କୋଲକାତା, ୨ା୧୦ (ପି.ଟି.)-ଶେଷରେ ଅକ୍ଟୋବର ୧୭ରେ କ୍ଲବ ଟେଣ୍ଟ୍ରେ ଆଇ-ଲିଗ୍ ଟ୍ରଫି ଗ୍ରହଣ କରିବ ସହରର ପ୍ରମୁଖ ଫୁଟ୍ବଲ ଦଳ ମୋହନବାଗାନ। ଦଳ ୭ ମାସ ପୂର୍ବରୁ ବିଜେତା ଘୋଷଣା ହୋଇ ସାରିଥିଲା। ସମସ୍ତ ପ୍ରକାର କୋଭିଡ୍-୧୯ ପ୍ରୋଟୋକଲ ପାଳନ ସହ ଆୟୋଜିତ ହେବାକୁଥିବା ଏକ ସ୍ବତନ୍ତ୍ର ଉତ୍ସବରେ ସର୍ବ ଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ସମ୍ପାଦକ କୁଶାଲ ଦାସ ଟ୍ରଫି ହସ୍ତାନ୍ତର କରିବେ ବୋଲି କ୍ଲବ ସୂତ୍ରରୁ ପ୍ରକାଶ। ମାର୍ଚ୍ଚ ୧୦ରେ ପୂର୍ବତନ ଚାମ୍ପିୟନ ଆଇଜଲ ଏଫ୍ସିକୁ ୧-୦ ଗୋଲରେ ପରାସ୍ତ କରିବା ପରେ ଆଉ ୪ ରାଉଣ୍ଡ ଖେଳ ବାକି ଥାଇ ମୋହନବାଗାନ ଆଇ-ଲିଗ୍ ଟ୍ରଫି ହାସଲ କରିନେଇଥିଲା। ମୋହନ ବାଗାନର ସେନେଗାଲ ଷ୍ଟ୍ରାଇକର ବାବା ଦିଓ୍ବାରା ବିଜୟସୂଚକ ଗୋଲଟିକୁ ସ୍କୋର କରିଥିଲେ। ମୋହନ ବାଗାନ ଚାମ୍ପିୟନ ଘୋଷିତ ହୋଇ ସାରିଥିଲେ ମଧ୍ୟ କୋଭିଡ୍-୧୯ ମହାମାରୀ ଯୋଗୁ ଟ୍ରଫି ପାଇ ନ ଥିଲା। ଟ୍ରଫି ପ୍ରଦାନ କ୍ଲବ ଟେଣ୍ଟରେ ଆୟୋଜନ ହେବ। ଦଳର ସଦସ୍ୟମାନେ ଭର୍ଚୁଆଲ ଉପସ୍ଥିତ ରହିବେ। ଅକ୍ଟୋବର ୧୬ରୁ ଟେଣ୍ଟ ଖୋଲିବା ଲାଗି କ୍ଲବର କାର୍ଯ୍ୟନିର୍ବାହୀ କମିଟି ଗୁରୁବାର ନିଷ୍ପତ୍ତି ନେଇଛି।
