ସମେତ କିଛି କଂଗ୍ରେସ ନେତା ଶୀତକାଳୀନ ଅଧିବେଶନରେ ଟିଏମସିକୁ ସାଙ୍ଗରେ ନ ନେବାକୁ ନିବେଦନ କରିଛନ୍ତି। କିନ୍ତୁ ସୋନିଆ ଗାନ୍ଧୀ କହିଛନ୍ତି ଯେ ଦଳୀୟ ବ୍ୟାପାର ଭିନ୍ନ କଥା। ସଂସଦରେ ଜନସାଧାରଣଙ୍କ ହିତ ଏବଂ ଦେଶର ହିତ ଗୁରୁତ୍ୱପୂର୍ଣ୍ଣ।
ତେବେ ବର୍ତ୍ତମାନ ତୃଣମୂଳ କଂଗ୍ରେସ ବୈଠକରେ ଯୋଗଦେବାକୁ ମନା କରି ‘ସୋନିଆ ଗାନ୍ଧୀ ବନାମ ଦିଦି’ ରାଜନୈତିକ ସ୍ଥିତି ଉପରେ ମୋହର ଲଗାଇ ଦେଇଥିବା ଚର୍ଚ୍ଚା ହେଉଛି।ତୃଣମୂଳର ଆକ୍ରମଣାତ୍ମକ ବିସ୍ତାର ମାଧ୍ୟମରେ ଜାତୀୟ ସ୍ତରରେ ଭାଜପା ଏବଂ ନରେନ୍ଦ୍ର ମୋଦିଙ୍କ ବିରୋଧରେ ଏକ ଦୃଢ଼ ବିକଳ୍ପ ଭାବରେ ନିଜକୁ ପ୍ରୋଜେକ୍ଟ କରିବା ପାଇଁ ମମତା ବାନାର୍ଜୀ ଏକ ମିଶନରେ ଅଛନ୍ତି। କିଛି ଦିନ ତଳେ ମମତା ଦୁଇ ଦିନିଆ ଦିଲ୍ଲୀ ଗସ୍ତରେ ଆସି ସୋନିଆଙ୍କୁ ଭେଟି ନ ଥିଲେ। ଯେତେବେଳେ ଏ ବିଷୟରେ ପଚରାଗଲା, ମମତା କହିଥିଲେ ଯେ ସୋନିଆଙ୍କୁ ପ୍ରତ୍ୟେକ ଥର ଭେଟିବା ଆବଶ୍ୟକ କି ?
ବାସ୍ତବରେ, ମମତା ବାନାର୍ଜୀ ଭଲଭାବେ ଜାଣିଛନ୍ତି ଯେ ଯଦି ୨୦୨୪ ରେ‘ମୋଦି ବନାମ ଦିଦି’ ଭାବରେ ପ୍ରୋଜେକ୍ଟ କରାଯାଏ, ତେବେ ତାଙ୍କ ବାଟ ପ୍ରଥମେ ‘ସୋନିଆ ଗାନ୍ଧୀ ବନାମ ଦିଦି’ ଦେଇ ଯିବା ଆବଶ୍ୟକ। ବର୍ତ୍ତମାନ ମମତା ସମାନ ପଥରେ ଗତି କରୁଛନ୍ତି। ସେଥିପାଇଁ ଦିଲ୍ଲୀ ଗସ୍ତ ସମୟରେ ମେଘାଳୟର ୧୭ କଂଗ୍ରେସ ବିଧାୟକଙ୍କ ମଧ୍ୟରୁ ୧୨ ଜଣଙ୍କୁ ବାଡ଼ ଡିଆଇଁବାରେ ସହଯୋଗ କରିଥିଲେ। ସେମାନଙ୍କ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ମୁକୁଲ ସାଙ୍ଗମା ବି ଥିଲେ।