ନୂଆଦିଲ୍ଲୀ,୧୪।୧୨: ସଂସଦର ସୁରକ୍ଷା କ୍ଷେତ୍ରରେ ପ୍ରମୁଖ ତ୍ରୁଟି ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର କେନ୍ଦ୍ର ମନ୍ତ୍ରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏକ ଘରୋଇ ଟେଲିଭିଜନ ଚ୍ୟାନେଲ ସୂତ୍ରରୁ ପ୍ରକାଶ ଯେ ପ୍ରଧାନମନ୍ତ୍ରୀ ମୋଦି ମନ୍ତ୍ରୀଙ୍କୁ ଏହି ପ୍ରସଙ୍ଗକୁ ଗମ୍ଭୀରତାର ସହ ନେବାକୁ ଏବଂ ଏହି ପ୍ରସଙ୍ଗରେ ରାଜନୀତିରେ ଜଡିତ ନ ହେବାକୁ କହିଛନ୍ତି। ଆମ ସମସ୍ତଙ୍କୁ ସତର୍କତା ଅବଲମ୍ବନ କରିବାକୁ ପଡିବ ବୋଲି ସେ ସତର୍କ କରାଇ ଦେଇଛନ୍ତି।
କଂଗ୍ରେସ ଏବଂ ଅନ୍ୟ ବିରୋଧୀ ଦଳ ଏହି ପ୍ରସଙ୍ଗରେ ଉଭୟ ଗୃହ (ରାଜ୍ୟ ସଭା ଓ ଲୋକ ସଭା) ରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କଠାରୁ ବିବୃତ୍ତି ଦାବି କରୁଛନ୍ତି। ଏହି କାରଣରୁ ରାଜ୍ୟ ସଭା ଓ ଲୋକ ସଭାରେ ଉତ୍ତେଜନା ଦେଖାଦେଇଥିଲା। ସଂସଦରେ ଆସନକୁ ଅବମାନନା ଏବଂ ଅସମ୍ମାନ କରିବା କାରଣରୁ ଟିଏନ ପ୍ରତାପନ, ହିବି ଇଡେନ, ଜୋତିମଣି, କଂଗ୍ରେସର ରାମିଆଙ୍କ ସମେତ ୧୪ ଜଣ ବିରୋଧୀ ସଦସ୍ୟଙ୍କୁ ଶୀତକାଳୀନ ଅଧିବେଶନର ଅବଶିଷ୍ଟ ଦିନ ପାଇଁ ନିଲମ୍ବିତ କରାଯାଇଥିଲା। ଏହି ସମୟରେ ଟିଏମସି ଏମପି ଡେରେକ ଓ’ବ୍ରାଇନଙ୍କୁ ରାଜ୍ୟ ସଭାରୁ ନିଲମ୍ବିତ କରାଯାଇଥିଲା।