ଛତ୍ରପୁର,୩ ।୧(ଡି.ଏନ.ଏ.): ଅସହାୟ ମୋନାଲିସା ଏବେ ଏକାକୀ। ପକ୍ଷଘାତ ରୋଗ ପରେ ସ୍ବାମୀ ତାଙ୍କୁ ତଡିଦେଲେ। ଏପରିକି ୨ବର୍ଷ ବୟସର ଝିଅକୁ ମଧ୍ୟ ମା’ ପାଖରୁ ଦୂରେଇ ରଖିଛନ୍ତି। ଏହି ବିପଦ ସମୟରେ ସ୍ବାମୀ ପଚାରୁ ନ ଥିବାରୁ ମୋନାଲିସା ନ୍ୟାୟ ଅପେକ୍ଷାରେ ଅଛନ୍ତି । ଏ ନେଇ ସୋମବାର ଗଞ୍ଜାମ ଜିଲାପାଳ ଅଭିଯୋଗ ଶୁଣାଣିରେ କିପରି ମୋନାଲିସାଙ୍କୁ ନ୍ୟାୟ ମିଳିବ ଏବଂ ଦିଗପହଣ୍ଡି ଥାନାରେ ଦିଆଯାଇଥିବା ଅଭିଯୋଗ ରିଓପନ ହେବା ନେଇ ଅଭିଯୋଗ ଶୁଣାଣିରେ ସ୍ମାରକପତ୍ର ପ୍ରଦାନ କରିଛନ୍ତି ।
ଛତ୍ରପୁର ବଡଷ୍ଟେଶନ ରୋଡରେ ରହୁଥିବା ତାରାକାନ୍ତ ରଥଙ୍କ ଝିଅ ମୋନାଲିସା ଓ ସ୍ତ୍ରୀ ଦୁହେଁ ସୋମବାର ଜିଲାପାଳଙ୍କ ଅଭିଯୋଗ ଶୁଣାଣିରେ ଜିଲାପାଳଙ୍କ ଅନୁପସ୍ଥିତିରେ ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଭି.ର୍କିତ୍ତୀ ଭାସନଙ୍କୁ ଭେଟି ଘଟଣା ସମ୍ପର୍କରେ କହିବା ସହ ଏକ ସ୍ମାରକପତ୍ର ପ୍ରଦାନ କରିଥିଲେ । ହିନ୍ଦୁ ବୈଦିକ ରିତିନୀତିରେ ଅବସରପ୍ରାପ୍ତ ପୋଲିସ କର୍ମଚାରୀ ତାରାକାନ୍ତ ରଥଙ୍କ ଏକମାତ୍ର ଝିଅ ମୋନାଲିସା ସହ ଦିଗପହଣ୍ଡି ଥାନା ଅଧିନ ଭୀଷ୍ମଗିରିର ରମାବଲ୍ଲଭ ବକ୍ସିଙ୍କ ପୁଅ ଶକ୍ତି ଶଙ୍କର ବକ୍ସି ସହ ୨୦୧୩ ଜାନୁୟାରୀ ୨୩ ତାରିଖରେ ବିବାହ ହୋଇଥିଲା। ସ୍ବାମୀ ଓ ସ୍ତ୍ରୀ ଉଭୟ ଦୁଇ ଜଣ ଉଚ୍ଚଶିକ୍ଷିତ ଥିବାରୁ ଚେନ୍ନାଇରେ କାମ କରୁଥିଲେ। ସବୁ ଠିକ ଚାଲିଥିଲା। କୈାଣସି କାରଣବଶତଃ ଦୁଇଥର ଗର୍ଭନଷ୍ଟ ହୋଇଯାଇଥିଲା। ପରେ ସେମାନେ ବାଙ୍ଗାଲୋର ଗଲାପରେ ସେଠାରେ ରହିବା ସମୟରେ ଗର୍ଭବତୀ ହୋଇଥିଲେ ମୋନାଲିସା। କିନ୍ତୁ ଡାକ୍ତର ତାଙ୍କୁ ବେଡରେଷ୍ଟ କରିବା ପାଇଁ କହିଥିଲେ। ସେହି ସମୟରେ ଶାଶୁଘର ଲୋକ ମୋନାଲିସାଙ୍କୁ ନିର୍ଯାାତନ ଦେବା ଆରମ୍ଭ କରିଦେଇଥିଲେ । ପରେ ୨୦୨୦ ଜୁଲାଇ ୨୪ରେ ଝିଅ ଜନ୍ମ ହେଲା । କିନ୍ତୁ ତାଙ୍କ ମୋବାଇଲ ନେଇଯାଇଥିବାରୁ ବାପା ମା’ଙ୍କ ସହ ମୋନାଲିସାଙ୍କର ଯୋଗାଯୋଗ ହୋଇପାରୁ ନ ଥିଲା । ପରେ ଏହି ସବୁ ବିଷୟ ମୋନାଲିସା ଲୁଚି ଛପି ସମସ୍ତ ବିଷୟରେ ଫୋନ ଦ୍ୱାରା ବାପା ଓ ମା’ଙ୍କୁ ଜଣାଇଥିଲେ। ପରେ ସେମାନେ ବାଙ୍ଗାଲୋର ଆସିଥିଲେ । ଏହାପରେ ମୋନାଲିସା ପକ୍ଷଘାତର ଶିକାର ହୋଇଥିଲେ । ବାଧ୍ୟ ହୋଇ ବାପା ଓ ମା’ ମୋନାଲିସାଙ୍କୁ ଛତ୍ରପୁର ଆଣିଥିଲେ । କିନ୍ତୁ ମୋନାଲିସାଙ୍କ କୁନି ଝିଅକୁ ସେମାନେ ଛାଡିନଥିଲେ । ପରେ ସମସ୍ତ ଘଟଣାକୁ ନେଇ ଦିଗପହଣ୍ଡି ଥାନା ରେ ଏକ ଏତଲା ଦେଇଥିଲେ ବି ପୋଲିସ କୈାଣସି କାର୍ଯ୍ୟାନୁଷ୍ଠାନ ନେଇ ନ ଥିବା ମୋନାଲିସାଙ୍କ ପରିବାର ଲୋକ ଅଭିଯୋଗ କରିଛନ୍ତି । ଏହି ପକ୍ଷଘାତ ଦୁଃଖ ସମୟରେ ସ୍ବାମୀ ବାଙ୍ଗାଲୋର ଥାଇ ମଧ୍ୟ କୋର୍ଟ ମାଧ୍ୟମରେ ଛାଡପତ୍ର ନୋଟିସ ଦେଇଥିବା କହିଥିଲେ । କିନ୍ତୁ ମୋନାଲିସା ଛାଡପତ୍ର ଦେବାକୁ ନାରାଜ। ଝିଅ ଓ ସ୍ବାମୀଙ୍କ ପାଖରେ ରହିବାକୁ ଇଚ୍ଛା କରିଛନ୍ତି ।