କୋଲକାତା, ୨୭।୬- କରୋନା ଭାଇରସ ଲାଗି ଦୀର୍ଘ ଦିନ ଧରି କ୍ରିକେଟ୍ରୁ ଦୂରେଇ ରହିଥିବା ଭାରତୀୟ ଦଳର ଖେଳାଳିମାନେ ଏବେ ଧିରେ ଧିରେ ପଡ଼ିଆକୁ ପ୍ରତ୍ୟାବର୍ତ୍ତନ କରୁଥିବା ଦେଖିବାକୁ ମିଳୁଛି। ପୂର୍ବରୁ ଚେତେଶ୍ୱର ପୂଜାରା, ଇଶାନ୍ତ ଶର୍ମା, ରୋହିତ୍ ଶର୍ମା ପ୍ରମୁଖ ସେମାନଙ୍କ ଅଭ୍ୟାସ ଆରମ୍ଭ କରିସାରିଛନ୍ତି। ଏବେ ଭାରତୀୟ ଦଳର ପ୍ରମୁଖ ଦ୍ରୁତ ବୋଲର ମହମ୍ମଦ ସାମି ଟ୍ରେନିଂ ଆରମ୍ଭ କରିଥିବା ଜଣାପଡ଼ିଛି। ଟ୍ରେନିଂ ଅବସରର ଏକ ଭିଡିଓକୁ ସାମି ନିଜ ଇନ୍ଷ୍ଟାଗ୍ରାମରେ ପୋଷ୍ଟ କରିଛନ୍ତି। ଯେଉଁଥିରେ ସେ ନିଜ ଦୌଡ଼ର ବେଗ ବଢ଼ାଇବା ପାଇଁ ପୋଷା କୁକୁରର ସହାୟତା ନେଇଛନ୍ତି। ଏହି ଭିଡିଓରେ ସାମି ତାଙ୍କ ପୋଷା କୁକୁର ଜ୍ୟାକ୍ ସହ ଏକାଠି ଦୌଡ଼ୁଥିବାରୁ ଦେଖିବାକୁ ମିଳିଛି। ଦୌଡ଼ ଆରମ୍ଭରୁ ଆଗରେ ରହିଥିବା ସାମି କିନ୍ତୁ ଅନ୍ତିମ ଭାଗରେ ଜ୍ୟାକ୍ଠାରୁ ପଛରେ ପଡ଼ିଯାଇଛନ୍ତି। ଏହି ଭିଡିଓ ତଳେ ସାମି ‘ସ୍ପିଡ୍ ଓ୍ବର୍କ ଓ୍ବିଥ୍ ଜ୍ୟାକ୍’ ବୋଲି ଏକ କ୍ୟାପ୍ସନ ଲେଖିଛନ୍ତି। ବେଗ ବଢ଼ାଇବା ପାଇଁ ସାମିଙ୍କ ଏହି ଉପାୟକୁ ଅନେକ ପ୍ରଶଂସକ ପସନ୍ଦ କରିଛନ୍ତି।
