କୋଲକାତା, ୮ା୭ (ପି.ଟି.)-ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ) ଦଳ ଏଟିକେ ସହିତ ବିଧିବଦ୍ଧ ମିଶ୍ରଣର ୩ ଦିନ ପୂର୍ବରୁ ସହରର ଅନ୍ୟତମ ଶକ୍ତିଶାଳୀ ଫୁଟ୍ବଲ କ୍ଲବ ମୋହନବାଗାନ ଏହାର ଖେଳାଳି, କୋଚ୍ ଏବଂ ସପୋର୍ଟ ଷ୍ଟାଫ୍ଙ୍କୁ ସେମାନଙ୍କ ବକେୟା ପାଉଣା ପ୍ରଦାନ କରିଛି। ଶୁକ୍ରବାର ହେବାକୁଥିବା ଏଟିକେ-ମୋହନବାଗାନର ପ୍ରଥମ ବୋର୍ଡ ବୈଠକରେ ୭ ଡାଇରେକ୍ଟର ଯୋଗ ଦେବେ। ସେଦିନ ଦୁଇଟି କ୍ଲବର ମିଶ୍ରଣକୁ ବିଧିବଦ୍ଧ ଘୋଷଣା କରାଯିବ। ବୈଠକରେ କ୍ଲବର ନାମ, ଲୋଗୋ ଏବଂ ଜର୍ସି ଚୂଡ଼ାନ୍ତ କରାଯିବ। ଆଇ-ଲିଗ୍ ଚାମ୍ପିୟନ ଦଳ ଖେଳାଳିମାନେ ମେ ମାସରେ ସେମାନଙ୍କ ବଜେୟା ପାଉଣା ଦେଇ ଦେବାଲାଗି କ୍ଲବକୁ ଚିଠି ଲେଖିଥିଲେ। ମାତ୍ର କରୋନାଭାଇରସ୍ ଯୋଗୁ ଲକ୍ଡାଉନ୍ ଚାଲିଥିବାରୁ ଏଥିରେ ବିଳମ୍ବ ଘଟିଛି ବୋଲି ମୋହନବାଗାନ ତରଫରୁ ସଫେଇ ଦିଆଯାଇଥିଲା। ଜୁଲାଇ ୨୦ ସୁଦ୍ଧା ସମସ୍ତ ବକେୟା ପାଉଣା ପ୍ରଦାନ କରାଯିବ ବୋଲି କ୍ଲବ ତରଫରୁ ସ୍ପଷ୍ଟ କରାଯାଇଥିଲା।
