![](https://www.dharitri.com/wp-content/uploads/2024/06/fggf.jpg)
ନୂଆଦିଲ୍ଲୀ,୧୦।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ରମାଗତ ତୃତୀୟ ଥର ପାଇଁ ଶପଥ ଗ୍ରହଣ କରିଛନ୍ତି। ପ୍ରଧାନମନ୍ତ୍ରୀଙ୍କ ସହ ୭୨ ମନ୍ତ୍ରୀ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ତେବେ ମନ୍ତ୍ରୀଙ୍କ କାର୍ଯ୍ୟଭାର ଏପର୍ଯ୍ୟନ୍ତ ବିଭାଜିତ ହୋଇନାହିଁ। ୨୦୨୪ ସାଧାରଣ ନିର୍ବାଚନରେ ଭାଜପା ସଂଖ୍ୟାଗରିଷ୍ଠତା ହାସଲ କରି ନାହିଁ ଏବଂ କ୍ଷମତାରେ ରହିବାକୁ ଏନଡିଏ ସହଯୋଗୀଙ୍କ ସମର୍ଥନ ଆବଶ୍ୟକ। ଏଭଳି ପରିସ୍ଥିତିରେ ସମଗ୍ର ବିଶ୍ୱର ଆଖି ପିଏମ ମୋଦିଙ୍କ ତୃତୀୟ କାର୍ଯ୍ୟକାଳ ଉପରେ ରହିଛି। ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ମନ୍ତ୍ରୀ ପରିଷଦ ଶପଥ ଗ୍ରହଣ କରିଥିଲେ, ସେତେବେଳେ ବିଶ୍ୱର ଗଣମାଧ୍ୟମ ସଂଗଠନମାନେ ଏହାର ପ୍ରତିକ୍ରିୟା ପ୍ରକାଶ କରିଥିଲେ। ତେବେ ଆସନ୍ତୁ ଜାଣିବା ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ବିଷୟରେ କ’ଣ କହିଛନ୍ତି-
ନ୍ୟୁୟର୍କ ଟାଇମ୍ସ
ଆମେରିକାର ଖବରକାଗଜ ଦି ନ୍ୟୁୟକର୍ର୍ ଟାଇମ୍ସ ଲେଖିଛି ଯେ, ନୂତନ ସରକାର ଶପଥ ଗ୍ରହଣ କରିବା ମାତ୍ରେ ନୂଆଦିଲ୍ଲୀର ରାଜନୈତିକ ପାଣିପାଗରେ ପରିବର୍ତ୍ତନ ଆସିଛି। ବହୁମତ ନ ମିଳିବାରୁ ମୋଦି ସହଯୋଗୀ ଦଳ ମାନଙ୍କ ସହ ମିଶି ସରକାର ଗଠନ କରିଛନ୍ତି,ଯାହା ଆଗକୁ ଚ୍ୟାଲେଞ୍ଜିଂ ହେବ।
ବିବିସି
ବ୍ରିଟିଶ ମିଡିଆ ସଂଗଠନ ବିବିସି ଲେଖିଛି ଯେ, ମୋଦି ସରକାରଙ୍କ ତୃତୀୟ କାର୍ଯ୍ୟକାଳ ଆରମ୍ଭ ହୋଇଛି, କିନ୍ତୁ ସାଧାରଣ ନିର୍ବାଚନରେ ବିରୋଧୀଙ୍କ ବୃଦ୍ଧି ଘଟିଛି। ଏକଜିଟ ପୋଲରେ ଦେଖାଯାଇଥିବା ଆକଳନକୁ ଶାସକ ମିଳିତ ମେଣ୍ଟ ସ୍ପର୍ଶ କରି ନ ଥିଲା, କିନ୍ତୁ ସରକାର ଗଠନ କରିବାରେ ସଫଳ ହୋଇଥିଲା।
ଅଲ ଜଜିରା
କୁଏତ ଗଣମାଧ୍ୟମ ସଂଗଠନ ଅଲ ଜଜିରା ଲେଖିଛନ୍ତି, ସଂଖ୍ୟାଗରିଷ୍ଠତାର ଅଭାବ ମୋଦି ସରକାରଙ୍କୁ ଅନେକ ଆହ୍ବାନ ଦେବ। ଅଲ ଜଜିରା ମଧ୍ୟ ଏନଡିଏ ସହଯୋଗୀ ଚନ୍ଦ୍ରବାବୁ ନାଇଡୁ ଏବଂ ନୀତୀଶ କୁମାରଙ୍କ ଚ୍ୟାଲେଞ୍ଜକୁ ନେଇ ଆଶଙ୍କା ପ୍ରକାଶ କରିଛି ଏବଂ ସରକାରଙ୍କୁ ଏହାର ସମସ୍ତ ସହଯୋଗୀଙ୍କ ଯତ୍ନ ନେବାକୁ ପଡ଼ିବ ବୋଲି ଲେଖିଛନ୍ତି।
ବ୍ଲୁମବର୍ଗ
ପ୍ରଧାନମନ୍ତ୍ରୀ ମୋଦିଙ୍କ ଶପଥ ଗ୍ରହଣ ସମାରୋହରେ ବିଦେଶୀ ଅତିଥିଙ୍କ ଆଗମନ ଏବଂ ୮୦୦୦ ଲୋକଙ୍କ ଉପସ୍ଥିତିରେ ଶପଥ ଗ୍ରହଣ କରିବା ବିଷୟରେ ବ୍ଲୁମବର୍ଗ ଉଲ୍ଲେଖ କରିଛନ୍ତି। ପ୍ରବନ୍ଧରେ ଏହା ମଧ୍ୟ ଲେଖାଯାଇଛି ଯେ, କ୍ଷମତାରେ ରହିବାକୁ ପ୍ରଧାନମନ୍ତ୍ରୀ ମୋଦି ସହଯୋଗୀଙ୍କ ସମର୍ଥନ ଆବଶ୍ୟକ।