ନୂଆଦିଲ୍ଲୀ,୪।୬: ଗତ ବର୍ଷ ଭାରତୀୟ ଟିମ୍ରୁ ଡେବ୍ୟୁ କରିବାର ସୌଭାଗ୍ୟ ପାଇଥିଲେ ଦ୍ରୁତ ବୋଲର୍ ମହମ୍ମଦ ସିରାଜ। ଏବେ ସେ ସଫଳତାର ଗୋଟିଏ ପରେ ଗୋଟିଏ ସିଢ଼ୀ ଚଢ଼ୁଥିବା ବେଳେ ପୁରୁଣା ଦିନକୁ ଭୁଲି ନାହାନ୍ତି ସିରାଜ।
କ୍ରିକେଟ ଯୋଗୁ ସିରାଜଙ୍କ ଜୀବନ ବଦଳିଯାଇଛି। ଏବେ ତାଙ୍କ ପାଖରେ ବିଳାସପୂର୍ଣ୍ଣ କାର୍ ଏବଂ ଭଳିକି ଭଳି ବାଇକ୍ ଅଛି। ପ୍ରାସାଦ ଭଳି ଘର ବି ଅଛି। ହେଲେ ଏକ ସମୟରେ ବୋଲରଙ୍କ ପାଖରେ ବଜାଜ ପ୍ଲାଟିନାର ଏକ ପୁରୁଣା ବାଇକ୍ ଥିଲା। କ୍ରିକେଟ ଖେଳିବାର ପ୍ରାରମ୍ଭିକ ସଂଘର୍ଷ ଦିନ ଏହି ଗାଡ଼ିରେ ଚଳିଥିଲା। ସେଥିରେ ସେଲ୍ଫ ଷ୍ଟାର୍ଟ ନ ଥିଲା ନା କିକ୍। କିଛି ବାଟ ଚଳାଇ ଆଣିବା ପରେ ତାହା ଷ୍ଟାଟ୍ ହେଉଥିଲା। ଏହାଦ୍ୱାରା ଠିକ୍ ସମୟରେ ପଡ଼ିଆରେ ପହଞ୍ଚିପାରୁଥିଲେ ହେଁ ଲାଜ ଲାଗୁଥିଲା।
ହାଇଦ୍ରାବାଦରେ ମ୍ୟାଚ୍ ଖେଳୁଥିଲେ, ପ୍ରାକ୍ଟିସ ନଚେତ ମ୍ୟାଚ୍ ପରେ ସାଥୀ ଖେଳାଳିଙ୍କ ଯିବାକୁ ଅପେକ୍ଷା କରୁଥିଲେ ସିରାଜ। ସେମାନେ ନିଜ ନିଜ କାରରେ ଷ୍ଟାଡିୟମ ବାହାରକୁ ଯିବା ପରେ ବାଇକ୍ରେ ବାହାରୁଥିଲେ ସେ। ଏବେ ତାଙ୍କ ପାଖରେ ଦାମୀ ଗାଡ଼ି ଥିଲେ ହେଁ ସେ ପ୍ଲାଟିନା ବାଇକ୍କୁ ସାଇତି ରଖିଛନ୍ତି। ଏହା ସଂଘର୍ଷର ଦିନକୁ ମନେ ପକାଉଛି। ସେଥିରୁ ଭଲ ବୋଲିଂ କରିବାକୁ ପ୍ରେରଣା ମିଳୁଥିବା ସିରାଜ ଏକ ସାକ୍ଷାତକାରରେ କହିଛନ୍ତି।