ଅନୁଗୋଳ ଅଫିସ,୨୫।୪: ଚୋରା ମଦ ବ୍ୟବସାୟରୁ ମିଳିଥିବା ଲାଭ ଟଙ୍କା ନ ଦେବା ଓ ସହଯୋଗୀଙ୍କ ବାନ୍ଧବୀଙ୍କୁ ପ୍ରେମ ହିଁ ଅନୁଗୋଳ ଥାନା ହୁଲୁରୁସିଂହାର ପ୍ରକାଶ ବେହେରା (୩୮)ଙ୍କ ହତ୍ୟାର ପ୍ରମୁଖ କାରଣ। ଅନୁଗୋଳ ଥାନା ପୋଲିସ ସୋମବାର ଏକ ଖବରଦାତା ସମ୍ମିଳନୀରେ ଏପରି ତଥ୍ୟ ରଖିବା ସହ ଏହି ବହୁ ଚର୍ଚ୍ଚିତ ହତ୍ୟା ଘଟଣା ଉପରୁ ପରଦା ଉଠାଇଛି। ଏଥିସହ ହତ୍ୟକାଣ୍ଡ ଘଟାଇଥିବା ମୁଖ୍ୟ ଅଭିଯୁକ୍ତ ତଥା ପ୍ରକାଶର ବ୍ୟବସାୟିକ ସହଯୋଗୀ ଘାଷିସାହିର ବାବୁ ଓରଫ କରନ୍ ମୁଖୀ(୨୧) ଓ ବାବୁଙ୍କୁ ସହାୟତା କରିଥିବା ଘାଷିସାହିର କାହ୍ନୁ ମୁଖୀ(୨୩)ଙ୍କୁ ଗିରଫ କରିଛି। ହତ୍ୟା ଯୋଜନା ବିଷୟରେ ଜାଣିଥିବା ଓ ସେଥିରେ ସାମିଲ ଥିବା ଅଭିଯୋଗରେ ବାବୁଙ୍କ ବାନ୍ଧବୀ (ପ୍ରେମିକା) ଏବଂ ମୃତ ପ୍ରକାଶଙ୍କ ସୁନା ଚେନ୍ ରଖିଥିବାରୁ ଜଣେ ମହିଳାଙ୍କୁ ଗିରଫ କରାଯାଇଛି। ଅଭିଯୁକ୍ତଙ୍କ ନିକଟରୁ ୫ଟି ମୋବାଇଲ, ଗୋଟିଏ ସୁନା ଚେନ୍ ଓ ହତ୍ୟାରେ ବ୍ୟବହୃତ ଛୁରି, କଟୁରିକୁ ଜବତ କରାଯାଇଥିବା ଅନୁଗୋଳ ଆଡିଶନାଲ ଏସ୍ପି ସୁରେଶ ପାଣିଗ୍ରାହୀ ସୂଚନା ଦେଇଛନ୍ତି। ଏହି ଖବରଦାତା ସମ୍ମିଳନୀରେ ଏସ୍ଡିପିଓ ରମାକାନ୍ତ ମାହାଳିକ, ଥାନା ଅଧିକାରୀ ପ୍ରଭାତ ତ୍ରିପାଠୀ ଉପସ୍ଥିତ ଥିଲେ।
ପୋଲିସ କହିଛି, ହୁଲୁରୁସିଂହାର ପ୍ରକାଶଙ୍କୁ ଗତ ଶୁକ୍ରବାର ରାତିରେ ଘାଷିସାହି ଖେଳପଡ଼ିଆଠାରେ ଗୋଡ଼ାଇ ଗୋଡ଼ାଇ ହାଣି ହତ୍ୟା କରାଯାଇଥିଲା। ଏ ନେଇ ତାଙ୍କ ସ୍ତ୍ରୀ ରିଙ୍କି ବେହେରା ଥାନାରେ ଅଭିଯୋଗ କରିବା ପରେ ନଂ. ୨୦୦/୨୩ରେ ମାମଲା ରୁଜୁ ସହ ତଦନ୍ତ ଆରମ୍ଭ କରାଯାଇଥିଲା। ପ୍ରକାଶଙ୍କ ମୋବାଇଲକୁ କେଉଁମାନେ କଲ୍ କରିଥିଲେ ସେଠାରୁ ହିଁ ଖୋଳତାଡ କରାଯାଇଥିଲା। କଲ୍ ଡିଟେଲ୍ସରୁ ମୁଖ୍ୟ ଅଭିଯୁକ୍ତ ବାବୁ ଓ ଜଣେ ମହିଳାଙ୍କ ଫୋନରୁ ମଧ୍ୟ କଲ୍ ଆସିଥିବା ଜଣାପଡ଼ିଥିଲା। ତାହାକୁ ଆଧାର କରି ତଦନ୍ତ ଆଗକୁ ବଢ଼ିଥିଲା। ପ୍ରଥମେ ବାବୁଙ୍କୁ ଥାନାକୁ ଆଣି ପଚରା ଉଚରା କରାଯାଇଥିଲା। ସେ ଏଥିରେ ସମ୍ପୃକ୍ତ ନ ଥିବା ପ୍ରଥମେ କହିଥିଲେ। ଅଧିକ ପଚରା ଉଚରା ପରେ ସେ ଏକା ଏହି ହତ୍ୟାକାଣ୍ଡ ଘଟାଇଥିବା