ମୁମ୍ବାଇ:୨୦୧୮ରେ ନେଟ୍ଫ୍ଲିକ୍ସରେ ମୁକ୍ତିଲାଭ କରିଥିବା ‘ଲଷ୍ଟ ଷ୍ଟୋରିଜ୍’ ଶର୍ଟ ଫିଲ୍ମରେ ଚଳଚ୍ଚିତ୍ର ନିର୍ମାତା କରନ୍ ଜୋହର ଅଭିନେତ୍ରୀ କିଆରା ଆଡଭାନୀଙ୍କ ଚରିତ୍ର ପାଇଁ ଉପଯୁକ୍ତ ଆକ୍ଟ୍ରେସ୍ ଖୋଜୁଥିଲେ। ଏଥିପାଇଁ କରନ ପ୍ରଥମେ କ୍ରୀତି ସାନନଙ୍କୁ ବାଛିଥିଲେ। ହେଲେ କ୍ରୀତି ‘ଲଷ୍ଟ ଷ୍ଟୋରିଜ୍’ରେ କାମ କରିବା ପାଇଁ ମନା କରିଥିଲେ। କ୍ରୀତିଙ୍କ ମା’ ଏହି ରୋଲ୍ କରିବାକୁ ଅନୁମତି ଦେଇ ନ ଥିଲେ ବୋଲି ଅଭିନେତ୍ରୀ ଜଣକ କରନଙ୍କୁ କହିଥିଲେ। ହଟ୍ଷ୍ଟାର୍ରେ ରିଲିଜ ହୋଇଥିବା ‘କଫି ଉଇଥ୍ କରନ୍’ର ସଦ୍ୟ ଏପିସୋଡ୍ରେ କରନ୍ ଜୋହର ଏହା ପ୍ରକାଶ କରିଛନ୍ତି। ବାସ୍ତବରେ ଲଷ୍ଟ ଷ୍ଟୋରିଜ୍ ମହିଳାଙ୍କ ସେକ୍ସୁଆଲ ପ୍ଲେଜର(ଯୌନ ସୁଖ) ଅଧିକାର ଉପରେ ଆଧାରିତ ଏବଂ ଏକ ସଶକ୍ତୀକରଣ କାହାଣୀ ବୋଲି କରନ୍ କହିଥିଲେ। କିଆରାଙ୍କୁ କରନ୍ ମନିଷ ମାଲ୍ହୋତ୍ରାଙ୍କ ଘରେ ଭେଟିବା ପରେ ତାଙ୍କୁ ଏହି ଶର୍ଟ ଫିଲ୍ମରେ ଅଭିନୟ କରିବାକୁ ଅଫର ଦେଇଥିଲେ। କିଆରା କରନ୍ଙ୍କୁ ପଚାରିଥିଲେ ‘କ’ଣ ଆପଣ ଏହାର ନିର୍ଦ୍ଦେଶନା ଦେଉଛନ୍ତି’। କରନ୍ ହଁ କହିବା ପରେ କିଆରା ତୁରନ୍ତ ଏହି ଚରିତ୍ରରେ ଅଭିନୟ କରିବା ପାଇଁ ରାଜି ହୋଇଯାଇଥିଲେ ବୋଲି ଫିଲ୍ମ ନିର୍ମାତା ଜଣକ ଉକ୍ତ ଏପିସୋଡ୍ରେ କହିଛନ୍ତି। କିଆରା ଲଷ୍ଟ ଷ୍ଟୋରିଜ୍ରେ ମେଘା ଚରିତ୍ରରେ ଅଛନ୍ତି। ମେଘା ଜଣେ ନବବିବାହିତା ହୋଇଥିବାବେଳେ ସ୍ବାମୀ ପାରସ୍ (ଭିକି କୌଶଲ) ସେକ୍ସୁଆଲ ପ୍ଲେଜର ଦେବାରେ ଅସମର୍ଥ ହେଉଛନ୍ତି। ଏଥିପାଇଁ ମେଘା ବିକଳ୍ପ ପନ୍ଥା ଆପଣାଇବା ଉପରେ କାହାଣୀ ଗତିଶୀଳ ହୋଇଛି।