ସେଞ୍ଚୁରିଆନ,୩୦।୧୨: ମହମ୍ମଦ ଶାମି ବିଶ୍ୱର ଶ୍ରେଷ୍ଠ ୩ ପେସରଙ୍କ ମଧ୍ୟରୁ ଜଣେ। ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟକୁ ୧୧୩ ରନ୍ରେ ଜିତିବା ପରେ ଭାରତୀୟ ପେସରଙ୍କୁ ଏଭଳି ପ୍ରଶଂସା କରିଛନ୍ତି ଅଧିନାୟକ ବିରାଟ କୋହଲି। ସେଞ୍ଚୁରିଆନ ଟେଷ୍ଟର ପ୍ରଥମ ଇନିଂସରେ ୪୪ ରନ୍ ବିନିମୟରେ ୫ ଉଇକେଟ ନେଇଥିବା ଶାମି ଦ୍ୱିତୀୟ ପାଳିରେ ୩ ଉଇକେଟ ହାତେଇଥିଲେ। ତାଙ୍କ ପ୍ରଦର୍ଶନ କାରଣରୁ ଟିମ୍ ଇଣ୍ଡିଆ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି।
“ଶାମି ଜଣେ ବିଶ୍ୱ ସ୍ତରୀୟ ବୋଲର। ବିଶ୍ୱର ଶ୍ରେଷ୍ଠ ୩ ପେସରଙ୍କ ମଧ୍ୟରୁ ସେ ଜଣେ। ତାଙ୍କର ପ୍ରଭାବୀ ପ୍ରଦର୍ଶନ ଏବଂ ୨୦୦ ଉଇକେଟ ମାଇଲଷ୍ଟୋନ ଲାଗି ମୁଁ ଅତ୍ୟନ୍ତ ଆନନ୍ଦିତ। ଆମେ ଯେଉଁଭଳି ଆରମ୍ଭ ଚାହୁଁଥିଲୁ, ତାହା ଆମକୁ ମିଳିଛି। ୪ ଦିନ ମଧ୍ୟରେ ଏଭଳି ଫଳାଫଳ ଆମ ପ୍ରଦର୍ଶନକୁ ଦର୍ଶାଉଛି। ଦକ୍ଷିଣ ଆଫ୍ରିକା ସର୍ବଦା ଏକ କଷ୍ଟକର ସ୍ଥାନ। କିନ୍ତୁ ଆମେ ବ୍ୟାଟିଂ, ବୋଲିଂ ଓ ଫିଲ୍ଡିଂ ପ୍ରତ୍ୟେକ ବିଭାଗରେ ଭଲ ପ୍ରଦର୍ଶନ କରିଥିଲୁ। ଦଳକୁ ପୋଲ ପୋଜିଶନରେ ପହଞ୍ଚାଇବା ପାଇଁ ଲୋକେଶ ରାହୁଲ ଓ ମୟଙ୍କ ଅଗ୍ରଓ୍ବାଲଙ୍କୁ ଅନେକ ଶ୍ରେୟ ଦେବାକୁ ପଡ଼ିବ” ବୋଲି କୋହଲି କହିଛନ୍ତି।