କହିଥିଲେ। ଏହାପରେ ତାଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଥିଲା। କିନ୍ତୁ ରିମାଣ୍ଡରେ ଆଣି ଅଧିକ ଜେରା ପରେ ହତ୍ୟା ଘଟଣା ଉପରୁ ସମ୍ପୂର୍ଣ୍ଣ ପରଦା ଉଠିଥିଲା। ପ୍ରକାଶଙ୍କର ଏକ ବ୍ରଏଲର ପଏଣ୍ଟ ଥିଲେ ବି ସେ ଓ ବାବୁ ମିଶି ଚୋରା ମଦ ବ୍ୟବସାୟ କରୁଥିଲେ। ହେଲେ ଲାଭ ଟଙ୍କାକୁ ନେଇ ତିକ୍ତତା ଦେଖାଦେଇଥିଲା। ପ୍ରକାଶ ଲାଭ ଟଙ୍କା ବାବୁଙ୍କୁ ଦେଇ ନ ଥିଲେ। ବିଭିନ୍ନ ଆଳ ଦେଖାଇ ଦିନ ଗଡ଼ାଇ ଚାଲିଥିଲେ। ଫଳରେ ବାବୁ ପ୍ରତିଶୋଧ ନେବାକୁ ସୁଯୋଗ ଖୋଜୁଥିଲେ। ଇତିମଧ୍ୟରେ ବାବୁଙ୍କ ବାନ୍ଧବୀଙ୍କ ସହ ପ୍ରକାଶଙ୍କ ସମ୍ପର୍କ ଗଢ଼ି ଉଠିଥିଲା। ଏହା ବାବୁଙ୍କୁ ଆହୁରି ରକ୍ତମୁଖା କରିଦେଇଥିଲା। ଶୁକ୍ରବାର ରାତିରେ ବାବୁ କୌଣସି କଥା କହି ପ୍ରକାଶଙ୍କୁ ଘାଷିସାହି ଖେଳପଡ଼ିଆକୁ ଡାକିଥିଲେ। ସେଠାରେ ତାଙ୍କୁ ମୋବାଇଲରେ କିଛି ଦେଖାଇଥିଲେ। ପ୍ରକାଶ ମୋବାଇଲ ଦେଖିବା ସମୟରେ ବାବୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। ପ୍ରକାଶ ଦୌଡ଼ି ଚାଲିଯିବାକୁ ବସିଥିବାବେଳେ ପୂର୍ବରୁ ଲୁଚି ରହିଥିବା ବାବୁଙ୍କ ସହଯୋଗୀ କାହ୍ନୁ ତାଙ୍କୁ ଆଉ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। ଏହାପରେ ବାବୁ ଓ କାହ୍ନୁ ଦୁହେଁ ମିଶି ଗୋଡ଼ାଇ ଗୋଡ଼ାଇ ହାଣି ଚାଲିଥିଲେ। ପ୍ରକାଶଙ୍କ ମୃତ୍ୟୁ ହୋଇଯିବା ପରେ ଦୁଇ ଅଭିଯୁକ୍ତ ବ୍ୟବହୃତ ଅସ୍ତ୍ରକୁ ଲିଙ୍ଗରା ନାଳରେ ଲୁଚାଇ ପଳାଇ ଯାଇଥିଲେ। କିଛି ସମୟ ପରେ ବାବୁ ଘଟଣାସ୍ଥଳକୁ ଆସି ଅନ୍ୟମାନଙ୍କ ପରି ପ୍ରକାଶଙ୍କ ମୃତଦେହ ଦେଖିଥିଲେ। ବାବୁ ଧରାପଡ଼ିବା ପରେ ପ୍ରକାଶଙ୍କ ସୁନା ଚେନ୍ ଜଣେ ମହିଳାଙ୍କ ନିକଟରେ ଲୁଚାଇଥିବା ପୋଲିସକୁ କହିଥିଲେ। ପୋଲିସ ଉକ୍ତ ସୁନା ଚେନ୍ ଜବତ କରିବା ସହ ସମ୍ପୃକ୍ତା ମହିଳାଙ୍କୁ ଗରିଫ କରିଥିଲା। ଅଭିଯୁକ୍ତଙ୍କ ବାନ୍ଧବୀ ହତ୍ୟା ଯୋଜନା ସମ୍ପର୍କରେ ଅବଗତ ରହିବା ସହ ସେଥିରେ ସାମିଲ ଥିବାରୁ ତାଙ୍କୁ ମଧ୍ୟ ଗିରଫ କରାଯାଇଥିଲା। ଘଟଣାର ତଦନ୍ତ ଏସ୍ଆଇ ଶଶିଭୂଷଣ ବେହେରାଙ୍କୁ ପ୍ରଦାନ କରାଯାଇଥିବା ପୋଲିସ ପ୍ରକାଶ କରିଛି।