ପାରଳାଖେମୁଣ୍ଡି,୨ା୩(ଡି.ଏନ୍.ଏ): ଗଜପତି ଜିଲା ପାରଳାଖେମୁଣ୍ଡି ସହରର ଫ୍ରେଣ୍ଡସ କଲୋନୀରୁ ପୁଣି ଚୋରି ହୋଇଥିବା ଅଭିଯୋଗ ହୋଇଛି। ଏସ. ଲୋକନାଥ ରେଡ୍ଡୀଙ୍କ ଘର ତାଲା ଭାଙ୍ଗି ସୁନା ରୁପା ଅଳଙ୍କାର, ଟିଭି, ଲାପ୍ଟପ୍ ଏବଂ ବାସନକୁସନ ଚୋରି ହୋଇଛି । ରେଡ୍ଡୀ ନିଜ ମା’ଙ୍କ ମୃତ୍ୟୁ ଖବର ଶୁଣି ଛତ୍ରପୁର ନିଜ ଗାଁକୁ ଯାଇଥିଲେ। ସେଠାରେ ମା’ଙ୍କ ଅନ୍ତେଷ୍ଠି କାର୍ଯ୍ୟ ସାରି ୧୫ ଦିନ ପରେ ପାରଳାଖେମୁଣ୍ଡି ଫେରିଥିବା ବେଳେ ଘର ଭିତରପଟୁ ବନ୍ଦଥିବା ଜାଣି ସ୍ଥାନୀୟ କିଛି ଯୁବକଙ୍କୁ ବାରିପଟେ ଯାଇ ଦେଖିବାକୁ କହିଥିଲେ। ବାରିପଟ ତାଲା ଭାଙ୍ଗିଯାଇ ଘର ଖୋଲାଥିବା ଦେଖିଥିଲେ। କବାଟ ଖୋଲି ଦେଖିବା ପରେ ଘରୁ ୨ ଭରିରୁ ଊର୍ଦ୍ଧ୍ୱ ସୁନା ଅଳଙ୍କାର, ଟିଭି, ଲାପଟପ, ନଗଦ ୪୦ହଜାର ଟଙ୍କା ସହ ବହୁ ଆସବାବପତ୍ର ଚୋରି ହୋଇଥିବା ଦେଖିବାକୁ ପାଇଥିଲେ। ଏ ନେଇ ସେ ପାରଳାଖେମୁଣ୍ଡି ଆଦର୍ଶ ଥାନାରେ ଅଭିଯୋଗ କରିବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ହେଲେ ପୋଲିସକୁ କୌଣସି ସୁରାକ ମିଳି ନ ଥିବା ଜଣାପଡିଛି।