ଇସଲାମାବାଦ, ୧୭।୧୨- ପାକିସ୍ତାନ ଦ୍ରୁତ ବୋଲର ମହମ୍ମଦ ଅମିର ଗୁରୁବାର ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ଜାତୀୟ କ୍ରିକେଟ ବୋର୍ଡ ପିସିବି ମ୍ୟାନଜମେଣ୍ଟ ବିରୋଧରେ ନିର୍ଯ୍ୟାତନା ଅଭିଯୋଗ ଆଣିବା ସହ ହଠାତ୍ ଅବସର ନିଷ୍ପତ୍ତି ନେଇ ସଭିଙ୍କୁ ଚକିତ କରିଦେଇଛନ୍ତି ଅମିର।
୨୮ ବର୍ଷୀୟ ବାମହାତୀ ଷ୍ଟାର ପେସର ପାକିସ୍ତାନୀ ଓ୍ବେବସାଇଟ୍ ‘ଖେଳ-ଶେଲ’କୁ ଏକ ଭିଡିଓ ସାକ୍ଷାତ୍କାର ଜରିଆରେ କହିଛନ୍ତି, ଜାତୀୟ ଦଳ ପାଇଁ ଆଉ ଖେଳିବେ ନାହିଁ। ମୁଁ ଅନ୍ତର୍ଜାତୀୟ ବର୍ତ୍ତମାନ କ୍ରିକେଟ ଛାଡ଼ୁଛି। କାରଣ ମୋତେ ମାନସିକ ନିର୍ଯ୍ୟାତନା ଦିଆଯାଉଛି। ମୁଁ ଏହା ସହ୍ୟ କରିପାରୁନାହିଁ। ୨୦୧୦ରୁ ୨୦୧୫ ପର୍ଯ୍ୟନ୍ତ ମୋତେ ଖୁବ୍ ନିର୍ଯ୍ୟାତନା ଦିଆଯାଇଥିଲା। ମୁଁ ଯାହା କରିଥିଲି, ସେଥି ପାଇଁ ଦଣ୍ଡ ମଧ୍ୟ ଭୋଗିଛି । ବାସନ୍ଦାଦେଶରୁ ଫେରିବା ପରେ କ୍ରିକେଟକୁ ଫେରିବା ଅତ୍ୟଧିକ କଷ୍ଟକର ଥିଲା। ସେତେବେଳେ ପୂର୍ବତନ ପିସିବି ମୁଖ୍ୟ ନଜାମ ସେଠି ଓ ପୂର୍ବତନ ଅଧିନାୟକ ଶାହିଦ ଆଫ୍ରିଦୀ ମୋତେ ସମର୍ଥନ କରିଥିଲେ। ସେହି ଦୁଇ ଜଣଙ୍କ ଲାଗି ହିଁ ମୁଁ ପୁଣି ଥରେ ଆରମ୍ଭ କରିପାରଥିଲି ଅନ୍ତର୍ଜାତୀୟ କ୍ୟାରିୟର।
ଉଲ୍ଲେଖଥାଉ କି, ସ୍ପଟ୍ ଫିକ୍ସିଂ ଯୋଗୁ ଅମିରଙ୍କୁ ୫ ବର୍ଷ ପାଇଁ ବାସନ୍ଦ କରାଯାଇଥିଲା। ସେ ଗତବର୍ଷ ଟେଷ୍ଟ କ୍ରିକେଟରୁ ସନ୍ନ୍ୟାସ ନେଇଥିଲେ। ୨୦୦୯ରେ ଟେଷ୍ଟ ପଦାର୍ପଣ କରିଥିବା ଅମିରଙ୍କ ନାମରେ ୩୬ ମ୍ୟାଚ୍ରେ ୧୧୯ ଉଇକେଟ ରହିଛି। ତାଙ୍କ ପ୍ରତିନିଧିତ୍ୱରେ ପାକିସ୍ତାନ ୨୦୦୯ ଟି୨୦ ବିଶ୍ୱକପ୍ ଓ ୨୦୧୭ ଚାମ୍ପିୟନ୍ସ ଟ୍ରଫି ଜିତିଥିଲା।
