ସକାଳୁ ଉଠିବା ପରେ ଲାଟ୍ରିନ୍କୁ ଯିବା ସମସ୍ତଙ୍କର ଏକ ନିତିଦିନିଆ କାମ। ହେଲେ ବେଳେବେଳେ ଇଛା ହୁଏ ଏ କାମ ଯଦି ନ ଥାଆନ୍ତା କେତେ ଭଲ ହୋଇଥାନ୍ତା। ତେବେ ଜାଣି ଆଶ୍ଚର୍ଯ୍ୟ ହେବେ ଏବେ ଏକ କମ୍ପାନୀ ମଳକୁ ନେଇ ଏଭଳି ଅଫର୍ ଦେଉଛି ଯେ, ସବୁଦିନ ଲାଟ୍ରିନ ଯିବାକୁ ଇଛା ହେବ। ଅର୍ଥାତ୍ କମ୍ପାନୀ ମଣିଷ ମଳ ବଦଳରେ ଦେଢ କୋଟି ଟଙ୍କା ଦେବ। ଏକ ରିପୋର୍ଟ ମୁତାବକ କାନାଡା ଓ ଆମେରିକାର କମ୍ପାନୀ ହ୍ୟୁମାନ ମାଇକ୍ରୋବ୍ସ ଷ୍ଟୁଲ ଡୋନର୍ସଙ୍କ ସନ୍ଧାନରେ ଅଛି। ଅର୍ଥାତ୍ କମ୍ପାନୀ ଏଭଳି ଲୋକଙ୍କୁ ଖୋଜୁଛି ଯେକି ନିଜର ମଳ ଗବେଷଣା ପାଇଁ ଦେବ। ଆଉ ପ୍ରତି ବଦଳରେ କମ୍ପାନୀ ସେହି ବ୍ୟକ୍ତିଙ୍କୁ ଦିନପିଛା ୪୧୦୦୦ ଟଙ୍କା ଦେବ। ଯାହାକି ବର୍ଷକୁ ପ୍ରାୟ ୧.୫ କୋଟି ହେବ। ମନରେ ପ୍ରଶ୍ନ ଉଠୁଥିବ କମ୍ପାନୀ ମଳ ସଂଗ୍ରହ କରିବାକୁ କାହିଁକି ଚାହୁଁଛି। ତେବେ କମ୍ପାନୀ ଏମିତି ଯାହାକୁ ନାଇଁ ତାକୁ ଟଙ୍କା ଦେବ ନାହିଁ। ବରଂ ଏହାକୁ ନେଇ ଅନେକ ସର୍ତ୍ତ ରଖାଯାଇଛି। ପ୍ରଥମତଃ କମ୍ପାନୀ ବ୍ୟକ୍ତିଙ୍କ ଦ୍ୱାରା ଏକ ଫର୍ମ ଫିଲ୍ ଅପ୍ କରାଇବ। ଏହାପରେ ଇଣ୍ଟରଭ୍ୟୁ ଓ ଟେଷ୍ଟ ନିଆଯିବ। ଏହି ସମୟରେ ବ୍ୟକ୍ତିଙ୍କ ପରିଚୟ ଗୋପନ ରଖାଯିବ। ମନୁଷ୍ୟ ମଳରେ ସାଧାରଣତଃ କିଛି ଭଲ ଓ କ୍ଷତିକାରକ ବ୍ୟାକ୍ଟେରିଆ ଥାଆନ୍ତି। ଭଲ ବ୍ୟାକ୍ଟେରିଆ କେବଳ ୦.୧ ପ୍ରତିଶତ ମଣିଷଙ୍କ ମଳରେ ଥାଏ। ଆଉ କମ୍ପାନୀ ଏହିଭଳି ଲୋକଙ୍କୁ ହିଁ ଖୋଜୁଛି ଯାହାର ମଳରେ ଭଲ ବ୍ୟାକ୍ଟେରିଆ ଅଛି। ସେମାନଙ୍କ ମଳ ଉପରେ କମ୍ପାନୀ ଗବେଷଣା କରିବ। ଡ୍ରାଏ ଆଇସ୍ ଶିପିଂ ମାଧ୍ୟମରେ ବ୍ୟକ୍ତି ମଳକୁ କମ୍ପାନୀକୁ ପଠାଇବେ। ଆଉ ପ୍ରତିବଦଳରେ ଟଙ୍କା ପାଇବେ।