କରାଚି,୧୭।୧୨: ପାକିସ୍ତାନର ବାମହାତୀ ଦ୍ରୁତ ବୋଲର ମହମ୍ମଦ ଆମିର ଗୁରୁବାର ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ଘୋଷଣା କରି ପ୍ରଶଂସକଙ୍କୁ ଚମକାଇ ଦେଇଛନ୍ତି। ଏଥିସହ ସେ ପାକିସ୍ତାନ କ୍ରିକେଟ କଣ୍ଟ୍ରୋଲ ବୋର୍ଡ(ପିସିବି) ତାଙ୍କୁ ମାନସିକ ନିର୍ଯାତନା ଦେଉଥିବା ସେ ଅଭିଯୋଗ କରିଛନ୍ତି। ତେବେ ୨୦୧୭ରେ ଭାରତ ବିପକ୍ଷରେ ଖେଳାଯାଇଥିବା ଫାଇନାଲ ମ୍ୟାଚ୍ରେ ଚମତ୍କାର ବୋଲିଂ କରି ପାକିସ୍ତାନ ପାଇଁ ଚାମ୍ପିଅନ୍ସ ଟ୍ରଫି ଜିତିଥିଲେ ଆମିର। ହେଲେ ଅଚାନକ ତାଙ୍କର ଏଭଳି ନିଷ୍ପତ୍ତି ଅନେକଙ୍କୁ ନିରାଶ କରିଛି।
ଆମିରଙ୍କ ଖେଳ ଜୀବନକୁ ଯଦି ଦେଖାଯାଏ ତେବେ ସେ ମାତ୍ର ୧୭ ବର୍ଷ ବୟସରେ ଡେବ୍ୟୁ କରିଥିଲେ। ହେଲେ ପରବର୍ତ୍ତୀ ସମୟରେ ସେ ଇଂଲଣ୍ଡରେ ସ୍ପୋର୍ଟ ଫିକ୍ସିଂ ମାମଲାରେ ଛନ୍ଦି ହୋଇ ପଡ଼ିଥିଲେ। ଏଣୁ ତାଙ୍କୁ ଅନ୍ତର୍ଜାତୀୟ କ୍ରିକେଟ ଖେଳିବା ପାଇଁ ୫ ବର୍ଷ ଯାଏ ବାରଣ କରାଯାଇଥିଲା। ଏଭଳି ପରିସ୍ଥିତିରେ ସେ ପ୍ରତ୍ୟାବର୍ତ୍ତନ କରି ଅନ୍ତର୍ଜାତୀୟ କ୍ରିକେଟରେ ସଫଳତା ହାସଲ କରିଥିଲେ।
ଇତିମଧ୍ୟରେ ସେ ପାକିସ୍ତାନ ପାଇଁ ୩୬ ଟେଷ୍ଟ, ୬୧ ଦିନିକିଆ, ୫୦ଟି ଟି୨୦ ମ୍ୟାଚ୍ରେ ଖେଳି ମୋଟ ୨୫୯ଟି ଉଇକେଟ ନେଇଛନ୍ତି। ସେ ଟେଷ୍ଟରେ ୧୧୯, ଦିନିକିଆରେ ୮୧, ଟି୨୦ରେ ୫୯ ଉଇକେଟ ନେଇଥିଲେ। ୨୦୧୯ ବିଶ୍ୱକପ୍ ପରେ ସେ ଟେଷ୍ଟ କ୍ରିକେଟରୁ ସନ୍ୟାସ ନେଇଥିବା ବେଳେ ଏବେ ନିଜର ଅବସର ଘୋଷଣା କରିଛନ୍ତି।