ଲଣ୍ଡନ,୮।୯ : ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି)ର ପ୍ରାୟ ୧୩,୫୦୦ କୋଟି ଟଙ୍କାର ବ୍ୟାଙ୍କ ଠକେଇ ମାମଲାରେ ପଳାତକ ଘୋଷିତ ନୀରବ ମୋଦିଙ୍କ ପ୍ରତ୍ୟପଣ ମାମଲାର ଶୁଣାଣି ଲଣ୍ଡନରେ ଆରମ୍ଭ ହୋଇଛି। ଲଣ୍ଡନର ଓ୍ବେଷ୍ଟମିନ୍ଷ୍ଟର ମାଜିଷ୍ଟ୍ରେଟ କୋର୍ଟରେ ସୋମବାରଠାରୁ ସାତଦିନ ବ୍ୟାପୀ ଏହି ମାମଲା ଶୁଣାଣି ହେବ। ନୀରବ ବର୍ତ୍ତମାନ ଦକ୍ଷିଣ ଲଣ୍ଡନର ଓ୍ବାଣ୍ଡସଓ୍ବର୍ଥ ଜେଲରେ ଥିବା ବେଳେ ଭିଡିଓ ଲିଙ୍କ୍ ଦ୍ୱାରା ହାଜର ହୋଇଥିଲେ। ଭାରତର ପ୍ରବର୍ତ୍ତନ ନିର୍ଦ୍ଦେଶାଳୟର ଅଧିକାରୀଙ୍କ ଟିମ୍ କୋର୍ଟରେ ଉପସ୍ଥିତ ଥିଲେ। ଚଳିତ ବର୍ଷ ମେ ମାସରେ ହୋଇଥିବା ଶୁଣାଣି ସେପ୍ଟେମ୍ବର ଯାଏ ସ୍ଥଗିତ ରଖାଯାଇଥିଲା। ୪୯ ବର୍ଷୀୟ ନୀରବ ଲଣ୍ଡନରୁ ୨୦୧୯ ମାର୍ଚ୍ଚରେ ଗିରଫ ହୋଇଥିଲେ। ମୁମ୍ବାଇର ଏକ କୋର୍ଟ ତାଙ୍କୁ ପଳାତକ ଆର୍ଥତ୍କ ଅପରାଧୀ ଘୋଷଣା କରିବା ସହ ତାଙ୍କ ସମ୍ପତ୍ତି ବାଜ୍ୟାପ୍ତି କରିବା ଲାଗି ନିର୍ଦ୍ଦେଶ ଦେଇଛନ୍ତି। ଇଡି ବର୍ତ୍ତମାନ ସୁଦ୍ଧା ତାଙ୍କର ୩୨୯ କୋଟି ଟଙ୍କାର ସମ୍ପତ୍ତିକୁ ବାଜ୍ୟାପ୍ତି କରି ସାରିଛି। ଇଣ୍ଟରପୋଲ ପକ୍ଷରୁ ପୂର୍ବରୁ ନୀରବଙ୍କ ଭଉଣୀ ପୂର୍ବୀ ମୋଦି ଏବଂ ସାନଭାଇ ନେହାଲ ମୋଦିଙ୍କ ବିରୋଧରେ ଗିରଫ ପରାଓ୍ବାନା ଜାରି କରିଛି। ଗତ ମାସରେ ତାଙ୍କ ସ୍ତ୍ରୀ ଆମି ମୋଦିଙ୍କ ବିରୋଧରେ ରେଡ୍ କର୍ନର ନୋଟିସ ଜାରି କରାଯାଇଛି। ୨୦୧୮ରେ ବ୍ୟାଙ୍କ ଠକେଇ ସାମ୍ନାକୁ ଆସିବା ପରେ ଆମି ମୋଦି ଦେଶ ଛାଡି ପଳାୟନ କରିଥିଲେ।
