ଆର.ଉଦୟଗିରି,୧୬।୨(ଡି.ଏନ୍.ଏ): ଗଜପତି ଜିଲାର ମୋହନା ବ୍ଲକରେ ପ୍ରଥମ ପର୍ଯ୍ୟାୟରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ମତଦାନ ଆରମ୍ଭ ହୋଇଛି। ସକାଳ ୭ଟାରୁ ଭୋଟ ଗ୍ରହଣ ଆରମ୍ଭ ହୋଇଥିବା ବେଳେ ଦିନ ଗୋଟାଏରେ ଶେଷ ହେବ। ସକାଳୁ ଲମ୍ବାଲାଇନ୍ରେ ଠିଆ ହୋଇ ଶାନ୍ତି ଶୃଙ୍ଖଳା ସହ ଭୋଟରମାନେ ନିଜର ମତଦାନ ସାବ୍ୟସ୍ତ କରିଛନ୍ତି। ବୁଥ୍ଗୁଡ଼ିକରେ ଲମ୍ବାଲାଇନ ଲାଗିଥିବାରୁ ପୂର୍ବରୁ ଧାର୍ଯ୍ୟ ହୋଇଥିବା ସମୟ ପରେ ମଧ୍ୟ ମତଦାନ ଜାରି ରହିପାରେ ବୋଲି ଆଶା କରାଯାଉଛି। ସୂଚନାଯୋଗ୍ୟ, ଓଡ଼ିଶାର ୩୦ଜିଲାର ୭୧ଟି ବ୍ଲକରେ ୧୬୬୯ଟି ଗ୍ରାମପଞ୍ଚାୟତରେ ୬୭ଲକ୍ଷ ୫୧ହଜାର ମତଦାତା ୨୨୩୭୯ବୁଥରେ ସେମାନଙ୍କ ଅଞ୍ଚଚଳର ସରପଞ୍ଚ, ସମିତି ସଭ୍ୟ, ୱାର୍ଡ ମେମ୍ବର ଓ ୨୦୦ଟି ଜିଲା ପରିଷଦ ସଭ୍ୟଙ୍କୁ ଚୟନ କରିବେ। ସେଥିମଧ୍ୟରୁ ଗଜପତି ଜିଲାର ୩ଟି ଜିଲା ପରିଷଦ ଆସନ ଥିବା ବେଳେ ମୋହନା ବ୍ଲକରେ ୫୩୫ଟି ବୁଥରେ ୯୧୯୩୨ଭୋଟର ମତ ସାବ୍ୟସ୍ତ କରିବେ। ମୋହନା ବ୍ଲକରେ ମତଦାନ ପାଇଁ ବୁଥ୍ଗୁଡ଼ିକରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ସ୍ଥାନୀୟ ବିଡ଼ିଓ ତପସ୍ବିନୀ ହାସଦା ନିଜ କର୍ମଚାରୀଙ୍କୁ ନେଇ ନିର୍ବାଚନ ପରିଚାଳନା କରୁଥିବା ବେଳେ ସ୍ଥାନୀୟ ଏସ୍ଡିପିଓ ଥାନା ଅଧିକାରୀ ଏବଂ ନିଜ କର୍ମଚାରୀଙ୍କୁ ନେଇ ଶାନ୍ତି ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରୁଥିବା ଜଣାପଡିଛି।