ଆଠଗଡ଼, ୨୧।୧୦(ସ୍ବ.ପ୍ର.) : କଟକ ଜିଲା ଆଠଗଡ଼ ଥାନା ଅଞ୍ଚଳରେ ଗତ ୧୦ ତାରିଖରେ କ୍ୟାସଭ୍ୟାନରେ ଟଙ୍କା ଏଟିଏମ୍ରେ ଭର୍ତ୍ତି ପାଇଁ ଯାଉଥିଲା। ଭ୍ୟାନରୁ ଟଙ୍କା ଲୁଟ୍ ଘଟଣାରେ ପୂର୍ବରୁ ୩ ଅଭିଯୁକ୍ତ ଗିରଫ ହୋଇଥିଲେ। ଏଥିରେ ସମ୍ପୃକ୍ତ ଅନ୍ୟ ୩ ଅଭିଯୁକ୍ତଙ୍କୁ ପୋଲିସ ବୁଧବାର ଭୁବନେଶ୍ୱରରୁ ଗିରଫ କରିଛି। ଭୁବନେଶ୍ୱର ନନ୍ଦନବିହାରସ୍ଥିତ ସାଇ ରେସିଡେନ୍ସି ହୋଟେଲରେ ଓୟେ ରୁମ ମଧ୍ୟରେ ୩ ଅଭିଯୁକ୍ତ ଲୁଚି ରହିଥିଲେ। ସେମାନେ ବାହାର ରାଜ୍ୟକୁ ଚାଲିଯିବାକୁ ମସୁଧା କରିଥିବା ବେଳେ ଧରାପଡିଛନ୍ତି। ଅଭିଯୁକ୍ତମାନେ ହେଲେ ବୌଦ୍ଧ ଜିଲା ପୁରୁଣା କଟକ ଥାନା ଅନ୍ତର୍ଗତ ଉପରକଟା ଗାଁର ପୁଅ କ୍ଷୀରୋଦ ନାଏକ ଓରଫ ଯାଦବ(୨୪) ଓ ସେହି ଥାନା ଅନ୍ତର୍ଗତ କରଞ୍ଜକଟା ଗାଁର ରଜତ କୁମାର ବେହେରା ବୋଲି ଜଣାପଡିଛି। ସେହିପରି ହୋଟେଲ ମଧ୍ୟରେ ସୁରକ୍ଷା ଦେଇ ଏଭଳି ଡକାୟତି ପାଇଁ ଷଡଯନ୍ତ୍ର କରିବା ଅଭିଯୋଗରେ ନନ୍ଦନକାନନ ଥାନା ଅନ୍ତର୍ଗତ ଗଣ୍ଡରପୁର ଗାଁର ତଥା ନନ୍ଦନବିହାରସ୍ଥିତ ସାଇ ରିସର୍ଟ ହୋଟେଲର ମାଲିକଙ୍କ ପୁଅ ବ୍ରହ୍ମାନନ୍ଦ ସେନାପତି ଓରଫ ଟିକି(୨୪)ଙ୍କୁ ଗିରଫ କରାଯାଇଛି। ଲୁଟ୍ରେ ବ୍ୟବହୃତ କାର ନଂ. ଓଡି ୩୩ ବି ୦୯୦୯, ବାଇକ୍ ନଂ. ଓଡି ୦୨ ଟି ୫୯୮୬ ଓ ୩ ମୋବାଇଲ ଫୋନ, ମୁମ୍ବାଇ ଯିବା ପାଇଁ ରେଳ ଟିକଟ ଜବତ କରିଛି।
ପୋଲିସ ସୂତ୍ରରୁ ପ୍ରକାଶ, ଲୁଟ୍ ଘଟଣାର ମାଷ୍ଟର ମାଇଣ୍ଡ ଆଠଗଡ଼ ଥାନା ଅରଖପାଟଣା ଗଁାର ବିବେକାନନ୍ଦ ନାୟକ, ସହଯୋଗୀ ହରେକୃଷ୍ଣ ସ୍ବାଇଁ, ଜାଲିଦେବ କଅଁର ବିଭିନ୍ନ ଅପରାଧରେ ସମ୍ପୃକ୍ତ ଥାଇ ଭୁବନେଶ୍ୱରସ୍ଥିତ ଝାରପଡ଼ା ଜେଲରେ ଥିଲେ। ୩ ମାସ ତଳେ ଜେଲରୁ ବାହାରି ସାହି ରେସିଡେନ୍ସିରେ ଯୋଜନା ପ୍ରସ୍ତୁତ କରିଥିଲେ। ଏଟିଏମ୍କୁ ଟଙ୍କା ନେଉଥିବା ଗାଡ଼ିର ଗତିବିଧିକୁ ଲକ୍ଷ୍ୟ କରି ଗତ ୧୦ ତାରିଖରେ ୩ ଦଳରେ ବିଭକ୍ତ ହୋଇ ଲୁଟ୍ କରିଥିଲେ। ପୂର୍ବରୁ ବିବେକାନନ୍ଦ, ହରେକୃଷ୍ଣ, ଜାଲିଦେବଙ୍କୁ ପୋଲିସ ଗିରଫ କରି ବ୍ୟବହୃତ କାରକୁ ଜବତ କରି ଆଠଗଡ଼ ଥାନା ନଂ. ୨୧୮/୨୧ରେ ମାମଲା ରୁଜୁ କରିଥିଲା। ବୁଧବାର ସମ୍ପୃକ୍ତ ମାମଲା ସଂଶ୍ଲିଷ୍ଟ ଅନ୍ୟ ୩ ଜଣଙ୍କୁ ଗିରଫ ପରେ ଦଫା ୩୯୫,୩୯୭, ଆର୍ମ ଆକ୍ଟ ୨୫/୨୭ରେ କୋର୍ଟ ଚାଲାଣ କରାଯାଇଛି ବୋଲି ଆଇଆଇସି ଶୁଭ୍ରାଂଶୁ ଶେଖର ପରିଡ଼ା ଖବରଦାତା ସମ୍ମିଳନୀରେ କହିଛନ୍ତି।