ଟୋକିଓ,୨୭।୭: ଟୋକିଓ ଅଲିମ୍ପିକ୍ସରେ ସ୍ବଳ୍ପ ବୟସ୍କା ବାଳିକାଙ୍କ ଚମକ ଦେଖିବାକୁ ମିଳିଛି। ସ୍କେଟବୋର୍ଡିଂରେ ୧୩ ବର୍ଷୀୟ ଦୁଇଜଣ ଖେଳାଳି ସ୍ବର୍ଣ୍ଣ ଓ ରୌପ୍ୟ ପଦକ ଜିତିଥିବା ବେଳେ ଜଣେ ୧୬ ବର୍ଷୀୟା ଖେଳାଳି ବ୍ରୋଞ୍ଜ ପଦକ ହାସଲ କରିଛନ୍ତି। ମହିଳା ସ୍କେଟ ବୋର୍ଡିଂରେ ଜାପାନର ୧୩ ବର୍ଷୀୟା ମୋମିଜୀ ନିଶିୟା ସ୍ବର୍ଣ୍ଣ ପଦକ ହାସଲ କରିଛନ୍ତି। ସେହିପରି ବ୍ରାଜିଲର ୧୩ ବର୍ଷୀୟା ଖେଳାଳି ରେସା ଲିୟଲ ରୌପ୍ୟ ପଦକ ହାସଲ କରିଛନ୍ତି। ସେହିପରି ଜାପାନର ଅନ୍ୟତମ ଖେଳାଳି ଫୁନା ନାକାୟାମା ଏହି ଇଭେଣ୍ଟରେ ବ୍ରୋଞ୍ଜ ପଦକ ଜିତିଛନ୍ତି। ମୋମିଜୀ ସୋମବାର ୧୩ ବର୍ଷ ୩୩୦ ଦିନ ବୟସରେ ସ୍ବର୍ଣ୍ଣ ପଦକ ଜିତି ଅନ୍ୟତମ ସର୍ବକନିଷ୍ଠ ଅଲିମ୍ପିକ୍ସ ସ୍ବର୍ଣ୍ଣ ପଦକ ବିଜୟିନୀ ସାବ୍ୟସ୍ତ ହୋଇଛନ୍ତି।