ରସୁଲପୁର,୨୩ା୬(ରଂଜିତ ରାଉତ): ରସୁଲପୁର ବ୍ଲକ ଅନ୍ତର୍ଗତ ଭୋଟକା ପଞ୍ଚାୟତରେ ମାଙ୍କଡ଼ ଆତଙ୍କ ଥମିବାରେ ନାଁ ଧରୁନାହିଁ। ଦୁଇ ସପ୍ତାହ ହେଲା ମାଙ୍କଡ଼ ଆକ୍ରମଣରେ ଏଠାରେ ୮ରୁ ଊର୍ଦ୍ଧ୍ୱ ଲୋକ ଆହତ ହେଲେଣି। ଏହାଜାଣି ବନବିଭାଗ କାମୁଡ଼ା ମାଙ୍କଡ଼ଙ୍କୁ ଧରିବା ପାଇଁ ପଞ୍ଚାୟତର ଭୋଟକା, ସାନରମ୍ପେଇ ଆଦି ଗ୍ରାମରେ ପଇଁତରା ମାରିଥିଲା। ହେଲେ ସେମାନେ ମାଙ୍କଡ଼କୁ କାବୁ କରିବା ପାଇଁ ୩ଦିନ ଜଗି ରହିବା ପରେ ଗାଁ ଛାଡ଼ି ଚାଲି ଯାଇଛନ୍ତି। କାମୁଡ଼ା ମାଙ୍କଡକୁ ଚିହ୍ନଟ କରିବାରେ ବନବିଭାଗ ଓ ମାଙ୍କଡ଼ ଧରାଳି ବିଫଳ ହୋଇଛନ୍ତି। ଏବେ ମାଙ୍କଡ଼ ଗୋଡ଼ାଇବା ଦାୟିତ୍ୱ ଗାଁ ଯୁବକଙ୍କ କାନ୍ଧରେ। ଦିନତମାମ ଯୁବକମାନେ ଠେଙ୍ଗାବାଡି ଧରି ମାଙ୍କଡ଼ ପଲକୁ ଘଉଡ଼ାଉ ଥିବା ଦେଖାଯାଇଛି। ମାଙ୍କଡ଼ ପଲଙ୍କୁ ଗାଁରୁ ଅନ୍ୟତ୍ର ତଡି ଦେବାକୁ ପ୍ରୟାସ କରାଯାଉଛି। ହେଲେ ବିଭାଗ ପକ୍ଷରୁ ମାଙ୍କଡ଼ ଧରିବା ପ୍ରୟାସ ଲୋକ ଦେଖାଣିଆ ଥିଲା ବୋଲି ସାଧାରଣରେ ଆଲୋଚନା ହେଉଛି।
ପଞ୍ଚାୟତରେ ନାନା ସମୟରେ ମାଙ୍କଡ଼ କାମୁଡ଼ାରେ ଲୋକେ ଆହତ ହେଉଥିବା ଜାଣି ସ୍ଥାନୀୟ ସ୍ମୃତିରେଖା ରାଉତଙ୍କ ପକ୍ଷରୁ ଯାଜପୁର ଜିଲାପାଳ ଓ କଟକ ବନାଞ୍ଚଳ ଅଧିକାରୀଙ୍କ ସହ ଯୋଗାଯୋଗ କରାଯାଇଥିଲା। ପରେ ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ଓ ବନ ବିଭାଗ ଅଧିକାରୀ ଅଜିତ କୁମାର ଶତପଥୀଙ୍କ ନିର୍ଦ୍ଦେଶକ୍ରମେ ବନ ବିଭାଗ ପକ୍ଷରୁ ଏକ ୩ଜଣିଆ ଦଳ ସ୍ଥିତି ଅନୁଧ୍ୟାନ କରିବାକୁ ଭୋଟକା ପଞ୍ଚାୟତ କାର୍ଯ୍ୟାଳୟ ନିକଟରେ ପହଞ୍ଚତ୍ଥିଲେ। ବନ ବିଭାଗ ପକ୍ଷରୁ ୧୭ ତାରିଖରେ ମହମ୍ମଦ ଜାକିର ହୁସେନଙ୍କ ନେତୃତ୍ୱରେ ଆସିଥିବା ଦଳ ମାଙ୍କଡ଼ ଧରିବାରେ ବିଫଳ ହେବାରୁ ମାଙ୍କଡ଼ ଧରାଳି ଦଳର ସହାୟତା ନିଆଯାଇଥିଲା। ଏହିଦଳ ଦୁଇଦିନ ପଞ୍ଚାୟତର ବିଭିନ୍ନ ସ୍ଥାନରେ ମାଙ୍କଡ଼ ପଲଙ୍କ ଗତିବିଧି ଲକ୍ଷ୍ୟ କରିଥିଲେ। ହେଲେ କାମୁଡ଼ା ମାଙ୍କଡ଼ଙ୍କୁ ଠାବ କରିପାରି ନ ଥିଲେ। ଫାସ ବସାଇ ଗୋଟିଏ ମାଙ୍କଡ଼ ଧରିଥିଲେ। ଫାସକୁ ଦେଖି ମାଙ୍କଡ଼ ପଲ ଗଛ ଡାଳରୁ ତଳକୁ ଓହ୍ଲାଇ ନ ଥିଲେ। ସୋମବାର ମାଙ୍କଡ଼ ଧରାଳି ଦଳ ଚାଲିଯିବା ପରେ ମାଙ୍କଡ଼ ପଲର ଉପଦ୍ରବ ବଢି ଯାଇଛି। ପାଗଳ ମାଙ୍କଡ଼କୁ ଲୋକେ ଚିହ୍ନଟ କରିଛନ୍ତି। ଉକ୍ତ ମାଙ୍କଡ଼ଟି ଲୋକଙ୍କୁ ନିଛାଟିଆ ସ୍ଥାନରେ ଆକ୍ରମଣ କରୁଛି। ଏହାଜାଣି ଯୁବକମାନେ ପାଗଳ ମାଙ୍କଡ଼କୁ ଗୋଡ଼ାଇ ଅନ୍ୟତ୍ର ଛାଡ଼ିଦେବାକୁ ଉଦ୍ୟମ ଜାରି ରଖିଛନ୍ତି। ଅନ୍ୟପକ୍ଷରେ ପ୍ରଶାସନ ପକ୍ଷରୁ ମାଙ୍କଡ଼ କାମୁଡ଼ାରେ ଆହତ ଲୋକଙ୍କ ପରିବାରକୁ ଆର୍ଥତ୍କ ସହାୟତା ପ୍ରଦାନ ପାଇଁ କ୍ଷତିଗ୍ରସ୍ତ ପରିବାର ପକ୍ଷରୁ ଦାବି ହେଉଛି। ଆହତକ ସଂଖ୍ୟା ବଢ଼ିବା ଓ ଆତଙ୍କରେ ରୋକ ଲଗାଇବା ପାଇଁ ବିଭାଗ ପକ୍ଷରୁ କାମୁଡ଼ା ମାଙ୍କଡ଼କୁ ଚିହ୍ନଟ କରାଯାଇ କାବୁ କରାଯାଇ ପାରିଲେ ଜନସାଧାରଣଙ୍କୁ ଆଶ୍ୱସ୍ତି ମିଳି ପାରିବ ବୋଲି ସରପଞ୍ଚ ରାଉତ ମତ ଦେଇଛନ୍ତି।