ରାଞ୍ଚି, ୧୨।୭ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଝାଡଖଣ୍ଡକୁ ବିମାନବନ୍ଦର, ଏଆଇଏମଏସ ସମେତ ୧୬୮ ଶହ କୋଟି ଟଙ୍କା ମୂଲ୍ୟର ଅନେକ ଯୋଜନାର ଉପହାର ପ୍ରଦାନ କରିଛନ୍ତି। ବାବା ବୈଦ୍ୟନାଥଙ୍କୁ ପ୍ରାର୍ଥନା କରିବା ପରେ ସାଧାରଣ ସଭାରେ ସମ୍ବୋଧିତ କରି ପ୍ରଧାନମନ୍ତ୍ରୀ ଦେଶର ଲୋକଙ୍କୁ ଶର୍ଟକଟ ରାଜନୀତି କରୁଥିବା ଲୋକଙ୍କ ପ୍ରତି ସତର୍କ ରହିବାକୁ ଚେତାବନୀ ଦେଇଛନ୍ତି।
ମାଗଣା ବିଦ୍ୟୁତ ଏବଂ ମାଗଣା ବସ ଯାତ୍ରା ଭଳି ପ୍ରତିଶ୍ରୁତି ନେଇ ଲୋକଙ୍କୁ ସଚେତନ କରି ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଏଭଳି ପ୍ରତିଶ୍ରୁତି କେବଳ ଦିନେ ଜନସାଧାରଣଙ୍କୁ ଉତ୍ସାହିତ କରିବ। ଏଭଳି ପ୍ରତିଶ୍ରୁତିରେ ଶର୍ଟ ସର୍କିଟ ହେବା ନିଶ୍ଚିତ। ଶର୍ଟକଟ ରାଜନୀତିକୁ ଦେଶ ପାଇଁ ଏକ ଆହ୍ବାନ ବୋଲି ପ୍ରଧାନମନ୍ତ୍ରୀ କହିଛନ୍ତି। ସେ କହିଛନ୍ତି ଜନପ୍ରିୟ ପ୍ରତିଶ୍ରୁତି ଦେଇ ଲୋକଙ୍କଠାରୁ ଭୋଟ ପାଇବା ଅତ୍ୟନ୍ତ ସହଜ। ଯେଉଁମାନେ ଶର୍ଟକଟ ନିଅନ୍ତି ସେମାନଙ୍କୁ କଠିନ ପରିଶ୍ରମ କରିବାକୁ ପଡିବ ନାହିଁ କିମ୍ବା ସୁଦୂରପ୍ରସାରୀ ପରିଣାମ ବିଷୟରେ ସେମାନଙ୍କୁ ଚିନ୍ତା କରିବାକୁ ପଡିବ ନାହିଁ।
ଯେଉଁ ଦେଶର ରାଜନୀତି ଶର୍ଟକଟ ଉପରେ ଆଧାରିତ, ଦିନେ ତାହା ଶର୍ଟ ସର୍କିଟର ଶିକାର ହୋଇଥାଏ ବୋଲି ପ୍ରଧାନମନ୍ତ୍ରୀ କଟାକ୍ଷ କରି କହିଛନ୍ତି। ଶର୍ଟକଟ ରାଜନୀତି ଦେଶକୁ ନଷ୍ଟ କରିଦିଏ। ଭାରତରେ ଆମକୁ ଏଭଳି ରାଜନୀତିଠାରୁ ଦୂରରେ ରହିବାକୁ ପଡ଼ିବ। ଯଦି ଆମେ ଭାରତକୁ ଆଗକୁ ନେବାକୁ ଚାହୁଁ, ତେବେ ଆମକୁ କଠିନ ପରିଶ୍ରମ କରିବାକୁ ହେବ ବୋଲି ସେ କହିଛନ୍ତି।