ନୂଆଦିଲ୍ଲୀ, ୨୯।୫: ମୋଦି ସରକାର ଗତ ସପ୍ତାହରେ ୯ ବର୍ଷ ପୂରଣ କରିଛି। ଏହି ସମୟରେ ଦେଶରେ ମୁଦ୍ରାସ୍ଫୀତି ଜରିଆରେ ସରକାର ଲୋକଙ୍କ ଆୟକୁ ଲୁଟି ନେଇଛନ୍ତି। କିନ୍ତୁ ମୂଲ୍ୟବୃଦ୍ଧିକୁ ନିୟନ୍ତ୍ରଣ ମଧ୍ୟରେ ରଖାଯାଇଛି ବୋଲି ସରକାର ଗର୍ବର ସହ ଦାବି କରୁଛନ୍ତି। ବାସ୍ତବରେ ଦେଖିଲେ ମୋଦିଙ୍କ ଶାସନ କାଳରେ ଗରିବଙ୍କ ଆଦୌ ଉନ୍ନତି ଘଟି ନାହିଁ ବୋଲି କଂଗ୍ରେସ ଅଧ୍ୟକ୍ଷ ମଲିକାର୍ଜ୍ଜୁନ ଖାର୍ଗେ ସୋମବାର ହିନ୍ଦୀରେ ଟୁଇଟ୍ କରି ଅଭିଯୋଗ କରିଛନ୍ତି।
ଆସନ୍ତା କିଛି ଦିନ ପରେ ସରକାରରେ ଥିବା ମନ୍ତ୍ରୀ ଓ ପ୍ରଶଂସକମାନେ ମୋଦି ସରକାରଙ୍କ ତଥାକଥିତ ସଫଳତା ନେଇ ଉତ୍ସବ ପାଳନ କରିବେ ବୋଲି କଂଗ୍ରେସ ପକ୍ଷରୁ କଟାକ୍ଷ କରି କୁହାଯାଇଛି। କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି, ମୋଦି ସରକାରଙ୍କ ଅମଳରେ ଅତ୍ୟାବଶ୍ୟକ ସାମଗ୍ରୀର ଦର ବହୁଗୁଣ ବଢ଼ିଯାଇଛି। କେନ୍ଦ୍ର ସରକାରରେ ଥିବା ମନ୍ତ୍ରୀମାନେ ସରକାରଙ୍କ ସଫଳତାକୁ ବଡ଼ ଆକାରରେ ଦର୍ଶାଇବାର ସବୁ କାର୍ଯ୍ୟ କରିବେ ବୋଲି ସେ କହିଛନ୍ତି। କିନ୍ତୁ ଗରିବମାନଙ୍କ ଅବସ୍ଥା ମୋଦିଙ୍କ ୯ ବର୍ଷ ଶାସନ ସମୟରେ ଦୟନୀୟ ହୋଇଛି ବୋଲି ରମେଶ କହିଛନ୍ତି। ୨୦୧୪ରୁ ମୋଦି କ୍ଷମତାକୁ ଆସିବା ପରେ କୃଷି ଶ୍ରମିକଙ୍କ ମଜୁରି ହାର ବୃଦ୍ଧି ୦.୮ ପ୍ରତିଶତ ରହିଥିବା ବେଳେ ଅଣ-କୃଷି ଶ୍ରମିକଙ୍କ ୦.୨ ପ୍ରତିଶତ ଏବଂ ନିର୍ମାଣ ଶ୍ରମିକଙ୍କ ମଜୁରି ବିଯୁକ୍ତ ୦.୦୨ ପ୍ରତିଶତ ହୋଇଛି। ଇତିମଧ୍ୟରେ ଏଲ୍ପିଜିରେ ୧୬୯%, ପେଟ୍ରୋଲ ୫୭%, ଡିଜେଲ ୭୮%, ସୋରିଷ ତେଲ ୫୮%, ଅଟା ୫୬% ଏବଂ କ୍ଷୀର ମୂଲ୍ୟ ୫୧% ବଢ଼ିଛି ବୋଲି ରମେଶ ଟୁଇଟ୍ କରି କହିଛନ୍ତି। ୨୦୧୪ ପରେ ଶିଳ୍ପପତି ଗୌତମ ଆଦାନୀଙ୍କ ସମ୍ପତ୍ତି ୧,୨୨୫ ପ୍ରତିଶତ ବୃଦ୍ଧି ପାଇଛି ବୋଲି ସେ ତଥ୍ୟ ଦେଇଛନ୍ତି।
ପ୍ରଧାନମନ୍ତ୍ରୀ ମୋଦିଙ୍କ ଶାସନ ୯ ବର୍ଷ ପୂରଣ କରିଥିବାରୁ କଂଗ୍ରେସ ଗତ ସପ୍ତାହରେ ମୂଲ୍ୟବୃଦ୍ଧି, ବେକାର ସଂଖ୍ୟା ବୃଦ୍ଧି, କୃଷକଙ୍କ ଆୟ ସଂକ୍ରାନ୍ତ ୯ଟି ପ୍ରଶ୍ନ ପଚାରିବା ସହିତ ଏହି ସମୟ ମଧ୍ୟରେ ଦିଆଯାଇଥିବା ଧୋକା ପାଇଁ ସେ କ୍ଷମା ମାଗନ୍ତୁ ବୋଲି ଦାବି କରାଯାଇଥିଲା।
ସୂଚନାଯୋଗ୍ୟ, ୨୬ ମେ’ରେ କେନ୍ଦ୍ରରେ ଭାଜପା ନେତୃତ୍ୱାଧୀନ ସରକାର ୯ ବର୍ଷ ଶେଷ କରିଛି। ଏହି କାଳଖଣ୍ଡରେ ଏନ୍ଡିଏ ସରକାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ସାମଗ୍ରିକ ବିକାଶ ସହିତ ଅନ୍ତର୍ଭୁକ୍ତୀକରଣ ଅଭିବୃଦ୍ଧି ହାସଲ କରିଥିବା ବିଷୟକୁ ଦର୍ଶାଯାଉଛି।