ନୂଆଦିଲ୍ଲୀ,୨୩।୧୧ : ଡିପଫେକ ଭିଡିଓଗୁଡିକ ବିଷୟରେ ବର୍ତ୍ତମାନ ଅନେକ ଆଲୋଚନା ହେଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଟେକ୍ନୋଲୋଜି ବିଷୟରେ ଚିନ୍ତା ପ୍ରକଟ କରିଛନ୍ତି। ଜି -୨୦ ଭର୍ଚୁଆଲ ସମ୍ମିଳନୀରେ ପ୍ରଧାନମନ୍ତ୍ରୀ ଏହା ଉପରେ ଗୁରୁତ୍ୱ ପ୍ରଦାନ କରିଛନ୍ତି। ସୋସିଆଲ ମିଡିଆରେ ପ୍ରସିଦ୍ଧ ଦକ୍ଷିଣ ଭାରତୀୟ ଅଭିନେତ୍ରୀ ରଶ୍ମିକା ମନ୍ଦନାଙ୍କର ଏକ ଡିପଫେକ ଭିଡିଓ ଭାଇରାଲ ହେବାପରେ ଏହା ଉପରେ ଆଲୋଚନା ଆରମ୍ଭ ହୋଇଥିଲା। ଏହା ପରେ ସରକାର ଏ ସମ୍ପର୍କରେ ଏକ ଆଡଭାଇଜରୀ ମଧ୍ୟ ଜାରି କରିଥିଲେ। ପ୍ରଧାନମନ୍ତ୍ରୀ କହିଥିଲେ ସେ ମହିଳାମାନଙ୍କ ସହ ଗରବା ନାଚୁଥିବା ଏକ ଭିଡିଓ ଭାଇରାଲ ହୋଇଥିଲା। ଯେଉଁଥିରେ ସେ ଉପସ୍ଥିତ ନ ଥିଲେ। ସେ ଏହି ଭିଡିଓକୁ ଡିପଫେକ ବୋଲି କହିଛନ୍ତି।
ବର୍ତ୍ତମାନ ଏହି ଭାଇରାଲ ଭିଡିଓର ପ୍ରକୃତ ସତ୍ୟ ପଦାକୁ ଆସିଛି। ପ୍ରକାଶ, ଏହି ଭିଡିଓଟି ମିଥ୍ୟା ନୁହେଁ, କିନ୍ତୁ ପିଏମ ମୋଦିଙ୍କ ଭଳି ଜଣେ ବ୍ୟକ୍ତି ଏଥିରେ ଗରବା ନାଚୁଛନ୍ତି। ସେହି ବ୍ୟକ୍ତି ନିଜେ ଏହି ବିଷୟରେ ଏକ ବିବୃତ୍ତି ଦେଇଛନ୍ତି। ଏହି ଭିଡିଓରେ ପିଏମ ମୋଦିଙ୍କ ଭଳି ଦେଖାଯାଉଥିବା ବ୍ୟକ୍ତି ହେଉଛନ୍ତି ବ୍ୟବସାୟୀ ବିକାଶ ମହନ୍ତେ। ସେ ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ କହିଛନ୍ତି ଏହା ଏକ ଡିପଫେକ ଭିଡିଓ ନୁହେଁ। ବିକାଶ ମହନ୍ତ କହିଛନ୍ତି ଭାଇରାଲ ଭିଡିଓରେ ମୁଁ ଗରବା ନାଚୁଛି।
ମହନ୍ତେ ଇନଷ୍ଟାଗ୍ରାମରେ ଲେଖିଛନ୍ତି ସେ ଜଣେ କଳାକାର ଏବଂ ଅଭିନେତା ଭାବରେ ତାଙ୍କୁ ଅନେକ କାର୍ଯ୍ୟକ୍ରମରେ ନିମନ୍ତ୍ରଣ କରାଯାଇଛି କାରଣ ସେ ପ୍ରଧାନମନ୍ତ୍ରୀଙ୍କ ଭଳି ଦେଖିବାକୁ। ସେ ସ୍ପଷ୍ଟ କରିଛନ୍ତି ସେ କୌଣସି ପ୍ରକାରେ ମୋଦି ଜି ବୋଲି ନିଜକୁ ଦାବି କରନ୍ତି ନାହିଁ କିମ୍ବା ତାଙ୍କ ଭଳି ଦେଖିବାକୁ ବୋଲି କାହାକୁ କହି ନ ଥାନ୍ତି। ସେ ଏପରି କିଛି କରନ୍ତି ନାହିଁ ଯାହା ଭାରତର ପ୍ରଧାନମନ୍ତ୍ରୀ ଭାବରେ ମୋଦିଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବ। ସେ କହିଛନ୍ତି ଲୋକଙ୍କ ମଧ୍ୟରେ ପ୍ରଧାନମନ୍ତ୍ରୀଙ୍କ ଆଦର୍ଶ ବାଣ୍ଟିବା ମୋ ପାଇଁ ଗୌରବର ବିଷୟ।
ଏହି ଭିଡିଓ ସୋସିଆଲ ମିଡିଆରେ ବହୁତ ଶେୟାର କରାଯାଇଥିଲା। ଏ ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ ସେ ଏକ ଡିପଫେକ ଭିଡିଓ ଦେଖିଛନ୍ତି, ଯେଉଁଥିରେ ତାଙ୍କୁ ଗରବା ନାଚୁଥିବାର ଦେଖାଯାଇଛି। ଏହାକୁ ସୋସିଆଲ ମିଡିଆରେ ଶେୟାର କରାଯାଇଥିଲା। ସେ କହିଥିଲେ ଡିପଫେକ ଜାଲର ଶିକାର ହୋଇଥିଲେ। ସେ ସ୍କୁଲ ଛାଡିବା ପରଠାରୁ ଗାରବା କରିନାହାନ୍ତି। ପ୍ରଧାନମନ୍ତ୍ରୀ କହିଥିଲେ ଏଭଳି ଟେକ୍ନୋଲୋଜିର ସଙ୍କଟ ବିଷୟରେ ଲୋକଙ୍କୁ ସଚେତନ ହେବା ଉଚିିତ।
କିଛି ସପ୍ତାହ ପୂର୍ବରୁ, ଭାରତ ସରକାରଙ୍କ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଫେସବୁକ, ଇନଷ୍ଟାଗ୍ରାମ ଏବଂ ୟୁଟ୍ୟୁବ ସମେତ ସୋସିଆଲ ମିଡିଆ ପ୍ଲାଟଫର୍ମକୁ ଏକ ପରାମର୍ଶ ଦେଇଥିଲା। ସେମାନଙ୍କୁ ୨୪ ଘଣ୍ଟା ମଧ୍ୟରେ ଡିପଫେକ ବିଷୟବସ୍ତୁ ହଟାଇବାକୁ କହିଥିଲେ। ଏପରି କରା ନ ଗଲେ ଭାରତୀୟ ଆଇନ ଅନୁଯାୟୀ ଅପରାଧିକ ଏବଂ ନ୍ୟାୟିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଥିଲା।