କେପ ଟାଉନ୍,୧୧।୧: ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ରେ ଏପର୍ଯ୍ୟନ୍ତ ଭାରତୀୟ ଦଳ ପାଇଁ ସର୍ବାଧିକ ଉଇକେଟ ନେଇଥିବା ମହମ୍ମଦ ଶାମି ତୃତୀୟ ଟେଷ୍ଟରେ ଏକ ମାଇଲଷ୍ଟୋନ ସ୍ପର୍ଶ କରିପାରନ୍ତି। ଦୁଇଟି ମ୍ୟାଚ୍ରେ ୧୧ ଉଇକେଟ ନେଇଥିବା ଭାରତୀୟ ପେସରଙ୍କୁ ପ୍ରାଟିଜ ଦଳ ବିପକ୍ଷରେ ୫୦ ଉଇକେଟ ପୂରଣ କରିବା ପାଇଁ ଆଉ ୫ ଉଇକେଟ ଦରକାର। କେପ୍ ଟାଉନଠାରେ ଖେଳାଯିବାକୁ ଥିବା ନିର୍ଣ୍ଣାୟକ ଟେଷ୍ଟରେ ଶାମି ଯଦି ସଫଳ ହୁଅନ୍ତି, ତେବେ ସେ ଦକ୍ଷିଣ ଆଫ୍ରିକା ବିପକ୍ଷରେ ୫୦ ଟେଷ୍ଟ ଉଇକେଟ ନେବାରେ ଦ୍ୱିତୀୟ ଭାରତୀୟ ପେସର ହେବେ। ତାଙ୍କ ପୂର୍ବରୁ ଏକମାତ୍ର ଭାରତୀୟ ପେସର ଭାବେ ଜାଭଗଲ ଶ୍ରୀନାଥ ଏହି ସଫଳତା ହାତେଇଛନ୍ତି। ଶ୍ରୀନାଥଙ୍କ ବ୍ୟତୀତ ପ୍ରୋଟିଜ ଦଳ ବିପକ୍ଷରେ ୫୦ ଟେଷ୍ଟ ଉଇକେଟ ନେଇଥିବା ଭାରତୀୟ ବୋଲରଙ୍କ ତାଲିକାରେ କୌଣସି ପେସର ନାହାନ୍ତି। ଏହି ତାଲିକାରେ ଅନୀଲ କୁମ୍ବଲେ, ହରଭଜନ ସିଂ ଓ ରବିଚନ୍ଦ୍ରନ ଅଶ୍ୱିନ ଭଳି ମହାନ ସ୍ପିନର ରହିଛନ୍ତି।
କିମ୍ବଦନ୍ତୀ ସ୍ପିନର କୁମ୍ବଲେ ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ୮୪ ଉଇକେଟ ନେଇଥିଲେ। ୬୪ ଉଇକେଟ ସହ ଶ୍ରୀନାଥ ଦ୍ୱିତୀୟ ସ୍ଥାନରେ ଥିବା ବେଳେ ତାଙ୍କ ପଛକୁ ହରଭଜନ (୬୦ ଉଇକେଟ) ଓ ଅଶ୍ୱିନ (୫୬*) ରହିଛନ୍ତି। କ୍ୟାରିୟରରେ ଏପର୍ଯ୍ୟନ୍ତ ଦକ୍ଷିଣ ଆଫ୍ରିକା ବିପକ୍ଷରେ ୧୦ ମ୍ୟାଚ୍ ଖେଳିଥିବା ଶାମିଙ୍କ ନାମରେ ୪୫ ଉଇକେଟ ରହିଛି।