ଯାଜପୁର ଅଫିସ,୯ା୭:ଯାଜପୁର ଜିଲା ଜାରକା ଗ୍ରାମ୍ୟ ନିର୍ମାଣ ଡିଭିଜନ-୨ ଅଧୀନରେ ନିର୍ମାଣ ହୋଇଥିବା ବାଲିଚନ୍ଦ୍ରପୁର-ଦେକୁରୀ ଏବଂ ଏନ୍ଏଚ୍-୫(କ)ଠାରୁ ଭରତପୁର ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା (ପିଏମ୍ଜିଏସ୍ୱାଇ) ରାସ୍ତାରେ ଅର୍ଥ ଆମତ୍ସାତ୍ ଏବଂ ନିମ୍ନମାନ କାମ ହୋଇଥିବା ଅଭିଯୋଗ ହୋଇଛି। ଏହାର ଯୁଗ୍ମ ତଦନ୍ତ କରି ରିପୋର୍ଟ ଦାଖଲ କରିବାକୁ ପିଏମ୍ଜିଏସ୍ୱାଇର ମୁଖ୍ୟଯନ୍ତ୍ରୀ ତାଙ୍କ ପତ୍ରସଂଖ୍ୟା ୧୮୯୩୩/୮ା୭ା୨୦୨୧ରେ ଏସ୍କ୍ୟୁଏମ୍(ଷ୍ଟେଟ କ୍ବାଲିଟି ମନିଟରିଂ)ର ଯନ୍ତ୍ରୀ ସୁକାନ୍ତ ବେହେରା ଓ ହିମାଂଶୁ କୁମାର ଆଚାର୍ଯ୍ୟଙ୍କୁ ନିର୍ଦ୍ଦେଶ ଦେଇଛନ୍ତି। ତେବେ ବିଭାଗୀୟ ତଦନ୍ତ ହେଉଥିବାରୁ ସ୍ବଚ୍ଛତା ନେଇ ଆଶଙ୍କା ପ୍ରକାଶ ପାଇଛି।
୨୦୧୮ରେ ୪ କୋଟି ୧୦ ଲକ୍ଷ ଟଙ୍କା ବ୍ୟୟରେ ବାଲିଚନ୍ଦ୍ରପୁର-ଦେକୁରୀ ୧୧.୨ କିିମି ରାସ୍ତା ନିର୍ମାଣ ଆରମ୍ଭ ହୋଇଥିଲା। ୨୦୧୯ ଏପ୍ରିଲ ୨୫ରେ କାମ ଶେଷ କରିବାକୁ ସମୟ ଧାର୍ଯ୍ୟ କରାଯାଇଥିଲା ା ହେଲେ ନିର୍ଦ୍ଧାରିତ ସମୟର ୧ ବର୍ଷ ପରେ ଅର୍ଥାତ୍ ୨୦୨୦ ମାର୍ଚ୍ଚରେ ନିର୍ମାଣ ଶେଷ ହୋଇଥିଲା। କିନ୍ତୁ ଏଷ୍ଟିମେଟ୍ ଅନୁସାରେ ରାସ୍ତା ହୋଇ ନ ଥିବାରୁ ୪ ମାସ ପରେ ବିଭିନ୍ନ ସ୍ଥାନରେ ଖାଲଖମା ହୋଇଥିବା ଦେଖିବାକୁ ମିଳିଥିଲା। ଏନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ଠିକାସଂସ୍ଥା ଦ୍ୱାରା ପୁଣି ମରାମତି ହୋଇଥିଲା। ତଥାପି ପିଚୁ ଉଠିଯାଇ ପୁଣି ଖାଲ ହୋଇଛି। ଏନେଇ ବିକ୍ରମତିରଣର ପୂର୍ବତନ ସମିତିସଭ୍ୟ ସର୍ବେଶ୍ୱର ସାମଲ ମୁଖ୍ୟଶାସନ ସଚିବ, ୫-ଟି ସଚିବ, ବିଭାଗୀୟ ମୁଖ୍ୟଯନ୍ତ୍ରୀ ଓ ଭିଜିଲାନ୍ସ ବିଭାଗର ଦୃଷ୍ଟି ଆକର୍ଷଣ କରିଥିଲେ। ମୁଖ୍ୟଯନ୍ତ୍ରୀଙ୍କ ନିର୍ଦ୍ଦେଶରେ ଜାରକା ନିର୍ବାହୀ ଯନ୍ତ୍ରୀ ରାସ୍ତା ନିରୀକ୍ଷଣରେ ଆସି ନିମ୍ନମାନ କାମକୁ ଅସ୍ବୀକାର କରିଥିଲେ। ଗ୍ରାମବାସୀଙ୍କ ପକ୍ଷରୁ ପୁଣି ଅଭିଯୋଗ ପରେ ମୁଖ୍ୟଯନ୍ତ୍ରୀ ତଦନ୍ତରେ ଆସି ରାସ୍ତା ମରାମତି କରିବାକୁ ନିର୍ଦ୍ଦେଶ ଦେଇଥିଲେ। ୧୮ା୩ା୨୦୨୦ରେ ଗ୍ରାମ୍ୟ ଉନ୍ନୟନ ବିଭାଗ ଅଧିକ୍ଷଣ ଯନ୍ତ୍ରୀ ଜାତୀୟ ରାଜପଥରୁ ଭରତପୁର ପିଏମ୍ଜିଏସ୍ୱାଇ ରାସ୍ତା ନିର୍ମାଣରେ ଅନିୟମିତତା ହୋଇଥିବା ନେଇ ନିର୍ବାହୀ ଯନ୍ତ୍ରୀଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ। ଏହାସହ ଚଣ୍ଡିଖୋଲ ଗ୍ରାମ୍ୟ ନିର୍ମାଣ ସବ୍ଡିଭିଜନର ସହକାରୀ ଯନ୍ତ୍ରୀ ଓ କନିଷ୍ଠ ଯନ୍ତ୍ରୀଙ୍କୁ କାରଣ ଦର୍ଶାଅ ନୋଟିସ କରିଥିଲେ। ହେଲେ ଏପର୍ଯ୍ୟନ୍ତ ଉପରୋକ୍ତ ରାସ୍ତା ଦ୍ୱୟର ଉନ୍ନତି ହୋଇନାହିଁ କିମ୍ବା ସଂପୃକ୍ତ ଯନ୍ତ୍ରୀ ଏବଂ ଠିକାଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ।