କେନ୍ଦୁଝର,୨୭।୨(ସ୍ବ.ପ୍ର.): ଏକଦା କେନ୍ଦୁଝର ଜିଲା ବଣପାହାଡ଼ ଘେରରେ ପରିପୂର୍ଣ୍ଣ ଥିଲା। କିଛି ବର୍ଷ ହେଲା ବିଭିନ୍ନ କାରଣରୁ ଜଙ୍ଗଲ ନଷ୍ଟ ହେବା ଫଳରେ ଜଙ୍ଗଲ ମଧ୍ୟରେ ରହୁଥିବା ମାଙ୍କଡ଼ଙ୍କ ମଧ୍ୟରେ ଖାଦ୍ୟାଭାବ ଦେଖାଦେଇଛି। ଫଳରେ ମାଙ୍କଡ଼ମାନେ ଏବେ ରାଜରାସ୍ତାରେ ବୁଲୁଛନ୍ତି। ରାସ୍ତାରେ ଯାଉଥିବା ବାଟୋଇମାନେ ଯାହା ଦେଉଛନ୍ତି ତାହା ଖାଇ ଜୀବନ ବଞ୍ଚାଉଛନ୍ତି।
ସାଧାରଣତଃ ମାଙ୍କଡ଼ମାନେ ଜଙ୍ଗଲରୁ ବିଭିନ୍ନ ଫଳ, କୋଳି ଆଦି ଖାଦ୍ୟ ଖାଇଥାନ୍ତି। ଏବେ ଜଙ୍ଗଲ ନଷ୍ଟ ଯୋଗୁ ଫଳମୂଳର ଅଭାବ ପରିଲକ୍ଷିତ ହୋଇଛି। ତେଣୁ ହାତୀଙ୍କ ଭଳି ମାଙ୍କଡ଼ମାନେ ଜଙ୍ଗଲ ଛାଡ଼ି ଜନବସତି ମୁହାଁ ହେଉଛନ୍ତି।
କେନ୍ଦୁଝରରୁ ଏନ୍ଏଚ୍ ୪୯ରେ ଗଲେ ସାନଘାଗରା, ତଣ୍ଡିଯୋଡ଼ା, କାଞ୍ଜିପାଣି ଘାଟିରେ ମାଳମାଳ ମାଙ୍କଡ଼ ରାସ୍ତାରେ ଦେଖିବାକୁ ମିଳୁଛି। ସେହିପରି କାଞ୍ଜିପାଣିଠାରୁ ତେଲକୋଇ ରାସ୍ତାରେ ମଧ୍ୟ ମାଙ୍କଡ଼ମାନେ ଖାଦ୍ୟ ପାଇଁ ରାସ୍ତାରେ ବାଟୋଇଙ୍କ ଅପେକ୍ଷା କରି ଜଗିବସିଥାନ୍ତି। ବନ ବିଭାଗ ପକ୍ଷରୁ ଫଳମୂଳ ଭଳି ଖାଦ୍ୟ ଯୋଗାଇବା ବ୍ୟବସ୍ଥା କରିବା ଏବଂ ଉକ୍ତ ଅଞ୍ଚଳରେ ପ୍ରଚୁର ପରିମାଣରେ ଫଳମୂଳ, କୋଳି ଆଦି ବନୀକରଣ କରାଗଲେ ମାଙ୍କଡ଼ମାନେ ଖାଦ୍ୟାଭାବର ସମ୍ମୁଖୀନ ହେବେ ନାହିଁ ଏବଂ ଜଙ୍ଗଲରୁ ଜନବସତିକୁ ଆସିବେ ନାହିଁ। ଏହିପରି ସେମାନଙ୍କ ସୁରକ୍ଷା କରାଯାଇପାରିବ ବୋଲି ଗବେଷକ ଡକ୍ଟର କୃଷ୍ଣଚନ୍ଦ୍ର ନାୟକ କହିଛନ୍ତି। ଏପରିକି ସଚେତନତା ଫଳକ ନ ଥିବାରୁ କ୍ଷୀପ୍ର ଗତିରେ ଯାଉଥିବା ଗାଡ଼ିର ଶିକାର ହେଉଛନ୍ତି ନିରୀହ ମାଙ୍କଡ଼ମାନେ। ଏଣୁ ସେମାନଙ୍କ ସୁରକ୍ଷା ପାଇଁ ବନ ବିଭାଗ ଉଚିତ ପଦକ୍ଷେପ ନେବା ଉଚିତ ବାଲି ସ୍ଥାନୀୟ ସାମାଜିକ କର୍ମୀ ତଥା ପଶୁପକ୍ଷୀ ପ୍ରେମୀ ଅଞ୍ଜନ ବେଜ କହିଛନ୍ତି।