ନୂଆଦିଲ୍ଲୀ,୭୧:ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଞ୍ଜାବ ଜନସାଧାରଣଙ୍କ ଅନୁକମ୍ପା ହାସଲ ପାଇଁ ‘ସୁରକ୍ଷାରେ ତ୍ରୁଟି’ ଷ୍ଟଣ୍ଟ୍ ଆପଣାଇଥିବା କୃଷକ ନେତା ରାକେଶ ଟିକାଏତ୍ ଗୁରୁବାର ସମାଲୋଚନା କରିଛନ୍ତି। ଭାରତୀୟ କିଷାନ ୟୁନିୟନ୍ (ବିକେୟୁ) ମୁଖପାତ୍ର ଟିକାଏତ୍ ଗଣମାଧ୍ୟମକୁ କହିଛନ୍ତି, ପ୍ରଧାନମନ୍ତ୍ରୀ ପଞ୍ଜାବକୁ ଯିବା ଉଚିତ ନ ଥିଲା। ମୋଦି ସେଠାରୁ ଜୀବିତ ଫେରିଆସିଥିବା କହୁଛନ୍ତି ବୋଲି ଆମେ ଶୁଣିଆସୁଛୁ। ତେଣୁ ଏହା ଏକ ଷ୍ଟଣ୍ଟ୍ ଭଳି ମନେହେଉଛି। ବୁଧବାର ଫିରୋଜପୁର ସମେତ ଅନେକ ସ୍ଥାନରେ କୃଷକଙ୍କ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା। ମୋଦିଙ୍କ ବାଟ ଓଗାଳିବା ପାଇଁ କେହି ଚାହୁଁ ନ ଥିଲେ। ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନିଙ୍କ ମତରେ ଭାଜପା ସଭାରେ ଚୌକିଗୁଡ଼ିକ ଖାଲିପଡ଼ିଥିବାରୁ ମୋଦି ଫେରିଯାଇଥିଲେ। ତେଣୁ ସୁରକ୍ଷାରେ ତ୍ରୁଟି ଯୋଗୁ ନା କୃଷକଙ୍କ ଆକ୍ରୋଶ ଲାଗି ମୋଦି ଅଧାବାଟରୁ ଫେରିଛନ୍ତି ତାହାର ତଦନ୍ତ କରାଯାଉ ବୋଲି ଟିକାଏତ୍ ଦାବି କରିଛନ୍ତି।
ପ୍ରକାଶ ଯେ, କେନ୍ଦ୍ରର ୩ ବିବାଦୀୟ କୃଷି ଆଇନ ଉଚ୍ଛେଦ ହେବା ପରେ ପଞ୍ଜାବକୁ ଏହା ଥିଲା ପ୍ରଧାନମନ୍ତ୍ରୀଙ୍କ ପ୍ରଥମ ଗସ୍ତ। ଆସନ୍ତା ଫେବୃୟାରୀ-ମାର୍ଚ୍ଚରେ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାରୁ ମୋଦି ଫିରୋଜପୁର ସଭାରେ ୪୨,୭୫୦ କୋଟି ଟଙ୍କାର ବିକାଶମୂଳକ କାର୍ଯ୍ୟକ୍ରମର ଭିତ୍ତିପ୍ରସ୍ତର ସ୍ଥାପନ କରିଥାଆନ୍ତେ। କିନ୍ତୁ କ୍ଷୁବ୍ଧ ଚାଷୀଙ୍କ ବିରୋଧ ଯୋଗୁ ସେ ଫ୍ଲାଏଓଭରରେ ଫସିରହିଥିଲେ। ଦିଲ୍ଲୀକୁ ଫେରିବାବେଳେ ଏୟାରପୋର୍ଟରେ ପଞ୍ଜାବର ପୋଲିସ ଅଧିକାରୀମାନଙ୍କୁ କହିଥିଲେ, ମୁଁ ଜୀବିତ ଫେରିଆସିଥିବାରୁ ମୁଖ୍ୟମନ୍ତ୍ରୀ ଚନ୍ନିଙ୍କୁ ଧନ୍ୟବାଦ ଜଣାଇଦେବେ।