ନୂଆଦିଲ୍ଲୀ,୧୮।୧୦ : ଏକ୍ସାଇଜ ସ୍କାମ ମାମଲାରେ ସିବିଆଇ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ୯ ଘଣ୍ଟାରୁ ଅଧିକ ସମୟ ପ୍ରଶ୍ନ କରିଛି। ସିବିଆଇର ପଚରାଉଚରା ପରେ ଆମ ଆଦମୀ ପାର୍ଟି ଭାଜପାର ଉଦ୍ଦେଶ୍ୟ ନେଇ ପ୍ରଶ୍ନ ଉଠାଇଛି। ଏଏପିର ମୁଖପାତ୍ର ତଥା ବିଧାୟକ ସୌରଭ ଭରଦ୍ୱାଜ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲାଏ ଡିଟେକ୍ଟର ଟେଷ୍ଟ୍ କରିବାକୁ ଚ୍ୟାଲେଞ୍ଜ ଦେଇଛନ୍ତି। ସେ କହିଛନ୍ତି, ସିବିଆଇ ମିଥ୍ୟା ଅଭିଯୋଗରେ ମନୀଷ ସିସୋଡିଆଙ୍କୁ ପଚରାଉଚରା କରିଥିଲା।
ଭାଜପା କହିଛି ଯେ ସେ ସିସୋଡିଆଙ୍କ ଲାଏ ଡିଟେକ୍ଟର ଟେଷ୍ଟ୍ କରିବା ଉଚିତ। ତେବେ ମୋର ବିଶ୍ୱାସ ଯେ ସବୁଠାରୁ ବଡ ମିଥ୍ୟାବାଦୀ ହେଉଛନ୍ତି ପ୍ରଧାନମନ୍ତ୍ରୀ ମୋଦି। ସେଥିପାଇଁ ପ୍ରଥମେ ତାଙ୍କର ଲାଏ ଡିଟେକ୍ଟର ଟେଷ୍ଟ୍ କରାଯିବା ଜରୁରୀ। ସୌରଭ କହିଛନ୍ତି, ମୋଦି କହିଥିଲେ ଇଡି ଏବଂ ସିବିଆଇ ନିରପେକ୍ଷ ଏଜେନ୍ସି। ମୁଁ ଏହାକୁ ମୋଦିଙ୍କର ବଡ ମିଥ୍ୟା ବୋଲି ଭାବୁଛି। ସେଥିପାଇଁ ପ୍ରଧାନମନ୍ତ୍ରୀଙ୍କୁ ଲାଏ ଡିଟେକ୍ଟର ଟେଷ୍ଟ୍ ପାଇଁ ଆହ୍ବନ ଦେଇଛି। ସେ କହିଛନ୍ତି ଯେ ଦିଲ୍ଲୀରେ ଘଟୁଥିବା ଘଟଣାର ବିବରଣୀ ଇଣ୍ଟରପୋଲ ବୈଠକରେ ପ୍ରଧାନମନ୍ତ୍ରୀ ଦେବା ଉଚିତ।
ଏହାପୂର୍ବରୁ ଭାରତୀୟ ଜନତା ପାର୍ଟି ନେତା କପିଲ ମିଶ୍ର ମଙ୍ଗଳବାର ସିସୋଡିଆଙ୍କର ଲାଏ ଡିଟେକ୍ଟର ଟେଷ୍ଟ୍ ପାଇଁ ଦାବି କରିଛନ୍ତି। ସିବିଆଇ ତାଙ୍କୁ ଆମ ଆଦମୀ ପାର୍ଟି ଛାଡିବାକୁ ଚାପ ପକାଉଛି ବୋଲି ସିସୋଡିଆଙ୍କ ମନ୍ତବ୍ୟ ନେଇ କପିଲ ଏଭଳି କହିଛନ୍ତି। ସିବିଆଇ ବିରୋଧରେ ଦେଇଥିବା ବିବୃତ୍ତି ପ୍ରତ୍ୟାହାର କରି ସିସୋଡିଆ କ୍ଷମା ମାଗନ୍ତୁ ବୋଲି ସେ ଦାବି କରିଛନ୍ତି।
