ଲାହୋର,୨୮।୩ : ବଲକୁ ରିଭର୍ସ ସିଇଂ କରାଇବା ଲାଗି ଚିଟିଂ କରୁଥିଲେ କିମ୍ବଦନ୍ତୀ ପାକିସ୍ତାନ ପେସର ଓ୍ବାକର ୟୁନିସ। ଏଭଳି ମନ୍ତବ୍ୟ ଦେଇ ଅନ୍ତର୍ଜାତୀୟ ସ୍ତରରେ ୭୮୯ ଉଇକେଟ ହାତେଇଥିବା ଓ୍ବାକରଙ୍କ ଦକ୍ଷତା ଉପରେ ପ୍ରଶ୍ନ ଉଠାଇଛନ୍ତି ପୂର୍ବତନ ପାକିସ୍ତାନ ବୋଲର ତଥା ଫିକ୍ସିଂରେ ଜଡ଼ିତ ହୋଇ କ୍ରିକେଟରୁ ବିଦା ହୋଇଥିବା ମହମ୍ମଦ ଆସିଫ।
ଓ୍ବାକରଙ୍କୁ ନୂଆ ବଲରେ ବୋଲିଂ କରିବା ଜଣା ନ ଥିଲା। କ୍ୟାରିୟରର ଶେଷ ଆଡ଼କୁ ହିଁ ତାଙ୍କ ବୋଲିଂରେ ରିଭର୍ସ ସିଇଂ ଦେଖିବାକୁ ମିଳିଥିଲା। ସେଥି ପାଇଁ ଏବେ ତାଙ୍କୁ ସଫଳ ବୋଲର କୁହାଯାଉଛି। ସେ ଗତ ୨୦ ବର୍ଷ ହେଲା ଯୁବ କ୍ରିକେଟରଙ୍କୁ ପ୍ରଶିକ୍ଷଣ ଦେଉଛନ୍ତି। ହେଲେ ଏପର୍ଯ୍ୟନ୍ତ କୌଣସି ବୋଲର ସୃଷ୍ଟି କରିପାରି ନାହାନ୍ତି, ଯିଏ କି ରିଭର୍ସ ସୁଇଂ କରିପାରୁ ଥିବ। ଏହା ଦକ୍ଷତା ଉପରେ ପ୍ରଶ୍ନ ଉଠାଉଛି ବୋଲି ପାକିସ୍ତାନର ଏଆରଓ୍ବାଇ ନାମକ ଏକ ଚ୍ୟାନେଲକୁ ସାକ୍ଷାତ୍କାର ଦେଇ ଆସିଫ କହିଛନ୍ତି। ଉଲ୍ଲେଖଯୋଗ୍ୟ, ୨୦୧୦ରେ ପାକିସ୍ତାନ ଜାତୀୟ ଦଳର ଇଂଲଣ୍ଡ ଗସ୍ତବେଳେ ଆସିଫ ସ୍ପଟ୍ ଫିକ୍ସିଂ କରି କ୍ରିକେଟରୁ ବାସନ୍ଦ ହୋଇଥିଲେ। ଏଥି ନେଇ ତାଙ୍କୁ ଜେଲ ଯିବାକୁ ପଡ଼ିଥିଲା।