ମୋହାଲି,୧୦।୫: ପଞ୍ଜାବର ମୋହାଲିରେ ସୋମବାର ବିଳମ୍ବିତ ରାତିରେ ପଞ୍ଜାବ ପୋଲିସର ଇଣ୍ଟେଲିଜେନ୍ସ ୟୁନିଟର ମୁଖ୍ୟାଳୟ ଭବନରେ ରକେଟ ଆକ୍ରମଣ ହୋଇଥିଲା। ଏହା ଏତେ ଭୟଙ୍କର ବିସ୍ଫୋରଣ ଥିଲା ଯେ, ବିଲ୍ଡିଂର କାଚ ସବୁ ଭାଙ୍ଗି ଯାଇଥିଲା। ଏହି ଘଟଣା ପରେ ପଞ୍ଜାବରେ ହାଇଆଲର୍ଟ ଜାରି କରାଯାଇଛି। ସମଗ୍ର ଅଞ୍ଚଳକୁ ସିଲ କରି ଦିଆଯାଇଛି। ଏହା ଏକ ରକେଟ ଚାଳିତ ଗ୍ରେନେଡ ମାଡ। ଏହାକୁ ପଞ୍ଜାବ ପୋଲିସର ଇଣ୍ଟେଲିଜେନ୍ସ ଅଫିସ୍ର ତୃତୀୟ ମହଲାରେ ଫୋପାଡି ଦିଆଯାଇଥିଲା। ଏବେ ମୁଖ୍ୟାଳୟ ବାହାରେ ଏକ କଡା ସୁରକ୍ଷା କର୍ଡନ ପ୍ରସ୍ତୁତ କରାଯାଇଛି।
ସୂଚନାନୁସାରେ, ବର୍ତ୍ତମାନ ପଞ୍ଜାବ ପୋଲିସ ଏହାକୁ ଆତଙ୍କବାଦୀ ଆକ୍ରମଣ ବୋଲି ସ୍ବୀକାର କରିନାହାନ୍ତି। ଅଫିସରେ ରଖାଯାଇଥିବା ବିସ୍ଫୋରକ ବିସ୍ଫୋରଣ ହୋଇଥିବା କୁହାଯାଇଛି। ଡିଜିପିଙ୍କଠାରୁ ମୁଖ୍ୟମନ୍ତ୍ରୀ ଭାଗବନ୍ତ ମାନ ଏହି ବିଷୟରେ ସମ୍ପୂର୍ଣ୍ଣ ସୂଚନା ନେଇଛନ୍ତି। ମୁଖ୍ୟମନ୍ତ୍ରୀ ଅଧିକାରୀଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି।