ସିଡନୀ,୨୪।୧୨: ଅଷ୍ଟ୍ରେଲୀୟ ଦ୍ରୁତ ବୋଲର ମିଚେଲ ଷ୍ଟାର୍କ ଚଳିତବର୍ଷ ଆଇପିଏଲର ସବୁଠୁ ଦାମୀ ଖେଳାଳି ହୋଇଛନ୍ତି। ଗତ ସପ୍ତାହରେ ଅନୁଷ୍ଠିତ ନିଲାମରେ ଦୁଇଥର ଚାମ୍ପିଅନ କୋଲକାତା ନାଇଟ ରାଇଡର୍ସ ମିଚେଲ ଷ୍ଟାର୍କଙ୍କୁ ୨୪ କୋଟି ୭୫ ଲକ୍ଷ ଟଙ୍କାରେ କିଣିଥିଲା। ଫ୍ରାଞ୍ଚାଇଜ ଲିଗ ଅପେକ୍ଷା ଷ୍ଟାର୍କ ସର୍ବଦା ଅନ୍ତର୍ଜାତୀୟ କ୍ରିକେଟକୁ ଅଧିକ ଗୁରୁତ୍ୱ ଦେଇଥାଏ। ତେବେ ବର୍ତ୍ତମାନ ପ୍ରାୟ ୮ ବର୍ଷର ବ୍ୟବଧାନ ପରେ ସେ ଇଣ୍ଡିଆନ୍ ଫ୍ରାଞ୍ଚାଇଜ ଲିଗ (ଇଣ୍ଡିଆନ ପ୍ରିମିୟର ଲିଗ)ରେ ଖେଳୁଥିବା ଦେଖିବାକୁ ମିଳିବ। ତଥାପି ଷ୍ଟାର୍କ ଏତେ ବର୍ଷ ପର୍ଯ୍ୟନ୍ତ ଆଇପିଏଲ ଠାରୁ ଦୂରରେ ରହିବା ପାଇଁ ଦୁଃଖିତ ନାହାନ୍ତି। ଏହା ପଛର କାରଣ ମଧ୍ୟ ସେ ଦେଇଛନ୍ତି।
ଅଷ୍ଟ୍ରେଲୀୟ ବରିଷ୍ଠ ଦ୍ରୁତ ବୋଲର ମିଚେଲ ଷ୍ଟାର୍କ ସ୍ବୀକାର କରିଛନ୍ତି ଯେ, ସେ ଅନ୍ତର୍ଜାତୀୟ କ୍ରିକେଟକୁ ପ୍ରାଥମିକତା ଦେବା ପାଇଁ ଅତୀତରେ ଲାଭଜନକ ଆଇପିଏଲ ଅଫରକୁ ପ୍ରତ୍ୟାଖ୍ୟାନ କରିଥିଲେ, ଯାହା ତାଙ୍କୁ ତାଙ୍କ ଖେଳରେ ଉନ୍ନତି ଆଣିବାରେ ସାହାଯ୍ୟ କରିଥିଲା। ୨୦୧୫ ପରଠାରୁ ଏହା ପ୍ରଥମ ଥର ପାଇଁ ଷ୍ଟାର୍କ ଆଇପିଏଲର ଏକ ଅଂଶ ହେବ। ଆଇପିଏଲ ସମୟରେ ବିରତି ତାଙ୍କୁ ସତେଜ ହେବା ସହ ଅନ୍ତର୍ଜାତୀୟ ମ୍ୟାଚ ପାଇଁ ଫିଟ ରହିବାକୁ ସାହାଯ୍ୟ କରିଛି।
ସେ ଆହୁରି ମଧ୍ୟ କହିଛନ୍ତି, ମୋର ଏଥିରେ କୌଣସି ଦୁଃଖ ନାହିଁ। ମୁଁ ଭାବୁଛି ଏହା ନିଶ୍ଚିତ ଭାବେ ମୋ ଟେଷ୍ଟ କ୍ରିକେଟକୁ ସାହାଯ୍ୟ କରିଛି। ଟଙ୍କା ସର୍ବଦା ଭଲ ଏବଂ ଏହା ନିଶ୍ଚିତ ଭାବରେ ଚଳିତ ବର୍ଷ ମଧ୍ୟ ଥିଲା, କିନ୍ତୁ ମୁଁ ସର୍ବଦା ଆନ୍ତର୍ଜାତୀୟ କ୍ରିକେଟକୁ ପ୍ରାଥମିକତା ଦେଇଥିଲି। ମୁଁ ଭାବୁଛି ଏହା ମୋର ଖେଳକୁ ସାହାଯ୍ୟ କରିଛି।