ବଇଣ୍ଡା,୧୧।୨(ଡି.ଏନ.ଏ.) କିଶୋରନଗର ବ୍ଲକ ବଇଣ୍ଡାଠାରେ ଥିବା ଅନୁଗୋଳ ସଂଯୁକ୍ତ ସମବାୟ ବ୍ୟାଙ୍କ ବଇଣ୍ଡା ଶାଖା ପକ୍ଷରୁ ଚାଷୀଙ୍କୁ ଧାନ ବିକ୍ରି ଟଙ୍କା ଠିକ୍ ଭାବେ ଯୋଗାଇ ଦିଆଯାଉନାହିଁ। ଫଳରେ ଚାଷୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଧାନ ବିକ୍ରି ବାବଦ ସମସ୍ତ ଟଙ୍କା ଏକସଙ୍ଗେ ପ୍ରଦାନ କରିବା ପାଇଁ ନୁନୁକାପଶି, ଗାଁ ବଇଣ୍ଡା ଅଞ୍ଚଳର ଚାଷୀମାନେ ଗୁରୁବାର ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ଚାଷୀମାନେ ଦର୍ଶାଇଛନ୍ତି, ଲୁହାମୁଣ୍ଡା, ହଣ୍ଡପା, ଧଉରାପାଲି, ଉରୁକୁଳା, ରଣିଆକଟା, ଅଙ୍ଗପଡା, ବାମୁର, ରଣିଆକଟା ଆଦି ୮ଟି ସେବା ସମବାୟ ସମିତିରେ ଧାନ ବିକ୍ରି କରିଥିବା ଚାଷୀମାନଙ୍କ ଟଙ୍କା ଏହି ବ୍ୟାଙ୍କରେ ଥିବା ସେମାନଙ୍କ ଆକାଉଣ୍ଟରେ ଡିପୋଜିଟ ହୋଇଛି। କିନ୍ତୁ ଟଙ୍କା ଉଠାଣରେ ବ୍ୟାପକ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ବ୍ୟାଙ୍କ କର୍ତ୍ତୃପକ୍ଷ ଠିକ ଭାବେ ଟଙ୍କା ଯୋଗାଇ ଦେଉ ନ ଥିବାବେଳେ ଦିନକୁ ମାତ୍ର ୧୦ ହଜାର ଟଙ୍କା ଉଠାଣ ପାଇଁ ଅନୁମତି ଦିଆଯାଉଥିବା ଚାଷୀମାନେ କହିଛନ୍ତି। ଅନେକ ଚାଷୀ ୩୦ କିଲୋମିଟର ଦୂରରୁ ଟଙ୍କା ଉଠାଣ ପାଇଁ ବସ୍ ଯୋଗେ ବ୍ୟାଙ୍କକୁ ଆସୁଥିବାବେଳେ ଅଳ୍ପ ଟଙ୍କା ଧରି ନିରାଶରେ ଫେରୁଛନ୍ତି। ଏପରି କି ପୁଅ ଓ ଝିଅ ବିବାହ ଥିଲେ ମଧ୍ୟ ଚାଷୀମାନଙ୍କୁ ଧାନ ବାବଦ ସବୁ ଟଙ୍କା ମିଳିପାରୁ ନାହିଁ। ତୁରନ୍ତ ଚାଷୀଙ୍କ ଧାନ ବିକ୍ରି ଟଙ୍କା ଏକାବେଳେ ଯୋଗାଇ ଦେବା ପାଇଁ ଚାଷୀ ଲିଙ୍ଗରାଜ ବିଶ୍ୱାଳ, ଅରବିନ୍ଦ ସାହୁ, କନ୍ଦର୍ପ ପ୍ରଧାନ, ନେଙ୍କୁରୀ ସାହୁ, ପୂର୍ଣ୍ଣଚନ୍ଦ୍ର ବେହେରା, ସଞ୍ଜୀବ ପ୍ରଧାନ ପ୍ରମୁଖ ଦାବି କରିଛନ୍ତି। ଏ ନେଇ ବଇଣ୍ଡା ଅନୁଗୋଳ ସଂଯୁକ୍ତ ସମବାୟ ବ୍ୟାଙ୍କ ଭାରପ୍ରାପ୍ତ ଶାଖା ପରିଚାଳକ ପ୍ରଶାନ୍ତ କୁମାର ସିଂ ସାମନ୍ତ କହିଛନ୍ତି, କିଛି ମାସ ତଳେ ଏହି ଶାଖାରୁ ଚୋରି ହୋଇଥିବା ଯୋଗୁ ଅଧିକ ପରିମାଣର ଟଙ୍କା ରହୁନାହିଁ। ମୁଖ୍ୟ ଶାଖାରୁ ପ୍ରତ୍ୟେକ ଦିନ ଆସୁଥିବା ଟଙ୍କା ଚାଷୀମାନଙ୍କୁ ବାଣ୍ଟି ଦିଆଯାଉଛି। ୧୫ ଦିନ ମଧ୍ୟରେ ସମସ୍ୟା ସମାଧାନ ହୋଇଯିବ ବୋଲି ଶାଖା ପରିଚାଳକ ପ୍ରକାଶ କରିଛନ୍ତି।