ଭୁବନେଶ୍ୱର,୨୨ା୫: ପୁଣି ପ୍ରଚାର ପାଇଁ ଓଡ଼ିଶା ଗସ୍ତରେ ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଭାଜପା ଓଡ଼ିଶା ପ୍ରଭାରୀ ବିଜୟପାଲସିଂ ତୋମାର ଏହି ସୂଚନା ଦେଇଛନ୍ତି। ଆସନ୍ତା ୨୯ ତାରିଖରେ ପ୍ରଧାନମନ୍ତ୍ରୀ ତାଙ୍କର ଏହି ଗସ୍ତରେ କେନ୍ଦ୍ରାପଡ଼ା ଓ ବାଲେଶ୍ୱରରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବେ।
ସେହିଭଳି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ମଧ୍ୟ ପୁଣି ଓଡ଼ିଶା ଆସୁଛନ୍ତି। ଆସନ୍ତା ୨୫ରେ ଶାହା ବାରିପଦା, ଚାନ୍ଦବାଲି, କୋରେଇ ଓ ନିମାପଡ଼ାରେ ନିର୍ବାଚନୀ ପ୍ରଚାର କରିବେ।
ଓଡ଼ିଶାରେ ବିଧାନସଭା ଏବଂ ଲୋକ ସଭା ନିର୍ବାଚନ ପାଇଁ ମୋଦି ମେ’ ୬ରେ ଓଡ଼ିଶାରେ ପ୍ରଚାର ଆରମ୍ଭ କରିଥିଲେ। ଗୋଟିଏ ଦିନରେ ବ୍ରହ୍ମପୁର ଓ ନବରଙ୍ଗପୁରରେ ଦୁଇ ଦୁଇଟି ବିଶାଳ ଜନସଭା କରି ପ୍ରଧାନମନ୍ତ୍ରୀ, ବିଜେଡିର ଏକ୍ସପାଏରୀ ଡେଟ୍ ଘୋଷଣା କରିଥିଲେ ଏବଂ ଜୁନ୍ ୧୦ରେ ଭୁବନେଶ୍ୱରରେ ଭାଜପା ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣରେ ଯୋଗ ଦେବାକୁ ନିମନ୍ତ୍ରଣ କରିଥିଲେ।
ଏହାପରେ ଦ୍ୱିତୀୟ ଗସ୍ତରେ ବରଗଡ଼, କଳାହାଣ୍ଡି, ବଲାଙ୍ଗୀର ଆଦି ଜିଲା ଗସ୍ତ କରି ପ୍ରାର୍ଥୀଙ୍କ ପାଇଁ ପ୍ରଚାର କରିସାରିଲେଣି। ଏହାପରେ ଗତ ସୋମବାର ତୃତୀୟ ପର୍ଯ୍ୟାୟରେ ଆସି ପୁରୀରେ ରୋଡ଼ ଶୋ’ କରିବା ପରେ ଅନୁଗୋଳ ଏବଂ କଟକରେ ଜନସମାବେଶକୁ ସମ୍ବୋଧିତ କରି ରାଜ୍ୟ ସରକାରଙ୍କୁ ଘନଘନ ଆଣାକ୍ରମଣ କରିଥିଲେ।
ଅନ୍ୟପଟେ ମଙ୍ଗଳବାର ଅମିତ ଶାହା ନୟାଗଡ ଗସ୍ତ କରି କହିଛନ୍ତି ଯେ, ‘ଓଡ଼ିଶାରେ କୌଣସି ତାମିଲ ବାବୁ ଶାସନ କରିପାରିବେ ନାହିଁ। କଥା ଦେଉଛୁ ଭାଜପା କ୍ଷମତାକୁ ଆସିଲେ ଓଡ଼ିଆ କହୁଥିବା ଲୋକ ଶାସନ କରିବେ।” ନୟାଗଡ଼ ଜିଲା ନୟାଗଡ଼ ବ୍ଲକ ଲାଠିପଡ଼ାର ଟାଙ୍ଗୀ ପଡ଼ିଆରେ ମଙ୍ଗଳବାର ଅପରାହ୍ନରେ ଭାଜପାର ବିଜୟ ସଂକଳ୍ପ ସମାବେଶରେ ଯୋଗଦେଇ ଶାହା ବିଜେଡି ଉପରେ ବର୍ଷିବା ସହ ଓଡ଼ିଶାର ବିକାଶ ପାଇଁ ଭାଜପାକୁ ଭୋଟ ଦେବାକୁ ଅନୁରୋଧ କରିଛନ୍ତି। ଅନୁରୂପଭାବେ ସମ୍ବଲପୁର, କେନ୍ଦୁଝର ଏବଂ ଢେଙ୍କାନାଳର ପରଜଙ୍ଗଠାରେ ଆୟୋଜିତ ନିର୍ବାଚନ ସଭାରେ ଶାହା ତାମିଲ ପ୍ରସଙ୍ଗ ଉଠାଇବା ସହ ରାଜ୍ୟରେ ଭାଜପା କ୍ଷମତାକୁ ଆସିଲେ ଓଡ଼ିଆ କହୁଥିବା ଜଣେ ଯୁବନେତା ମୁଖ୍ୟମନ୍ତ୍ରୀ ହେବେ ବୋଲି କହିଛନ୍ତି।
ତେବେ ନୟାଗଡ଼ଠାରେ ଅନୁଷ୍ଠିତ ସଭାରେ ଶାହା କହିଛନ୍ତି, ଦେଶ ମୋଦିଙ୍କୁ ତୃତୀୟ ଥର ପ୍ରଧାନମନ୍ତ୍ରୀ କରିବାକୁ ପ୍ରସ୍ତୁତ। ଏଥର ଓଡ଼ିଶାରେ ଭାଜପା ୭୫ ଆସନ ଦଖଲକରି ସରକାର ଗଠନ କରିବ ବୋଲି ଶାହା ଦୃଢ଼ୋକ୍ତି ପ୍ରକାଶ କରିଛନ୍ତି। ୩ କୋଟି ଲକ୍ଷପତି ଦିଦି ଓ ୪ କୋଟି ଗରିବଙ୍କ ପାଇଁ ଘର ତିଆରି ହେବ। ମହାପ୍ରଭୁ ଶ୍ରୀଜଗନ୍ନାଥଙ୍କ ଗୌରବକୁ ନଷ୍ଟ କରାଯାଇଛି। ଶ୍ରୀମନ୍ଦିରର ୪ ଦ୍ୱାର ଖୋଲିବା ଓ ପୁରୀର ସମ୍ମାନ ପୁଣି ଫେରାଇ ଆଣିବା ଉପରେ ସେ ପ୍ରଶ୍ନ କରିଛନ୍ତି। ସେ କହିଛନ୍ତି, ନବୀନବାବୁ, ତୁମ ବାବୁଙ୍କ ଉତ୍ତର ଦରକାର ନାହିଁ। ମୋ ପ୍ରଶ୍ନର ଉତ୍ତର ଆପଣ ଓଡ଼ିଆରେ ଦିଅନ୍ତୁ। ରତ୍ନଭଣ୍ଡାର ଚାବି କୁଆଡ଼େ ହଜିଗଲା। ଡୁପ୍ଲିକେଟ୍ ଚାବିରେ ଭଣ୍ଡାର ଖୋଲାହୋଇଛି କି ନାହିଁ। ରତ୍ନଭଣ୍ଡାର ଯାଞ୍ଚ ଆୟୋଗ ରିପୋର୍ଟକୁ କାହିଁକି ଲୁଚାଇ ରଖିଛ। ଭାଜପା ସରକାର ଆସିଲେ ୧୦୦ ଦିନ ଭିତରେ ଏ ସଂକ୍ରାନ୍ତରେ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି। ସେହିପରି ନୟାଗଡ଼ ଜିଲାର ବନ୍ଦ ହୋଇ ପଡ଼ିଥିବା ଚିନିକଳ ୩ ମାସ ଭିତରେ ଚାଲୁ କରାଯିବ ବୋଲି ଶାହା ପ୍ରତିଶ୍ରୁତି ଦେଇଛନ୍ତି।
ଦେଶର ସବୁଠାରୁ ସମୃଦ୍ଧଶାଳୀ ରାଜ୍ୟ ଓଡ଼ିଶା। ହେଲେ ସେହି ରାଜ୍ୟ ପଛୁଆ ହୋଇ ରହିଯାଇଛି। ନବୀନବାବୁଙ୍କ ଶାସନରେ ଶିକ୍ଷା, ସ୍ବାସ୍ଥ୍ୟ, ଶିଳ୍ପ ଓ ବିକାଶ ବ୍ୟବସ୍ଥା ଭୁଶୁଡି ପଡ଼ିଛି। ବିଜେଡିକୁ ରାଜ୍ୟବାସୀ ୨୫ ବର୍ଷ ଦେଇଥିଲେ ହେଁ ଦେଶର ମାନଚିତ୍ରରେ ଓଡ଼ିଶା ପଛରେ ରହିଯାଇଛି। ଓଡ଼ିଶାବାସୀ ନବୀନବାବୁଙ୍କୁ ବହୁତ ସହିଲେଣି। ଓଡ଼ିଶାରେ ନବୀନବାବୁ କିଛି କରୁନାହାନ୍ତି। ତାଙ୍କ ବାବୁମାନେ ଶାସନ କରୁଛନ୍ତି।