କଲ୍ୟାଣୀ, ୧୭ା୧୦ (ପି.ଟି.)-ଏଠାରେ ଶୁକ୍ରବାର ଅନୁଷ୍ଠିତ କ୍ୱାଲିଫାୟର୍ସରେ ଭବାନୀପୁର ଏଫ୍ସିକୁ ୨-୦ ଗୋଲରେ ପରାସ୍ତ କରିବା ପରେ ମହମ୍ମଡାନ ସ୍ପୋର୍ଟିଂ ୭ ବର୍ଷ ପରେ ଆଇ-ଲିଗ୍କୁ ପ୍ରତ୍ୟାବର୍ତ୍ତନ କରିଛି। ଦଳ ପକ୍ଷରୁ ଭାନ୍ଲାଲ୍ବା ଚାଙ୍ଗ୍ଟେ (୨୮ତମ ମିନିଟ୍) ଓ ଗାନି ଅହମ୍ମଦ ନିଗମ୍ (୬୭ତମ) ଗୋଲ ସ୍କୋର କରିଥିଲେ। କ୍ରମାଗତ ୩ଟି ବିଜୟ ସହ ୯ ପଏଣ୍ଟ ଅର୍ଜନ କର ଗୋଟିଏ ରାଉଣ୍ଡ ଖେଳ ବାକିଥାଇ ଯୋଗ୍ୟତା ଭିତ୍ତିରେ ଏକମାତ୍ର ଆଇ-ଲିଗ୍ ସ୍ଥାନ ହାସଲ କରିନେଇଛି। ଘଟଣାକ୍ରମେ ଅକ୍ଟୋବର ୧୯ରେ ଫାଇନାଲ ରାଉଣ୍ଡ ଖେଳ ହେବ। ସେଦିନ ମହମ୍ମଡାନ ସ୍ପୋର୍ଟିଂ ଏଫ୍ସି ବେଙ୍ଗାଲୁରୁ ୟୁନାଇଟେଡ୍ ସହ ମୁକାବିଲା କରିବାକୁ ଥିବାବେଳେ ଅନ୍ୟ ଏକ ମ୍ୟାଚ୍ ଆରା ଏଫ୍ସି ଓ ଭବାନୀପୁର ଏଫ୍ସି ମଧ୍ୟରେ ଖେଳାଯିବ। ମୋହନ ବାଗାନ ଓ ଇଷ୍ଟ ବେଙ୍ଗଲ ଇଣ୍ଡିଆନ ସୁପର ଲିଗ୍ରେ ଖେଳୁଥିବାରୁ ଏଥର ଆଇ-ଲିଗ୍ରେ କୋଲକାତାରୁ ଏକମାତ୍ର ଦଳ ଭାବେ ଭାଗ ନେବ ମହମ୍ମଡାନ ସ୍ପୋର୍ଟିଂ। ଆଇ-ଲିଗ୍ ଡିସେମ୍ବରରେ ଆରମ୍ଭ ହେବାର ସମ୍ଭାବନା ଅଛି।